The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋមន្ត្រី​មហាផ្ទៃ​ប្រាប់​ឱ្យ​មន្ត្រីរាជការ​ឈរឈ្មោះ​បោះឆ្នោត​ឃុំ​-​សង្កាត់​ ត្រូវសុំ​ច្បាប់​ ៧ ​ថ្ងៃ មុន​ថ្ងៃ​យុទ្ធនាការ

រដ្ឋមន្ត្រី​មហាផ្ទៃ​ប្រាប់​ឱ្យ​មន្ត្រីរាជការ​ឈរឈ្មោះ​បោះឆ្នោត​ឃុំ​-​សង្កាត់​ ត្រូវសុំ​ច្បាប់​ ៧ ​ថ្ងៃ មុន​ថ្ងៃ​យុទ្ធនាការ

Content image - Phnom Penh Post
លោក ស ខេង រដ្ឋមន្ត្រី ក្រសួង​មហាផ្ទៃ​។ រូបថត ក្រសួង​មហាផ្ទៃ

រដ្ឋមន្ត្រី​មហាផ្ទៃ​ប្រាប់​ឱ្យ​មន្ត្រីរាជការ​ឈរឈ្មោះ​បោះឆ្នោត​ឃុំ​-​សង្កាត់​ ត្រូវសុំ​ច្បាប់​ ៧ ​ថ្ងៃ មុន​ថ្ងៃ​យុទ្ធនាការ

ភ្នំពេញៈ រដ្ឋមន្ត្រី​ក្រសួងមហាផ្ទៃ លោក ស ខេង ណែនាំ​ដល់​មន្ត្រី​រាជការ​ស៊ីវិល ដែល​មានបំណង​ឈរឈ្មោះ​ជា​បេក្ខជន​បោះឆ្នោត​ជ្រើសរើស ក្រុមប្រឹក្សាឃុំ សង្កាត់ អាណត្តិ​ទី ​៥ ត្រូវដាក់​ពាក្យសុំច្បាប់​ឈប់​ពិសេស​យ៉ាងតិច ៧​ ថ្ងៃ មុន​ថ្ងៃ​បើក​យុទ្ធនាការ​ឃោសនា​បោះឆ្នោត​រហូតដល់​ថ្ងៃ​ប្រកាស​លទ្ធផល​នៃ​ការបោះឆ្នោត​ជា​ផ្លូវការ ស្របតាម​ច្បាប់ បទបញ្ជា និង​នីតិវិធី សម្រាប់​ការបោះឆ្នោត​ជ្រើសរើស​ក្រុមប្រឹក្សាឃុំ​-​សង្កាត់​។

ក្នុង​លិខិត​ ១ ​ច្បាប់​ផ្ញើជូន​អភិបាល​រាជធានី​-​ខេត្ត​នៅ​ទូទាំង​ប្រទេស​នា​ថ្ងៃទី​ ២២ កុម្ភៈ លោក ស ខេង សរសេរថា ដំណើរការ​បោះឆ្នោត​ជ្រើសរើស​ក្រុមប្រឹក្សា​-​ឃុំ​-​សង្កាត់​អាណត្តិ​ទី​ ៥​ នឹង​ប្រព្រឹត្ត​ទៅនា​ថ្ងៃទី​ ៥ មិថុនា ឆ្នាំ​ ២០២២​។ ទន្ទឹម​នោះ​ការទទួល​ពាក្យសុំ​ចុះបញ្ជី​បេក្ខជន នៃ​គណបក្ស​នយោបាយ​សម្រាប់​ឈរឈ្មោះ​បោះឆ្នោត​ជ្រើសរើស​ក្រុមប្រឹក្សាឃុំ​សង្កាត់ អាណត្តិ​ទី ​៥ នឹង​ចាប់ផ្តើម​ពីថ្ងៃ​ទី​ ៤ ខែមីនា ឆ្នាំ​ ២០២២ និង​បញ្ចប់​នៅ​ថ្ងៃទី ​៦ ខែមីនា ឆ្នាំ​ ២០២២​។

លោក​បន្តថា​៖ «​ពាក់ព័ន្ធ​នឹង​ករណី​ខាងលើ អនុលោម​តាមច្បាប់ និង​លិខិតបទដ្ឋាន​គតិយុត្ត​ដូច​មាន​ចុះ​ក្នុង​យោង មន្ត្រី​រាជការ​ស៊ីវិល​មាន​សិទ្ធិ​ទទួលបាន​ច្បាប់​ឈប់សម្រាក​ពី​ការងារ​តាមរបប​ និង​នីតិវិធី​ដែល​បានកំណត់​។ ករណី​មន្ត្រីរាជការ​ស៊ីវិល ដែល​មានបំណង​ឈរឈ្មោះ​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់ ត្រូវដាក់​ពាក្យសុំ​ច្បាប់ឈប់​ពិសេស​រយៈពេល​យ៉ាងតិច​ ៧ ​ថ្ងៃ មុន​ថ្ងៃ​បើក​យុទ្ធនាការ​ឃោសនាបោះឆ្នោត​រហូតដល់​ថ្ងៃ​ប្រកាស​លទ្ធផល​នៃ​ការបោះឆ្នោត​ជា​ផ្លូវការ ស្របតាម​ច្បាប់​ស្តីពី​ការបោះឆ្នោត​ជ្រើសរើស​ក្រុមប្រឹក្សាឃុំ សង្កាត់ និង​បទបញ្ជា និង​នីតិវិធី​សម្រាប់​ការបោះឆ្នោត​ជ្រើសរើស​ក្រុមប្រឹក្សា​ឃុំ សង្កាត់​អាណត្តិ​ទី​ ៥»​។

