ភ្នំពេញៈ រដ្ឋបាលរាជធានីបន្តអំពាវនាវឱ្យក្រុមអ្នកតវ៉ាដែលជាអតីតបុគ្គលិកក្រុមហ៊ុនណាហ្គាវើលដ៍ សហការ និងអនុវត្តវិធានការសុខភាពដើម្បីចៀសវាងការចម្លងជំងឺកូវីដ ១៩ ដែលប្រឈមនឹងវិធានការច្បាប់ បន្ទាប់ពីមានការប៉ះទង្គិចគ្នាក្នុងអំឡុងពេលអ្នកតវ៉ាបានប្រមូលផ្តុំគ្នាតវ៉ាជាថ្មីទៀត។
កាលពីថ្ងៃទី ២១ និង ២២ ខែកុម្ភៈ មានការប៉ះទង្គិចគ្នារវាងក្រុមអ្នកតវ៉ា និងអាជ្ញាធររាជធានីភ្នំពេញបណ្តាលឱ្យមានការចាប់រុញទាញ និងសែងក្រុមអ្នកតវ៉ាដោយបង្ខំឱ្យចូលទៅក្នុងរថយន្តក្រុង ដើម្បីនាំយកពួកគេទៅមណ្ឌលធ្វើចត្តាឡីស័កជំងឺកូវីដ ១៩ រាជធានីភ្នំពេញ។
សកម្មភាពទាំងនេះបានធ្វើឡើងអំឡុងពេលអតីតបុគ្គលិកក្រុមហ៊ុនណាហ្គាវើលដ៍បានប្រមូលផ្តុំគ្នាតវ៉ាជាថ្មីនៅក្បែរក្រុមហ៊ុនក្នុងខណ្ឌចំការមនក្រោយពួកគេអះអាងថា បានបញ្ចប់ការធ្វើចត្តាឡីស័កហើយការប្រមូលជាថ្មីនេះគឺដើម្បីទាមទារឱ្យមានការដោះលែងសហជីព ១១ នាក់ និងទទួលយកកម្មករជាង ៣០០ នាក់ ចូលធ្វើការវិញ។
រដ្ឋបាលរាជធានីភ្នំពេញបានលើកឡើងនៅក្នុងសេចក្តីជូនដំណឹងរបស់ខ្លួនថា បាតុករដែលបាននាំទៅមណ្ឌលចត្តាឡីស័កទាំងនោះគឺមានចរិតរឹងរូស ច្រងេងច្រងាង មិនសហការជាមួយក្រុមគ្រូពេទ្យដើម្បីផ្ទៀងផ្ទាត់ឈ្មោះជាមួយក្រុមបាតុករប្រមាណ ៣០០ នាក់ ដែលមិនទាន់បានយកសំណាកនៅកោះពេជ្រ។
រដ្ឋបាលរាជធានីភ្នំពេញបានលើកឡើងបន្តថា មនុស្ស ១ ក្រុមតូចនោះបានសន្សំចិត្ត ណែនាំឱ្យក្រុមបាតុករបង្កើតឈុតឆាកល្ខោនតាមការគ្រោងទុក ហើយថតរូបភាពសម្រាប់បង្ហោះតាមបណ្តាញសង្គមដើម្បីបំភាន់សាធារណមតិ ដូចករណីនាំគ្នាមិនសម្រាកក្នុងបន្ទប់ដែលរៀបចំជូន បែរជាមកសម្រាកផ្ទាល់ដីនៅខាងក្រៅបន្ទប់ទៅវិញ ដើម្បីសម្តែងដូចជាកម្សត់ វេទនា។ សកម្មភាពទាំងនេះរដ្ឋបាលរាជធានីភ្នំពេញចាត់ទុកថាគឺធ្វើឡើង ដើម្បីឱ្យមហាជនយល់ច្រឡំថាអាជ្ញាធរមានសមត្ថកិច្ច ធ្វើបាប គាបសង្កត់ និងធ្វើទុក្ខបុកម្នេញពួកគាត់ស្របពេលរូបភាពដែលធ្លាប់សម្ដែងកន្លងមក គឺមិនគ្រប់គ្រាន់សម្រាប់មហិច្ឆតារបស់ក្រុមគេឡើយ។
រដ្ឋបាលរាជធានីភ្នំពេញថា៖ «ជាការសោកស្តាយក្រុមបាតុករបានច្រានចោលមិនទទួលយកការរៀបចំផ្តល់ជូនការស្នាក់នៅ ថែមទាំងបានស្រែកឡូឡា បង្កភាពគ្មានសណ្តាប់ធ្នាប់ របៀបរៀបរយនៅក្នុងមណ្ឌល និងរុញចោលនូវសម្ភារសម្រាប់ប្រើប្រាស់ បដិសេធការចូលស្នាក់នៅក្នុងបន្ទប់សម្រាក ព្រមទាំងធ្វើសកម្មភាពបង្កើតព្រឹត្តិការណ៍ដើម្បីបំភាន់សាធារណមតិ ដោយនាំគ្នាប្រមូលផ្ដុំសម្រាកផ្ទាល់ដីនៅក្រៅបន្ទប់ រួចថតរូបភាពធ្វើការផ្សព្វផ្សាយតាមបណ្តាញសង្គមក្នុងន័យទម្លាក់កំហុសមកលើអាជ្ញាធរមានសមត្ថកិច្ច ក៏ដូចជាក្រុមគ្រូពេទ្យប្រចាំការនៅមណ្ឌល»។
