ព្រះវិហារៈ លោកទេសរដ្ឋមន្ត្រី លី ធុជ អនុប្រធានទី១អាជ្ញាធរមីនបានអំពាវនាវឱ្យប្រជាពលរដ្ឋទាំងអស់កុំប្រថុយចូលទៅតំបន់ដែលមិនស្គាល់ទីតាំងភូមិសាស្រ្តច្បាស់លាស់ និងមិនត្រូវប៉ះពាល់គ្រាប់មីន គ្រាប់បែកចង្កោម និងសំណល់ជាតិផ្ទុះពីសង្គ្រាមជាដាច់ខាត ហើយត្រូវរាយការណ៍ជាបន្ទាន់នៅពេលបានឃើញ បានដឹងពីកន្លែងមានមីន និងសំណល់ជាតិផ្ទុះពីសង្គ្រាម។
ការអំពាវនាវរបស់លោកលី ធុជ បែបនេះធ្វើឡើ់ង ខណៈលោកចុះដំឡើងផ្ទាំងប៉ាណូផ្សព្វផ្សាយការអប់រំ ការយល់ដឹងអំពីមីន និងយុទ្ធភណ្ឌមិនទាន់ផ្ទុះនៅស្រុកជាំក្សាន្ត ខេត្តព្រះវិងហារ នាថ្ងៃទី២៣ ខែកុម្ភៈ ដែលការលើកផ្ទាំងប៉ាណូនេះ ក្រោមការចូលរួមឧបត្ថម្ភគាំទ្រ ពីលោកឧកញ៉ា វាន់ស៊ូអៀង។
លោកថ្លែងថា៖«ក្នុងនាមសម្តេចតេជោនាយករដ្ឋមន្រ្តី[ហ៊ុន សែន] និងជាប្រធានអាជ្ញាធរមីន ខ្ញុំសូមអំពាវនាវឱ្យបងប្អូនប្រជាពលរដ្ឋទាំងអស់ មិនត្រូវប្រថុយប្រថានចូលទៅតំបន់ដែលមិនស្គាល់ទីតាំងភូមិសាស្រ្តច្បាស់លាស់ក្នុងបំណងណាមួយ ដូចជាប្រើប្រាស់ដី រុករកអនុផលព្រៃឈើ ធ្វើដំណើរឆ្លងកាត់ មិនត្រូវប៉ះពាល់គ្រាប់មីន គ្រាប់បែកចង្កោម និងសំណល់ជាតិផ្ទុះពីសង្គ្រាមជាដាច់ខាត»។
លោកក៏បានរំឭកដល់ពលរដ្ឋទាំងអស់ត្រូវរាយការណ៍ជូនអាជ្ញាធរមូលដ្ឋាន មេឃុំ មេភូមិ ប្រតិបត្តិករបោសសម្អាតមីន ឬសមត្ថកិច្ចនគរបាលជាបន្ទាន់ នៅពេលបានឃើញ បានដឹង ពីកន្លែងមានមីន និងសំណល់ជាតិផ្ទុះពីសង្គ្រាម។ ជាមួយគ្នានោះ លោក លី ធុជ បានថ្លែងអំណរគុណ និងវាយតម្លៃខ្ពស់ចំពោះទឹកចិត្តប្រកបដោយសប្បុរសរបស់លោកឧកញ៉ា វាន់ ស៊ូអៀង ដែលបានចូលរួមជាមួយរាជរដ្ឋាភិបាលកម្ពុជា ក្នុងការផ្សព្វផ្សាយការយល់ដឹងអំពីមីន និងការកាត់បន្ថយអត្រាគ្រោះថ្នាក់ដោយសារមីន និងយុទ្ធភណ្ឌមិនទាន់ផ្ទុះនៅកម្ពុជា។
លោកថា ទោះបីមានកិច្ចខិតខំប្រឹងប្រែង លើការងារបោសសម្អាតមីននិងគ្រាប់មិនទាន់ផ្ទុះយ៉ាងណាក៏ដោយ ក៏គ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាមនៅតែមានជាប្រចាំ ដោយកត្តាមួយចំនួន រួមមាន ការលេង ឬច្នៃគ្រាប់ ឈរមើលគេលេងគ្រាប់ សម្អាតដីធ្វើកសិកម្ម ចូលព្រៃកាប់ឈើ រកស្បៀងអាហារ ធ្វើកសិកម្ម ដោះមីនក្រៅផ្លូវការ ដុតព្រៃ និងធ្វើដំណើរឆ្លងកាត់តំបន់មិនស្គាល់ច្បាស់ ជាដើម។
លោកទេសរដ្ឋមន្ត្រី ប្រាប់ភ្នំពេញប៉ុស្តិ៍នៅថ្ងៃទី២៤ កុម្ភៈថា ការលើកផ្ទាំងប៉ាណូនៅស្រុកជាំក្សាន្ត នៃខេត្តព្រះវិហារនេះ ដោយសារតែទីនោះមានអ្នករងគ្រោះដោយសារគ្រាប់មីនខ្ពស់ជាងគេនៅខេត្តព្រះវិហារ ហើយទីនោះក៏មានចម្ការមីនច្រើនជាងគេផងដែរ។
