.jpg)
កូនចៅប្រជាពលរដ្ឋក្នុងសហគមន៍ទទួលបានអាហាររូបករណ៍ពីគម្រោងរេដបូកភ្នំក្រវាញ ទៅសិក្សាថ្នាក់ឧត្តមសិក្សានៅរាជធានីភ្នំពេញ។ រូបថត ហ្វេសប៊ុក
ភ្នំពេញៈ គម្រោងរេដបូកតំបន់ជួរភ្នំក្រវាញរបស់ក្រសួងបរិស្ថានដែលគាំទ្រដោយអង្គការសម្ព័ន្ធមិត្តសត្វព្រៃ Wildlife Alliance កំពុងមានការចូលរួមយ៉ាងផុលផុសពីប្រជាពលរដ្ឋចំនួន ២៩សហគមន៍ ឬប្រមាណ ៤ ០០០ គ្រួសារ នៅក្នុងតំបន់ជួរភ្នំក្រវាញ។ នេះបើយោងតាមការផ្សព្វផ្សាយរបស់អង្គការសម្ព័ន្ធមិត្តសត្វព្រៃ។
នៅក្នុងរបាយការណ៍មួយដែលបានចេញផ្សាយកាលពីថ្ងៃទី២២ ខែកុម្ភៈ អង្គការនេះបានលើកឡើងថា តាមរយៈគម្រោង រេដបូក ប្រជាសហគមន៍ បានចូលរួមយ៉ាងសកម្ម ក្នុងកិច្ចការពារ ធនធានធម្មជាតិ និង បរិស្ថាន ដោយពួកគាត់បានផ្លាស់ទម្លាប់ពីការកាប់ព្រៃឈើ ចិញ្ចឹមជីវិត មកការពារព្រៃឈើ សត្វព្រៃនិងបរិស្ថាន ដើម្បីទាញយកផលប្រយោជន៍ ពីធម្មជាតិ មកផ្គត់ផ្គង់ជីវភាពគ្រួសារវិញ។
របាយការណ៍នេះថា៖ «អង្គការសម្ព័ន្ធមិត្តសត្វព្រៃមានមោទនៈភាពក្នុងការអនុវត្តគម្រោងរេដបូកតំបន់ជួរភ្នំក្រវាញជាការច្នៃប្រឌិតដ៏មានប្រសិទ្ធភាពមួយដើម្បីគ្រប់គ្រងអាកាសធាតុពិភពលោកក៏ដូចជាបង្កើតឱកាសជីវភាពរស់នៅតំបន់ជួរភ្នំក្រវាញផងដែរ»។
បើតាមអង្គការសម្ព័ន្ធមិត្តសត្វព្រៃ គម្រោងរេដបូក តំបន់ជួរភ្នំក្រវាញ បានផ្ដល់អាហារូបករណ៍ដល់សិស្សក្នុង សហគមន៍ ឲ្យបន្តការសិក្សា នៅមហាវិទ្យាល័យទៀតផងដើម្បីយកចំណេះដឹងទាំងនោះ មកអភិរក្ស មូលដ្ឋាន នឹងខ្លួនឲ្យប្រសើរថែមទៀតផង។
នៅក្នុងតំបន់ ជួរភ្នំក្រវាញ ប្រជាពលរដ្ឋ នៅតាមសហគមន៍មូលដ្ឋានបានពង្រឹងការយល់ដឹង លើការគ្រប់គ្រង ធនធានធម្មជាតិ និងការលើកកម្ពស់ជីវភាពរស់នៅ តាមរយៈ ជម្រើសផ្សេងៗ ក្រៅពីការពឹងផ្អែក លើព្រៃឈើជារបរចិញ្ចឹមជីវិត យ៉ាងសមរម្យ ប្រសើរជាងមុន ដែលពឹងផ្អែក តែលើការ បរបាញ់សត្វព្រៃនិងកាប់ព្រៃឈើ តែប៉ុណ្ណោះ។
នៅក្នុងតំបន់ជួរភ្នំក្រវាញ ប្រជាពលរដ្ឋនៅតាមសហគមន៍មូលដ្ឋានបានពង្រឹងការយល់ដឹងលើការគ្រប់គ្រងធនធានធម្មជាតិ និងការលើកកម្ពស់ជីវភាពរស់នៅតាមរយៈជម្រើសផ្សេងក្រៅពីការពឹងផ្អែកលើព្រៃឈើជារបរចិញ្ចឹមជិវិត។
លោកស្រី កុយ ឡាយ ប្រជាសហគមន៍អេកូទេសចរណ៍ជីផាត នៅឃុំជីផាតស្រុកថ្មបាំង ខេត្តកោះកុង បានប្រាប់ភ្នំពេញប៉ុស្តិ៍ថា ក្រោយបង្កើតជាសហគមន៍និងមានការណែនាំពីសំណាក់អង្គការ មន្ត្រីពាក់ព័ន្ធនានាប្រជាពលរដ្ឋស្ទើរទាំងអស់នៅក្នុងសហគមន៍អ្នកស្រី បានបញ្ឈប់សកម្មភាពកាប់បំផ្លាញព្រៃឈើនិងបរបាញ់សត្វព្រៃ។
