ភ្នំពេញៈ នៅក្នុងឆ្នាំ ២០២១ កន្លងមកនេះ ជំងឺគ្រុនឈាមត្រូវបានរកឃើញថា កើតមានជិត ២ ០០០ ករណី ខណៈចំនួនអ្នកស្លាប់ទូទាំងប្រទេសមាន ៨ ករណី ហើយបើប្រៀបធៀបនឹងឆ្នាំ ២០២០ គឺករណីឈឺបានថយចុះ ៩៨,៤ ភាគរយ ចំណែកចំនួនអ្នកស្លាប់បានថយចុះ ៥០ ភាគរយ។
តួលេខនៃការរកឃើញជំងឺគ្រុនឈាមនេះ ត្រូវបានប្រកាសនៅក្នុងសន្និបាតបូកសរុបការងារឆ្នាំ ២០២១ និងទិសដៅការងារឆ្នាំ ២០២២ របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រនៅខេត្តសៀមរាបកាលពីថ្ងៃទី ២២ ខែកុម្ភៈ ឆ្នាំនេះ។
មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្របានឱ្យដឹងថា៖ «ឆ្នាំ ២០២១ មានចំនួន ១ ៩០៣ ករណី ដែលមានអត្រាអាំងស៊ីដង់ ១២ ករណីក្នុងចំណោមប្រជាជន ១០០ ពាន់នាក់ និងស្លាប់ចំនួន ៨ ករណីដែលមានអត្រាស្លាប់ ០,៤ ភាគរយ។ បើប្រៀបធៀបនឹងឆ្នាំ ២០២០ គឺករណីឈឺ បានថយចុះ ៩៨,៤ ភាគរយ ដោយឆ្នាំ ២០២០ មាន ១១ ៩៧៧ ករណី និងចំនួនអ្នកស្លាប់បានថយចុះ ៥០ ភាគរយដោយឆ្នាំ ២០២០ មាន ១៦ ករណី»។
មជ្ឈមណ្ឌលនេះបានឱ្យដឹងបន្តថា សម្រាប់ភូមិសាស្ត្រដែលករណីគ្រុនឈាមកើតច្រើនជាងគេក្នុងឆ្នាំ ២០២១ មានរាជធានីភ្នំពេញ ខេត្តកណ្តាល តាកែវ កំពង់ស្ពឺ កំពង់ចាម និងត្បូងឃ្មុំ ខណៈវីរុសនៃជំងឺគ្រុនឈាមនេះត្រូវបានរកឃើញច្រើនជាងគេគឺមានប្រភេទ DNV-2 ចំនួន ៧៨ ភាគរយ ដែលផ្លាស់ប្តូរពី ៥ ឆ្នាំកន្លងទៅរកឃើញច្រើនជាងគេគឺប្រភេទ DNV-1។
មជ្ឈមណ្ឌលបានបញ្ជាក់ថា «សរុបមកការអនុវត្តយុទ្ធសាស្ត្រជាតិប្រយុទ្ធនឹងគ្រុនឈាមឆ្នាំ ២០១៣-២០២១ គឺការងារគ្រប់គ្រង និងប្រយុទ្ធនឹងជំងឺគ្រុនឈាមបានទទួលនូវលទ្ធផលជោគជ័យទាំងសូចនាករអត្រាអាំងស៊ីដង់ករណីជំងឺទាបជាង ១២,១ ក្នុងចំណោមប្រជាជន ១០០ ពាន់នាក់ និងអត្រាស្លាប់ទាបជាង ០,២ ភាគរយ ដែលបានគ្រោងទុកសម្រាប់ឆ្នាំ ២០២១ បានន័យថា បានរក្សាស្ថានភាពជំងឺឱ្យស្ថិតនៅក្នុងស្ថានភាពធម្មតា (Endemicity) ពេញ ១ ឆ្នាំ»។
សូមជម្រាបថា សម្រាប់ឆ្នាំនេះកម្មវិធីជាតិប្រយុទ្ធនឹងជំងឺគ្រុនឈាមបានត្រៀមថ្នាំអាបែត ១៦០ តោន ថ្នាំបាញ់មូស ៦ ០០០ លីត្រ និងសេរ៉ូម ៦៩ ០០០ ដបសម្រាប់ការផ្គត់ផ្គង់បែងចែកបន្តដើម្បីបង្កើនប្រសិទ្ធភាពគ្រប់គ្រងឆ្លើយតបស្ថានភាពជំងឺគ្រុនឈាម និងភ្នាក់ងារចម្លងពិសេសអត្រាគ្របដណ្តប់ភាជន៍ទឹកប្រើប្រាស់ដោយដាក់ថ្នាំអាបែត ៩០% យ៉ាងតិច។
លោក ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្របានថ្លែងថាទន្ទឹមនឹងសមិទ្ធផលទទួលបាននេះ មជ្ឈមណ្ឌលក៏មានជួបនូវបញ្ហាប្រឈមមួយចំនួនដែលជះឥទ្ធិពលដល់កម្មវិធីជាតិប្រយុទ្ធនឹងជំងឺនេះផងដែរ។
បញ្ហាប្រឈមនោះលោកបានឱ្យដឹងថា៖ «វិបត្តិជំងឺកូវីដ ១៩ បានជះឥទ្ធិពលដល់កម្មវិធីទាំងនេះ ហើយការគ្រប់គ្រងភ្នាក់ងារចម្លងជំងឺគ្រុនឈាមដោយថ្នាំបាណកឃាត (Larvicide) នៅមានកម្រិតព្រោះអត្រាគ្របដណ្តប់តាមភាជន៍ទឹក (water containers) មិនទាន់បាន ១០០ ភាគរយនៅឡើយ»។
ជាងនេះទៅទៀត លោកបានឱ្យដឹងដែរថា សកម្មភាពប្រជាជនចូលរួមមិនទាន់ពេញលេញក្នុងការបង្ការជំងឺគ្រុនឈាម តាមរយៈការគ្រប់គ្រងសម្ភារស្តុកទឹក ឬដក់ទឹក ពិសេសសម្បកកង់ដែលប្រើរួចបានដក់ទឹកជាកត្តាអំណោយផលខ្លាំងដល់មូសខ្លាជាភ្នាក់ងារចម្លង។
លោកបានបញ្ជាក់ថា៖ «ប្រជាជនខ្លះនៅនិយមស្វែងរកសេវាថែទាំសុខភាពឯកជនមុនទៅរកសេវារបស់រដ្ឋ ជួនពេលសេវាឯកជនខ្លះមិនមានជំនាញធ្វើរោគវិនិច្ឆ័យថែទាំព្យាបាលជំងឺគ្រុនឈាម ជាហេតុជំរុញឱ្យអ្នកជំងឺវិវឌ្ឍទៅធ្ងន់ធ្ងរ និងខ្លះស្លាប់ បន្ទាប់ពីយឺតយ៉ាវពេលវេលាបញ្ជូនទៅដល់សេវារដ្ឋលើសពី ៧២ ម៉ោង»។
យ៉ាងណាក្ដី លោក ហ៊ុយ រ៉េកុល បានអះអាងថា សម្រាប់កម្មវិធីប្រយុទ្ធនឹងជំងឺគ្រុនឈាមក្នុងឆ្នាំនេះ មជ្ឈមណ្ឌលនឹងបន្តពង្រឹងការអនុវត្តយុទ្ធសាស្ត្រជាតិ ដើម្បីទទួលបាននូវសូចនាករអត្រាឈឺធ្លាក់ចុះច្រើនជាង ២០ ភាគរយ និងអត្រាស្លាប់ទាបជាង ០,១៥ ភាគរយ៕