.jpg)
យុទ្ធានាការបង្ក្រាបជនបរទេសអន្តោប្រវេសន៍ខុសច្បាប់ នាពេលកន្លងទៅ។ រូបថត GDI
ភ្នំពេញៈ ក្រសួងមហាផ្ទៃបានឱ្យដឹងថា បច្ចុប្បន្នមានជនបរទេសអន្តោប្រវេសន៍ជិត ១ ម៉ឺននាក់បន្តស្នាក់នៅខុសច្បាប់នៅកម្ពុជា ដោយមិនបានមកសុំបណ្ណស្នាក់នៅថ្មី ឬសុំបន្តរយៈពេលប្រើប្រាស់ និងបានលើកបញ្ហាប្រឈមជាច្រើនពាក់ព័ន្ធការគ្រប់គ្រងជនបរទេសអន្តោប្រវេសន៍។
ក្នុងពិធីសន្និបាតបូកសរុបការងារឆ្នាំ ២០២១ និងលើកទិសដៅការងារឆ្នាំ ២០២២ របស់ក្រសួងមហាផ្ទៃ កាលពីថ្ងៃទី ២៣ ខែកុម្ភៈ លោក ប៉ោ ភក្តិ អគ្គលេខាធិការនៃអគ្គលេខាធិការដ្ឋានក្រសួងមហាផ្ទៃបានលើកឡើងពីបញ្ហាប្រឈមចំពោះការងារគ្រប់គ្រងជនបរទេសអន្តោប្រវេសន៍នៅកម្ពុជា។
លោកបន្តថា៖ «ក្នុងនោះជនបរទេសអន្តោប្រវេសន៍ចំនួន ៩ ៩២៤ នាក់ មិនបានមកសុំបណ្ណស្នាក់នៅថ្មី ឬសុំបន្តរយៈពេលប្រើប្រាស់ និងជនបរទេសអន្តោប្រវេសន៍គ្រប់អាយុ ១៨ ឆ្នាំមួយចំនួនមិនបានមកសុំបណ្ណស្នាក់នៅតាមច្បាប់កំណត់»។ លោកបន្តថា ពាក់ព័ន្ធករណីនេះ វិធានការដោះស្រាយចំពោះមុខ ខាងអគ្គនាយកដ្ឋានអន្តោប្រវេសន៍បានស្រង់បញ្ជីឈ្មោះជនអន្តោប្រវេសន៍ដែលមិនបានមកសុំបន្តរយៈពេលប្រើប្រាស់ និងស្នើសុំបណ្ណស្នាក់នៅអចិន្រៃ្តយ៍ ផ្ញើជូនស្នងការដ្ឋាននគរបាលរាជធានី-ខេត្ត រួចរាល់ហើយដើម្បីមានវិធានការ។
បន្ថែមពីនេះលោក ប៉ោ ភក្តិ បានស្នើស្នងការនគរបាលរាជធានី ខេត្ត ត្រូវចាត់ឱ្យសមត្ថកិច្ចជំនាញក្រោមឱវាទ កោះហៅមុខសញ្ញាក្នុងបញ្ជីដែលអគ្គនាយកដ្ឋានអន្តោប្រវេសន៍ផ្ញើជូនមកណែនាំឱ្យអនុវត្តត្រឹមត្រូវតាមច្បាប់ ដោយកំណត់រយៈពេលអនុវត្តក្នុងករណីរឹងរូសត្រូវអនុវត្តតាមវិធានការផ្លូវច្បាប់។ នាពិធីនោះ លោកក៏បានជំរុញការចេញប្រកាសអន្តរក្រសួងរវាងក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ស្តីពីការពិន័យជាប្រាក់ចំពោះបុគ្គលល្មើសនឹងច្បាប់ស្តីពីអន្តោប្រវេសន៍ផងដែរ។
ពាក់ព័ន្ធបញ្ហាប្រឈមវិញ លោកបានឱ្យដឹងថា ការគ្រប់គ្រងការផ្លាស់ប្តូរទីលំនៅរបស់ជនបរទេសអន្តោប្រវេសន៍ពីមូលដ្ឋាន ១ ទៅមូលដ្ឋាន ១ មិនទាន់បានច្បាស់លាស់ ហើយការរៀបអាពាហ៍ពិពាហ៍រវាងជនបរទេសអន្តោប្រវេសន៍ និងជនបរទេសអន្តោប្រវេសន៍ និងជនបរទេសអន្តោប្រវេសន៍ជាមួយជនជាតិខ្មែរ មិនទាន់មានបទដ្ឋានកំណត់នៅឡើយ។ បន្ថែមពីនេះ លោកថា អាជ្ញាធរវៀតណាមមិនទទួលយកជនបរទេសអន្តោប្រវេសន៍វៀតណាម ដែលមានបំណងត្រឡប់ទៅប្រទេសវិញ ខណៈការបំផ្លាស់ទីពីផ្ទះបណ្តែតទឹកមកលើគោកនៅខេត្តកំពង់ឆ្នាំងកន្លងមកអនុវត្តមិនបានត្រឹមត្រូវតាមការកំណត់របស់ក្រសួង។
