.jpg)
កិច្ចប្រជុំអន្តរក្រសួង ដឹកនាំដោយរដ្ឋមន្ត្រីក្រសួងបរិស្ថាន នៅថ្ងៃទី២៤កុម្ភៈ។ រូបថត ក្រសួងបរិស្ថាន
ភ្នំពេញៈ រដ្ឋមន្ត្រីក្រសួងបរិស្ថាន លោក សាយ សំអាល់ នៅថ្ងៃទី២៤ កុម្ភៈ បានដឹកនាំកិច្ចប្រជុំអន្តរក្រសួង ពិនិត្យលើការសិក្សា និងចងក្រងឯកសារទីតាំងដីនៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ដែលពលរដ្ឋប្រើប្រាស់ និងអាស្រ័យផលជាក់ស្តែងយូរឆ្នាំ នៅតាមបណ្ដាខេត្ដ ខណៈខេត្ដមួយចំនួន បានបញ្ចប់ការវាស់វែង និងកំពុងដាក់ឯកសារជូនរដ្ឋាភិបាលពិនិត្យសម្រេច។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ថ្លែងប្រាប់ភ្នំពេញប៉ុស្ដិ៍ នៅថ្ងៃទី២៤ កុម្ភៈថា កិច្ចប្រជុំអន្តរក្រសួងនេះ បានពិនិត្យ លើការសិក្សា និងចងក្រងឯកសារ ទីតាំងដី នៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ដែលប្រជាពលរដ្ឋបានប្រើប្រាស់ និងអាស្រ័យផលជាក់ស្តែងយូរឆ្នាំ នៅក្នុងភូមិសាស្ត្រខេត្តកំពង់ធំ សៀមរាបព្រះវិហារ ត្បូងឃ្មុំ និង ឧត្តរមានជ័យ។
លោកថ្លែងថា កិច្ចប្រជុំអន្តរក្រសួងនេះ មានការចូលរួមពីតំណាងស្ថាប័នរដ្ឋសភា និងព្រឹទ្ធសភា ថ្នាក់ដឹកនាំតំណាងក្រសួង ស្ថាប័ន អភិបាលនៃគណៈអភិបាលខេត្ត ស្រុក និងមេឃុំ នៃខេត្តពាក់ព័ន្ធផងដែរ។
លោក ភក្ត្រា ថ្លែងថា៖«លទ្ធផលនៃកិច្ចប្រជុំ គឺយើងបន្តការសិក្សាបន្ថែមទៀត ហើយពិនិត្យមើលលើកិច្ចការងារមួយចំនួនដែលនៅសេសសល់ ដែលយើងត្រូវបន្តធ្វើ»។
លោក ងួត រតនៈ អភិបាលនៃគណៈអភិបាលខេត្ត កំពង់ធំ ថ្លែងនៅថ្ងៃទី២៤ កុម្ភៈថា រដ្ឋបាលខេត្ដកំពង់ធំ តាមរយៈការអនុវត្ដការងារជាមួយក្រុមការងារអន្តរក្រសួងប្រមាណ ២ ឆ្នាំកន្លងមក ស្ដីពីការពិនិត្យ សិក្សា និងចងក្រងឯកសារទីតាំងដីនៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ដែលពលរដ្ឋប្រើប្រាស់ និងអាស្រ័យផលជាក់ស្តែងយូរឆ្នាំ មកដល់បច្ចុប្បន្ន គឺបានបញ្ចប់រួចរាល់ លើកិច្ចការងារនេះ និងបានដាក់ឯកសារជូនរាជរដ្ឋាភិបាល ដើម្បីពិនិត្យ និងសម្រេច។
លោកថ្លែងថា៖«យើងបានចូលរួមប្រជុំព្រឹកមិញ (ថ្ងៃទី២៤ កុម្ភៈ)ដែលដឹកនាំដោយឯកឧត្ដមរដ្ឋមន្ដ្រីក្រសួងបរិស្ថាន និងក្រសួងស្ថាប័នពាក់ព័ន្ធ ហើយសម្រាប់ខេត្ដកំពង់ធំយើង គឺយើងបានសម្រេចទិន្នន័យបឋមហើយ យើងបានចងក្រងជាព័ត៌មានចំនួនគ្រួសារ ទីតាំង និងផ្ទៃដី ដែលប្រជាពលរដ្ឋបានអាស្រ័យផលជាក់ស្ដែងរួចហើយ និងបានធ្វើលិខិតជូនក្រសួងបរិស្ថានរួចរាល់ហើយ នេះសម្រាប់តំបន់ដែលគ្រប់គ្រងដោយក្រសួងបរិស្ថាន»។