អ្នកស្រីថា៖ «កាលពីមុនប្រជាពលរដ្ឋក្នុងសហគមន៍យើងខ្ញុំ ភាគច្រើននាំគ្នាចូលកាប់ព្រៃ និងបរបាញ់សត្វព្រៃ សម្រាប់ទ្រទ្រង់ជីវភាព ប៉ុន្តែឥឡូវនេះ ពួកយើងបាននាំគ្នាប្ដូរមុខរបរមកនាំភ្ញៀវដើរកម្សាន្តមើលព្រៃកោងកាង និងទស្សនាសត្វព្រៃវិញ ហើយការងារនេះធ្វើឲ្យជីវភាពពួកយើងល្អប្រសើរជាងមុន»។
អ្នកស្រី កុយ ឡាយ ថ្លែងដោយ គំនិតសុទិដ្ឋិនិយមថា គម្រោងនេះជាកម្មវិធីមួយជួយទ្រទ្រង់បន្ថែមទៀតដល់ជីវភាពប្រជាពលរដ្ឋនៅក្នុងសហគមន៍របស់អ្នកស្រី និងសហគមន៍ផ្សេងទៀតក្នុងតំបន់ជួរភ្នំក្រវាញទាំងមូល។
អ្នកស្រីថ្លែងថា៖«ថ្មីៗនេះមានកូនចៅរបស់អ្នកភូមិយើងម្នាក់ត្រូវបានអង្គការសម្ព័ន្ធមិត្តសត្វព្រៃ ដែលជាដៃគូរបស់ក្រសួងបរិស្ថាន ផ្ដល់អាហារូបករណ៍ថ្នាក់ឧត្តមសិក្សា៤ឆ្នាំ។ យើងរីករាយណាស់ នៅពេលគម្រោងនេះ បានផ្ដល់ក្ដីសង្ឃឹមដល់សហគមន៍យើងតាមមធ្យោបាយជាច្រើនបែបនេះ»។
អ្នកស្រី ជុំ សុកប ប្រធានស្ដីទីសហគមន៍អេកូទេសចរណ៍ធម្មជាតិតាតៃក្រោម បានប្រាប់ភ្នំពេញប៉ុស្តិ៍ថា គម្រោងរេដបូក តំបន់ជួរភ្នំក្រវាញ បានផ្ដល់ក្ដីសង្ឃឹមថ្មីមួយទៀត ដល់ប្រជាពលរដ្ឋក្នុងសហគមន៍ ក្នុងការធ្វើឲ្យប្រសើរឡើងនូវគុណភាពនៃជីវភាពរស់នៅ តាមរយៈការនាំភ្ញៀវទស្សនាព្រៃ និង សត្វព្រៃ ដ៏សម្បូរបែបក្នុងតំបន់ជួរភ្នំក្រវាញ។
អ្នកស្រីថ្លែងថា៖«តាមរយៈគម្រោងរេដបូកសហគមន៍យើងកាន់តែមានទំនុកចិត្តទៅលើការប្រកបអាជីវកម្មបំរើសេវាអេកូរទេសចរណ៍ ព្រោះគម្រោងនេះ មិនគ្រាន់តែធ្វើឲ្យប្រសើរឡើងនូវគុណភាព អាកាសធាតុទេ ថែមទាំងធ្វើឲ្យយើងកាន់តែចូលចិត្ត និងស្រឡាញ់ធនធានធម្មជាតិ ព្រៃឈើ សត្វព្រៃ ជីវចម្រុះ និងបរិស្ថានក្នុងតំបន់របស់យើងទាំងមូល»។
អ្នកស្រី សុកប ថា ចាប់តាំងពីមានការរាត្បាតជំងឺកូវីដ១៩មក ប្រាក់ចំណូលពីការដឹកនាំភ្ញៀវទេសចរបានថយចុះប្រមាណ៥០ភាគរយក្នុងមួយថ្ងៃ ដោយបច្ចុប្បន្ន មានភ្ញៀវទេសចរជាមធ្យម ក្នុង១ថ្ងៃមប្រមាណ១០០នាក់ប៉ុណ្ណោះ ដែលបានចូលមកទស្សនាទេសភាពនិង វប្បធម៌ប្រពៃណី របស់សហគមន៍របស់អ្នកស្រី។
សូមបញ្ជាក់ថាគម្រោង រេដបូកតំបន់ជួរភ្នំក្រវាញដែលគាំទ្រដោយអង្គការសម្ព័ន្ធមិត្តសត្វព្រៃជាគម្រោងមួយដែលបានការពារព្រៃទឹកភ្លៀងត្រូពិចចំនួន ៤៩៧.០០០ ហិកតាដោយការពារការបញ្ចេញឧស្ម័នកាបូនជាង ៣ លានតោនក្នុងមួយឆ្នាំៗដែលស្មើនឹងមួយភាគប្រាំនៃការបញ្ចេញឧស្ម័នកាបូនឌីអុកស៊ីតប្រចាំឆ្នាំនៅប្រទេសកម្ពុជា៕