បើតាមលោក លោក ប៉ោ ភក្តិ បញ្ហាប្រឈមផ្សងទៀត រួមមាន ម្ចាស់គ្រឹះស្ថានមិនសហការជាមួយកម្លាំងមានសមត្ថកិច្ចពាក់ព័ន្ធការរាយការណ៍អំពីវត្តមានជនបរទេសដែលមកស្នាក់នៅ ខណៈសមត្ថភាពរបស់មន្ត្រីមានសមត្ថកិច្ចនៅមានកម្រិត ជាពិសេសលើផ្នែកភាសា និងផ្នែកបច្ចេកវិទ្យាព័ត៌មាន ។
ក្នុងឱកាសពិធីបើកសន្និបាតនោះដែរ លោកបានសម្តែងការព្រួយបារម្ភផងដែរ ពាក់ព័ន្ធជនបរទេសឆ្លងដែនខុសច្បាប់ចូលមកកម្ពុជា ដែលបង្កឱ្យមានផលប៉ះពាល់ដល់សន្តិសុខ និងសណ្តាប់ធ្នាប់សង្គម ក្នុងនោះមានការលេចឡើងនូវបាតុភាពបង្ខាំងមនុស្សឱ្យធ្វើការល្មើសលក្ខខណ្ឌការងារ និងរំលោភសិទ្ធិមនុស្ស។
លោកបានបន្តទៀតថា អគ្គនាយកដ្ឋានអន្តោប្រវេសន៍ស្នើដល់ស្នងការនគរបាលរាជធានី ខេត្ត ធ្វើការពិនិត្យបញ្ជីឈ្មោះលើមុខសញ្ញាដែលត្រូវបានបណ្តេញចេញ ហើយបានត្រឡប់មកវិញរួចផ្ញើមកក្រសួង ដើម្បីមានមូលដ្ឋានក្នុងការអនុវត្តវិធានការច្បាប់។
រីឯការគ្រប់គ្រងខ្សែបន្ទាត់ព្រំដែនវិញ លោកថា មានការជួបការលំបាកដោយសារភូមិសាស្ត្រធម្មជាតិមានភាពស្មុគស្មាញ មានកន្លែងខ្លះកម្លាំងទៅមិនដល់ ខ្វះកម្លាំងសម្រាប់ឈរជើងនៅតាមគោលដៅ សមត្ថភាពមន្ត្រីនៅមានកម្រិត និងខ្វះមធ្យោបាយសម្ភារបច្ចេកទេស ដែលជាហេតុនាំឱ្យមានការចន្លោះប្រហោងក្នុងការគ្រប់គ្រង។
ក្នុងន័យនេះ តាមរយៈសន្និបាតរយៈពេល ២ ថ្ងៃ លោក ប៉ោ ភក្តិ បានស្នើដល់សមត្ថកិច្ចពាក់ព័ន្ធ សូមពង្រឹងនូវកិច្ចសហប្រតិបត្តិការឱ្យបានកាន់តែល្អជាមួយប្រទេសជិតខាង ដែលមានការទាក់ទងដល់បញ្ហាការបញ្ជូនជនបរទេសអន្តោប្រវេសន៍ឱ្យត្រឡប់ទៅកាន់ប្រទេសដើមរបស់ពួកគេវិញ។
ក្នុងរបាយការណ៍របស់ក្រសួងមហាផ្ទៃបានឱ្យដឹងថា ក្នុងឆ្នាំ ២០២១ សមត្ថកិច្ចបានបង្ក្រាបករណីលួចឆ្លងដែនខុសច្បាប់បានចំនួន ៦៦៧ លើក ឃាត់មនុស្សបានចំនួន ៤ ៣៣៣ នាក់ក្នុងនោះមាន ៨ សញ្ជាតិ។ ជាមួយគ្នានេះក៏បានបណ្តេញចេញតាមច្រកទ្វារព្រំដែនចំនួន ៣ ៧៩៤ នាក់ បញ្ជូនមកស្នាក់ការនៃអគ្គនាយកដ្ឋានអន្តោប្រវេសន៍ដើម្បីត្រៀមបណ្តេញចេញចំនួន ៥១៩ នាក់ និងបញ្ជូនទៅពន្ធនាគារចំនួន ២០ នាក់។
របាយការណ៍ដដែលបន្តថា កងកម្លាំងនគរបាលព្រំដែនបានសហការជាមួយកងយោធពលខេមរភូមិន្ទ ទទួលជនទេសន្តរប្រវេសន៍ជាពលករខ្មែរត្រឡប់មកកម្ពុជាវិញបានចំនួនជិត ១១ ម៉ឺននាក់ និងបានសហការជាមួយអង្គភាពជំនាញធ្វើការបង្ក្រាបមេខ្យល់នាំមនុស្សឆ្លងដែនខុសច្បាប់បានចំនួន ២៣៩ ករណី ឃាត់មនុស្ស ២៨២ នាក់ និងបញ្ជូនទៅតុលាការ ៤៩ នាក់៕