លោក ងួន រតនៈ បានឱ្យដឹងថា ក្នុងភូមិសាស្ដ្រខេត្ដកំពង់ធំ មានទិដ្ឋភាពចំនួន ៣ ទាក់ទងនឹងការពិនិត្យ សិក្សា និងចងក្រងឯកសារទីតាំងដី នៅក្នុងតំបន់ការពារធម្មជាតិនិងរបៀងអភិរក្សជីវៈចម្រុះ ដែលពលរដ្ឋប្រើប្រាស់ និងអាស្រ័យផលជាក់ស្តែងយូរឆ្នាំនេះ។
ក្នុងនោះមានទីតាំងដែលពលរដ្ឋរស់នៅ តំបន់កម្របព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ តំបន់ការពារធម្មជាតិនិងរបៀងអភិរក្សជីវៈចម្រុះក្រប់គ្រងដោយក្រសួងបរិស្ថាន និងតំបន់ដែនទន្លេសាបមួយផ្នែក។
លោកថ្លែងថា៖«សម្រាប់តំបន់ការពារធម្មជាតិ និងរបៀងអភិរក្សជីវៈចម្រុះ ដែលក្រប់គ្រងដោយក្រសួងបរិស្ថានមានប្រជាពលរដ្ឋរស់នៅប្រមាណ ១៥ ០០០ គ្រួសារ ក្រៅពីនេះ នៅមានពលរដ្ឋនៅតំបន់គ្រប់គ្រងដោយក្រសួងកសិកម្ម និងតំបន់ទន្លេសាបទៀត។ ខ្ញុំមិនចាំតួលេខសរុបទេ ប៉ុន្ដែយើងបានធ្វើរួចដែរហើយ»។
លោកស្រី មិន ធារី អភិបាលរង ខេត្ដឧត្ដរមានជ័យ ក៏បានឱ្យដឹងនៅថ្ងៃទី២៤ កុម្ភៈដែរថា រដ្ឋបាលខេត្ដឧត្ដរមានជ័យក៏បានធ្វើរួចរាល់ហើយដែរ លើការសិក្សា និងចងក្រងឯកសារទីតាំងដីនៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះរួមនឹងតំបន់ផ្សេងទៀត ដែលពលរដ្ឋប្រើប្រាស់ និងអាស្រ័យផលជាក់ស្តែងយូរឆ្នាំមកហើយ។
លោកស្រីបានថ្លែងថា៖«កិច្ចប្រជុំព្រឹកមិញ ជាកិច្ចប្រជុំលើកទី២ហើយ ជាមួយគណៈកម្មការ ពិនិត្យលើការសិក្សា និងចងក្រងឯកសារ ទីតាំងដីនៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ដែលពលរដ្ឋប្រើប្រាស់ និងអាស្រ័យផលជាក់ស្តែងយូរឆ្នាំ។ យើងបានទិន្នន័យជាក់លាក់ ច្បាស់លាស់រួចរាល់ហើយ ទើបបានយកមកប្រជុំនៅថ្នាក់អន្តរក្រសួងនេះប៉ុន្ដែការសម្រេចគឺយើងរងចាំលើរាជរដ្ឋាភិបាល ក្នុងការសម្រេច»។
លោកស្រី មិន ធារី បានឱ្យដឹងថា ក្រុមការងារអន្តរក្រសួង និងក្រុមការងាររដ្ឋបាលខេត្ដ បានចុះវាស់វែងក្បាលដីដែលប្រជាពលរដ្ឋរស់នៅអាស្រ័យផលជាក់ស្ដែង បានរួចរាល់អស់ហើយ ដោយបានអនុវត្ដរយៈពេលប្រមាណ ២ ឆ្នាំ ដោយបានវាស់វែងតំបន់ដែលត្រូវកាត់ឆ្វៀល ស្ថិតនៅក្នុងស្រុកចំនួន៣ គឺស្រុកបន្ទាយអំបិល ស្រុកអន្ទង់វែង និងស្រុកត្រពាំងប្រាសាទ ដែលមានផ្ទៃដីត្រូវកាត់ឆ្វៀលប្រមាណ ១៥ ០០០ ម៉ឺនហិកតា៕