លោកថ្លែងថា៖«យើងលើកនៅហ្នឹង ដើម្បីជានិមិត្តរូប ដែលមានគ្រោះថ្នាក់ច្រើនជាងគេនៅខេត្តព្រះវិហារ ហើយគោលដៅនៃការលើកផ្លាកហ្នឹងគឺដូចយើងដាក់សញ្ញាគ្រោះថ្នាក់ចរាចរណ៍អ៊ីចឹង។ ការដាក់ហ្នឹង គឺឱ្យប្រជាជនគាត់ឃើញ ហើយប្រុងប្រយ័ត្ន យើងដាក់លេខទូរស័ព្ទ ដែលត្រូវទាក់ទង សម្រាប់ងាយស្រួលដល់ពលរដ្ឋទាក់ទងពេលគាត់ឃើញគ្រាប់រំសេវ»។
បើតាមលោកលី ធុជ ស្រុកជាំក្សាន្ត គឺជាអតីតសមរភូមិ និងជាស្រុករងផលប៉ះពាល់ខ្ពស់ជាងគេ ដោយសារមីននិងសំណល់ជាតិផ្ទុះពីសង្រ្គាមនៅខេត្តព្រះវិហារ។ គិតត្រឹមឆ្នាំ២០២១ ផ្ទៃដីមានមីននិងគ្រាប់មិនទាន់ផ្ទុះនៅស្រុកជាំក្សាន្តប្រមាណជាង១១២គីឡូម៉ែត្រក្រឡាស្មើនឹង៧៨% នៃផ្ទៃដីទូទាំងខេត្តព្រះវិហារប្រមាណ ១៤៣គីឡូម៉ែត្រក្រឡា ត្រូវបានបោសសម្អាតរួច ដោយបានរកឃើញ និងកម្ទេចចោលមីនប្រឆាំងមនុស្សចំនួន២៤ ៨២៧គ្រាប់ មីនតោនចំនួន២៤១គ្រាប់ និងសំណល់ជាតិផ្ទុះពីសង្គ្រាមចំនួន៤៤ ០១៥គ្រាប់។
លោកបញ្ជាក់ថា៖«ស្រុកជាំក្សាន្ត មានអត្រាគ្រោះថ្នាក់ខ្ពស់ជាងគេក្នុងខេត្តព្រះវិហារ មានជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាមសរុប១ ៣១៨នាក់ ក្នុងនោះដោយសារមីនមានចំនួន១០៤២នាក់ ស្មើនឹង ៤៤% នៃជនរងគ្រោះទូទាំងខេត្តព្រះវិហារដែលមានជនរងគ្រោះចំនួន២ ៩៩៥នាក់»។
ក្នុងខែមករា ឆ្នាំ២០២២នេះ ស្រុកជាំក្សាន្ត បានរងនូវសោកនាដកម្មយ៉ាងរន្ធត់ មានគ្រោះថ្នាក់ចំនួន២ករណីបានកើតឡើងក្នុងថ្ងៃតែមួយ គឺ ថ្ងៃទី១០ នៅភូមិសែនតេជៈ ឃុំមរកត ស្រុកជាំក្សាន្ត បណ្តាលឱ្យស្លាប់៤នាក់ និងរងរបួស២នាក់។ ករណីទី១ គ្រោះថ្នាក់ដោយសារមីនតោន បណ្តាលឱ្យអ្នកដោះមីននៃអង្គការដោះមីនកម្ពុជាបាត់បង់ជីវិតចំនួន៣នាក់ និងរងរបួសចំនួន២នាក់។ ទី២ គ្រោះថ្នាក់ដោយសារយុទ្ធភណ្ឌមិនទាន់ផ្ទុះ បណ្តាលឱ្យនាយទាហាននៃកងពលតូចអន្តរាគមន៍លេខ៩ ចំនួន១នាក់បាត់បង់ជីវិត។ នេះបើតាមការបញ្ជាក់បន្ថែមពីលោកលី ធុជ។
លោកវុធ ដារ៉ា អភិបាលស្រុកជាំក្សាន្ត ថ្លែងនៅថ្ងៃទី២៤ ខែកុម្ភៈថា កន្លងមក អាជ្ញាធរបានយកចិត្តទុកដាក់អប់រំ ផ្សព្វផ្សាយជូនដល់ប្រជាពលរដ្ឋឱ្យយល់ដឹងអំពីគ្រោះថ្នាក់ដោយសារគ្រាប់មីន និងគ្រាប់មិនទាន់ផ្ទុះជាបន្តបន្ទាប់។ ប៉ុន្តែទោះយ៉ាងណានៅតែមានករណីគ្រោះថ្នាក់កើតឡើងជាបន្តបន្ទាប់។ ហេតុនេះ ការលើកផ្ទាំងប៉ាណូផ្សព្វផ្សាយនេះ គឺដើម្បីពញ្ញាក់ស្មារតីបន្ថែមទៀតឱ្យពលរដ្ឋបានដឹងថា នេះជាតំបន់គ្រោះថ្នាក់ដោយគ្រាប់មិនទាន់ផ្ទុះ ត្រូវមានការប្រុងប្រយ័ត្ន។
លោកថ្លែងថា៖«លើកប៉ាណូអប់រំ ផ្សព្វផ្សាយពន្យល់អប់រំ ដល់ប្រជាពលរដ្ឋឱ្យដឹងថា តំបន់ហ្នឹង គឺជាតំបន់ប្រឈមមានមីនមិនទាន់ផ្ទុះ កាកសំណល់អាវុធជាតិផ្ទុះមិនទាន់ផ្ទុះ ឱ្យមានការប្រុងប្រយ័ត្ន។ ព្រោះវាមិនឈប់ឈរសោះទៅហើយ ចេះតែឭទីនេះទីនោះ ស្លាប់តែរហូត។ អ៊ីចឹងផ្ទាំងនេះដូចប្រកាសអាសន្នអ៊ីចឹង ថាឱ្យយើងដឹង និងប្រយ័ត្នពេលចូលតំបន់ហ្នឹង មុនធ្វើអីត្រូវទាក់ទងស៊ីម៉ាក់ឱ្យគេពិនិត្យសិន»៕