ជាមួយនឹងសកម្មភាពទាំងនេះរដ្ឋបាលរាជធានីភ្នំពេញក៏បានព្រមានដែរថារដ្ឋបាលរាជធានីភ្នំពេញ នឹងពិន័យជា ២ ប្រភេទគឺទី ១ ចំពោះអ្នកដែលធ្លាប់ត្រូវបានអប់រំកាលពីថ្ងៃទី ២១ ខែកុម្ភៈ ឆ្នាំ ២០២២ ប្រសិនបើមានវត្តមាននៅក្នុងចំណោមអ្នកទាំង ៥៦ នាក់ នឹងធ្វើការផាកពិន័យទ្វេដងក្នុងករណីមិនរាងចាល។ ចំណែកទី ២ ចំពោះអ្នកដែលមកធ្វើបាតុកម្មថ្មីផ្សេងទៀតនឹងត្រូវពិន័យអន្តរការណ៍ជាប្រាក់ចំនួន ១ លានរៀលក្នុងបាតុករម្នាក់ ស្របតាមវិធានការសុខាភិបាល។
រដ្ឋបាលរាជធានីភ្នំពេញបានបញ្ជាក់ថា៖ «អំពាវនាវដល់ក្រុមបាតុករដែលជាអតីតបុគ្គលិក និងបុគ្គលិកក្រុមហ៊ុន ណាហ្គាវើលដ៍ ដទៃទៀត សូមកុំជឿតាមការអូសទាញរបស់ជនឱកាសនិយមមួយក្តាប់តូច ដើម្បីកេងចំណេញ យករូបភាពសម្រាប់ធ្វើអាជីវកម្មបំពេញមហិច្ឆតារបស់ខ្លួន បែរជាឱ្យក្រុមបាតុករជាអ្នករងគ្រោះទទួលខុសត្រូវ ចំពោះមុខច្បាប់ទៅវិញ។ សូមឱ្យបញ្ឈប់នូវរាល់សកម្មភាពប្រមូលផ្ដុំខុសច្បាប់ផ្ទុយនឹងវិធានការសុខាភិបាល ទោះក្នុងរូបភាពណាមួយក៏ដោយ និងត្រូវចូលរួមសហការជាចាំបាច់ជាមួយអាជ្ញាធរមានសមត្ថកិច្ចពាក់ព័ន្ធក្នុងការអនុវត្តច្បាប់ស្តីពីការធ្វើបាតុកម្មដោយសន្តិវិធី និងវិធានសុខាភិបាលដែលបានដាក់ចេញ»។
ក្នុងរយៈពេល ២ ថ្ងៃអតីតបុគ្គលិក និងអ្នកចូលរួមតវ៉ាប្រមាណ ១០០ នាក់ហើយដែលត្រូវបានសមត្ថកិច្ចបំបែក និងនាំយកទៅមណ្ឌលចត្តាឡីស័ករាជធានីភ្នំពេញក្នុងអំឡុងពេលពួកគេព្យាយាមប្រមូលគ្នានៅក្បែរក្រុមហ៊ុនដោយក្នុងនោះមានអ្នកតវ៉ាចំនួន ៤ នាក់ត្រូវបានរកឃើញថា មានផ្ទុកជំងឺកូវីដ ១៩។ សរុបមកដល់ពេលនេះមានក្រុមអ្នកតវ៉ាប្រមាណជាង ១០០ នាក់ហើយដែលត្រូវបានរកឃើញថា ឆ្លងជំងឺកូវីដជាបន្តបន្ទាប់។
ថ្ងៃទី ២៤ កុម្ភៈ អង្គការសង្គមស៊ីវិល សហគមន៍មូលដ្ឋាន និងសហជីពចំនួន ៥១ ស្ថាប័នបានចេញសេចក្តីថ្លែងការណ៍រួមអំពាវនាវឱ្យអាជ្ញាធរបញ្ឈប់ការរឹតត្បិតសេរីភាព និងបង្កភាពស្រួលឱ្យពួកគេបន្តការតវ៉ាដោយសន្តិវិធី និងប្រើប្រាស់សិទ្ធិជាមូលដ្ឋានរបស់ពួកគេដោយគ្មានការរើសអើង៕
វីដេអូ៖