ភ្នំពេញៈ ក្រុមមេធាវីក្រសួងវប្បធម៌ និងវិចិត្រសិល្បៈ កំពុងពន្លឿននីតិវិធីត្រួតពិនិត្យ និងកែសម្រួលខ្លឹមសារ បច្ចេកទេសនៃពាក្យបណ្ដឹងប្រឆាំងនឹងក្រុមហ៊ុន Think Biotech (Cambodia) Co.; Ltd ទៅតុលាការករណីឈូសឆាយដីព្រៃបង្កឱ្យខូចប្រាសាទបុរាណចំណាស់មួយ ឈ្មោះ ប្រាសាទលាវចោម ឬប្រាសាទត្រពាំងក្របៅនៅភូមិអាជេន ឃុំកំពង់ចាម ស្រុកសំបូរ ខេត្តក្រចេះ។
លោក អ៊ុក សុខា អគ្គនាយកនៃអគ្គនាយកដ្ឋានបេតិកភណ្ឌបានប្រាប់ភ្នំពេញប៉ុស្តិ៍នៅថ្ងៃទី ២៣ ខែកុម្ភៈថា កាលពីថ្ងៃចន្ទសប្ដាហ៍មុន ក្រុមមេធាវីនិ ងក្រុមជំនាញការផ្នែកបេតិកភណ្ឌបានជួបប្រឹក្សាគ្នាលើការត្រួតពិនិត្យ និងកែសម្រួលខ្លឹមសារបច្ចេកទេសនៃពាក្យបណ្ដឹងមួយសម្រាប់ប្ដឹងប្រឆាំងក្រុមហ៊ុន Think Biotech ទៅតុលាការ ដើម្បីឱ្យក្រុមហ៊ុននេះទទួលខុសត្រូវចំពោះការបំផ្លិចបំផ្លាញប្រាសាទបុរាណដែលជាសម្បត្តិបេតិកភណ្ឌវប្បធម៌ជាតិ។
លោក សុខា បានបញ្ជាក់ថា៖ «នៅពេលនេះ ក្រុមជំនាញការ និងក្រុមមេធាវីកំពុងរួមសហការគ្នាត្រួតពិនិត្យ និងកែសម្រួលខ្លឹមសារបច្ចេកទេសមួយចំនួននៃពាក្យបណ្ដឹងទៅតាមនីតិវិធីច្បាប់ ក្រោយការកែសម្រួលលើខ្លឹមសារ បច្ចេកទេសនៃពាក្យបណ្ដឹងនោះរួចយើងនឹងដាក់ឆ្លងទៅរដ្ឋមន្ត្រីក្រសួងវប្បធម៌ និងវិចិត្រសិល្បៈពិនិត្យ និងសម្រេច ដាក់ចូលទៅតុលាការតែម្ដង»។
លោកបានបន្ថែមថា៖ «ករណីនេះ ក្រសួងមិននៅស្ងៀមទេ គឺយើងយកចិត្តទុកដាក់បំផុត។ ប៉ុន្តែយើងមិនអាចធ្វើដោយភាពតក់ក្រហល់បានទេ»។
ជុំវិញកិច្ចការនេះផងដែរ អាជ្ញាធរ និងមន្ទីរវប្បធម៌ និងវិចិត្រសិល្បៈ ខេត្តក្រចេះ ក៏មិនព្រងើយកន្តើយដែរ គឺបានចុះប្រមូលនូវវត្ថុតាងចម្លាក់ថ្មប្រាសាទបុរាណដែលបាក់រលំដោយសារការឈូសឆាយព្រៃខ្វះការប្រុងប្រយ័ត្នរបស់ភាគីក្រុមហ៊ុន Think Biotech យកមករក្សាទុកនៅសារមន្ទីរវប្បធម៌ខេត្ត និងបានរៀបចំជារបាយការណ៍សំយោគក្នុងជំហានបឋមបញ្ជូនទៅកាន់ក្រសួងដើម្បីចាត់ការបន្តតាមនីតិវិធីច្បាប់។
លោក ទេព វាសនា ប្រធានមន្ទីរវប្បធម៌ និងវិចិត្រសិល្បៈខេត្តក្រចេះបានប្រាប់ភ្នំពេញ-ប៉ុស្តិ៍នៅថ្ងៃទី ២៣ ខែកុម្ភៈថាក្រោយពីទទួលដំណឹងករណីក្រុមហ៊ុនខាងលើធ្វើឱ្យរលំប្រាសាទលាវចោម ភ្លាម ក្រុមការងាររបស់លោកបានចុះដល់ទីតាំងកើតហេតុនោះហើយបាននាំគ្នាប្រមូលយកនូវចម្លាក់ផ្ដែរប្រាសាទមករក្សាទុកនៅសារមន្ទីរវប្បធម៌ខេត្តជាបណ្ដោះអាសន្ន។
លោកបានបញ្ជាក់ថា៖ «ក្រៅពីប្រមូលនូវវត្ថុតាង និងថតរូបភាពនៃទីទួលប្រាសាទបាក់បែកនោះ ក្រុមការងារយើងដែលមានការចូលរួមពីគណៈបញ្ជាការឯកភាពខេត្តក្រចេះ បានចុះពិនិត្យទីតាំងកើតហេតុ និងបានណែនាំដល់ភាគីក្រុមហ៊ុន ធ្វើការបោះបង្គោល កំណត់ព្រំប្រទល់ទីតាំងទួលប្រាសាទបុរាណលើផ្ទៃដីជិត ១ ហិកតា ជាបណ្ដោះអាសន្ន និងត្រូវដាក់ការយាមកាមជាប្រចាំ ដើម្បីការពារពីការបំផ្លិចបំផ្លាញតាមគ្រប់រូបភាពផ្សេងទៀត»។
បើតាមលោក វាសនា ប្រាសាទលាវចោម ដែលរងការបាក់បែក និងដួលរលំនោះ ជាប្រាសាទដ៏ចំណាស់បំផុតមួយដែលត្រូវបានសាងសង់ឡើងក្នុងសតវត្សរិ៍ទី ៧ ឬសម័យចេនឡា។ ប្រាសាទនោះ ជាសំណង់ដែលសង់ឡើងពីថ្មដីឥដ្ឋសម្រាប់ការឧទ្ទិសដល់ព្រាហ្មណ៍សាសនា។
ទោះយ៉ាងណាក៏ដោយ មកទល់ពេលនេះ លោក Lu Chu Chang ប្រធានក្រុមប្រឹក្សាភិបាលក្រុមហ៊ុន Think Biotech (Cambodia) Co.; Ltd នៅតែមិនអាចទាក់ទងស្នើសុំការអត្ថាធិប្បាយជុំវិញករណីនេះនៅឡើយទេ។
យោងតាមរបាយការណ៍របស់រដ្ឋបាលខេត្តក្រចេះ ក្រុមហ៊ុន Think Biotech(Cambodia) Co.; Ltdទទួលបានអាជ្ញាប័ណ្ណវិនិយោគអភិវឌ្ឍរោងចក្រឧស្សាហកម្ម កែច្នៃផលិតផលព្រៃឈើ ឬស្ថានីយស្តារព្រៃឈើលើផ្ទៃដីជាង ៣ ម៉ឺនហិកតានៅក្នុងស្រុកសំបូរ ខេត្តក្រចេះ និងនៅក្នុងស្រុកសៀមបូក ខេត្តស្ទឹងត្រែង៕
វីដេអូ៖