.jpg)
រថយន្តនៅតាមដងផ្លូវក្នុងរាជធានីភ្នំពេញកាលពីថ្ងៃទី ១ ខែកុម្ភៈឆ្នាំ ២០២២។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន ព្រមានដុតកម្ទេចចោលរថយន្តដែលមិនទាន់បំពេញកាតព្វកិច្ចបង់ពន្ធជូនរដ្ឋ ដើម្បីធ្វើជាគំរូទៅថ្ងៃមុខ និងណែនាំឱ្យអាជ្ញាធរមានសមត្ថកិច្ចរឹបអូសរថយន្តគេចពន្ធ ទោះនៅផ្ទះលោកធំណាក៏ដោយ។
ការព្រមានធ្ងន់ៗនេះ ធ្វើឡើងខណៈលោកអញ្ជើញជាអធិបតី បិទសន្និបាតបូកសរុបការងារឆ្នាំ ២០២១ និងលើកទិសដៅការងារឆ្នាំ ២០២២ របស់ក្រសួង មហាផ្ទៃ កាលពីថ្ងៃទី ២៣ ខែកុម្ភៈដែលមានការចូលរួមពីគ្រប់រដ្ឋមន្ត្រី និងអភិបាលខេត្តទូទាំងប្រទេស។ លោកនាយករដ្ឋមន្ត្រីបានថ្លែងសំដៅទៅលើម្ចាស់រថយន្ត ដែលមិនទាន់ចូលមកបង់ពន្ធ ហើយព្រមានដុតកម្ទេចចោល ក្រោយរឹបអូសបាន។
លោកថា៖ «ហើយអ្នកដែលមិនទាន់បង់ពន្ធប្រមាណ ៥ ពាន់ គ្រឿងរថយន្តទៀត សូមចេញមកបង់ពន្ធ ប្រយ័ត្នដល់ពេលថ្ងៃណាមួយ ខ្ញុំបញ្ជាឱ្យដុតឡានចោលតែម្តង កុំឱ្យពិបាកពេក។ ពេលណាមួយខ្ញុំថា យកធ្វើជាគំរូយកឡានដុតចោលតែម្តងទោះថ្លៃប៉ុនណាក៏ដោយ ដើម្បីឱ្យរាងតែម្តង»។
ក្នុងន័យនេះលោក ហ៊ុន សែន បានលើកករណីជាក់ស្តែងដែលបានកើតឡើងកាលពីឆ្នាំ ១៩៩៩ គ្រាដែលលោកបានបញ្ជាឱ្យដុតរថយន្តដឹកឈើផងដែរ។ លោកថា៖ «ចាំបានទេ ឆ្នាំ ១៩៩៩ ដុតឡានដឹកឈើចោលប្រាប់ថា កុំឱ្យកាប់ឈើ ឈប់កាប់ វានៅតែកាប់ មិនដឹងធ្វើម៉េច បញ្ជាទៅឱ្យដុតឡានចោលតែម្តង ព្រោះឡានទៅដល់តុលាការ វាទៅរំដោះ ហើយដឹកឈើទៀត អ៊ីចឹងដដែលៗ ដុតចោលតែម្តង»។
លោកនាយករដ្ឋមន្ត្រីបន្តថា មូលហេតុដែលស្នើឱ្យម្ចាស់រថយន្តទៅបង់ពន្ធ ដើម្បីកុំឱ្យមានឡាននៅលើផ្លូវ បើកបរដោយពាក់ស្លាកលេខក្លែងក្លាយ។ លោកបន្តទៀតថា៖ «ខ្ញុំអំពាវនាវអ្នកដែលមិនទាន់បង់ពន្ធចេញមកបង់ពន្ធ ហើយអត់មានលើកលែង ១០ ភាគរយទៀតទេពីមុន ថ្ងៃ ៣១ ខែធ្នូ ឆ្នាំ ២០២១ គឺអនុគ្រោះពន្ធ ១០ ភាគរយ ប៉ុន្តែដល់ពេលអ្នកឯងមិនមកបង់ផុតថ្ងៃ គឺបង់ពន្ធពេញ ហើយបើថា រកឃើញហើយត្រូវរឹបអូសទោះនៅផ្ទះអ្នកណាក៏ដោយ»។
ទន្ទឹមនឹងការព្រមាននេះ លោកនាយករដ្ឋមន្ត្រីក៏បានធ្វើការអំពាវនាវដល់ក្រុមហ៊ុនទាំងអស់ សូមបំពេញកាតព្វកិច្ចពន្ធ ខណៈលោកសង្កេតឃើញថា តួលេខបំណុលក្រុមហ៊ុនមួយចំនួនបានជំពាក់ចំពោះរដ្ឋមានចំនួនច្រើន។
បន្ថែមពីនេះ លោកអំពាវនាវដោយទទូចស្នើសុំឱ្យរួមគ្នាធ្វើសហប្រតិបត្តិការ ដើម្បីជួយដល់អង្គភាពប្រមូលចំណូលដល់អគ្គនាយកដ្ឋានគយ និងរដ្ឋាករកម្ពុជានិងអគ្គនាយកដ្ឋានពន្ធដារ ដើម្បីប្រឆាំងនឹងអំពើគេចពន្ធ។ លោក ហ៊ុន សែន គូសបញ្ជាក់ថា ការពង្រឹងការប្រមូលពន្ធនេះ ដើម្បីគាំទ្រឱ្យអង្គភាពប្រមូលចំណូល ស្របពេលដែលកម្ពុជាត្រូវការចំណាយច្រើនទៅលើវិធានការទប់ស្កាត់កូវីដ ១៩ និងស្នើឱ្យស្ថាប័នពាក់ព័ន្ធត្រូវចេះសន្សំសំចៃនៅក្នុងគ្រានេះ។
ទន្ទឹមនឹងនេះដែរ លោកនាយករដ្ឋមន្ត្រីបានថ្លែងថា ដរាបណាលោកនៅតែដឹកនាំប្រទេស គឺមិនយកពន្ធលើដីស្រែពលរដ្ឋឡើយ។ លោកថា៖ «ពន្ធដីកសិកម្ម យើងមិនដែលយកពន្ធដីកសិកម្មយកមកធ្វើថវិកាជាតិរបស់យើងទេ គណបក្សប្រជាជនបានដឹកនាំកិច្ចការនេះតាំងពីឆ្នាំ ១៩៧៩ ហើយបើគណបក្សប្រជាជនបន្ដដឹកនាំបន្តទៀត ពន្ធដីស្រែ ពន្ធដីចម្ការ ពន្ធដីកសិកម្មរបស់ប្រជាពលរដ្ឋនៅតែមិនយក បើសិនជាមេដឹកនាំជាន់ក្រោយយកពន្ធដីស្រែ ហើយវិញ្ញាណខ្ញុំដឹង ខ្ញុំនឹងដាក់បណ្តាសា ព្រោះជានយោបាយដីធ្លីរបស់ខ្ញុំតាំងពីដើមមក មិនយកពន្ធដីស្រែទេ»៕
វីដេអូ៖