ទន្ទឹមនឹងនេះ ដើម្បី​ចូលរួមចំណែក​ធានា​ឱ្យ​ការបោះឆ្នោត​ជ្រើសរើស​ក្រុមប្រឹក្សាឃុំ សង្កាត់ អាណត្តិ​ទី​ ៥ ប្រព្រឹត្ត​ទៅដោយ​សេរី ត្រឹមត្រូវ និង​យុត្តិធម៌ លោក ស ខេង បាន​ណែនាំ​ថា មន្ត្រី​រាជការ​ស៊ីវិល​ត្រូវមាន​អព្យាក្រឹតភាព​ក្នុង​សកម្មភាព​បំពេញការងារ​របស់ខ្លួន ស្របតាម​មាត្រា ៣៧ នៃ​ច្បាប់​ស្តីពី​សហលក្ខន្តិកៈ​មន្ត្រីរាជការ​ស៊ីវិល​នៃ​ព្រះរាជាណាចក្រ​កម្ពុជា​។ មន្ត្រីរាជការ​ស៊ីវិល​មិន​ត្រូវយក​ម៉ោង​បម្រើ​ការងារ​ទៅ​បម្រើឱ្យ​សកម្មភាព​គណបក្ស​នយោបាយ​ណាមួយ​ឡើយ​។

លោក​ណែនាំ​ថា ក្នុង​រយៈពេល​នៃ​យុទ្ធនាការ​ឃោសនាបោះឆ្នោត មន្ត្រីរាជការ​ស៊ីវិល អាជ្ញាធរ​ដែនដី​គ្រប់​លំដាប់ថ្នាក់​ត្រូវអនុវត្ត​ឱ្យបាន​ម៉ឺងម៉ាត់​នូវ​មាត្រា ​៨២ នៃ​ច្បាប់​ស្តីពី​ការបោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់ និង​បទបញ្ជា និង​នីតិវិធី​សម្រាប់​ការបោះឆ្នោត​ជ្រើសរើស​ក្រុមប្រឹក្សាឃុំ​-​សង្កាត់ អាណត្តិ​ទី ​៥​។ មន្ត្រីរាជការ​ស៊ីវិល​មិនត្រូវ​ប្រើ​ថវិកា សម្ភារ ទីកន្លែង មធ្យោបាយ​ដឹកជញ្ជូន​ដែលជា​ទ្រព្យសម្បត្តិ​របស់​រដ្ឋ​ដើម្បី​ធ្វើ​សកម្មភាព​ឃោសនា​បោះឆ្នោតឱ្យ​គណបក្សនយោបាយ​ណាមួយ​ឡើយ​។

លោក សោម សូរីដា អ្នកនាំពាក្យ​គណៈកម្មាធិការ​ជាតិ​រៀបចំ​ការបោះឆ្នោត​ (​គជប​) ​ថ្លែង​នៅ​ថ្ងៃទី​ ២៤ កុម្ភៈ ថា លិខិត​របស់លោក ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ឆ្លើយតប​នឹង​មាត្រា​ ៣៧ នៃ​ច្បាប់​ស្តីពី​ការបោះឆ្នោត​ជ្រើសរើស​ក្រុមប្រឹក្សាឃុំ​-​សង្កាត់​។ ច្បាប់​នេះ​តម្រូវឱ្យ​មន្ត្រីរាជការ​ស៊ីវិល មន្ត្រី​តុលាការ កងយោធពលខេមរភូមិន្ទ នគរបាលជាតិ​ដែលមាន​បំណង​ឈរឈ្មោះ​ជា​បេក្ខជន​បោះឆ្នោត​ជ្រើសរើស​ក្រុមប្រឹក្សា​-​ឃុំ​សង្កាត់ ត្រូវដាក់​ពាក្យសុំ​ច្បាប់ឈប់​ជាពិសេស​យ៉ាងតិច​ ៧ ​ថ្ងៃ មុន​បើក​យុទ្ធនាការ​បោះឆ្នោត​រហូតដល់​ថ្ងៃ​ប្រកាស​លទ្ធផល​បោះឆ្នោត​ជា​ផ្លូវការ​។

លោក​ថា​៖ «​ដូច្នេះ​មន្ត្រីរាជការ​ស៊ីវិល​ត្រូវតែ​ដាក់ពាក្យ​សុំច្បាប់ ឈប់​ពិសេស​នេះ​។ លិខិត​ក្រសួងមហាផ្ទៃ​នេះ​ពាក់ព័ន្ធ​នឹង​បញ្ញត្តិ​មានចែង​ក្នុង​មាត្រា​ ៣៧ ដោយ​ក្នុង​មាត្រា​នេះដែរ ក៏បាន​ចែង ប្រសិន​បើ​សាមីខ្លួន​ជាប់ឆ្នោត សាមីខ្លួន​ត្រូវធ្វើ​ពាក្យស្នើសុំ​តាម​ឋានានុក្រម​ទៅ​សាមីក្រសួង​ ឬ​អង្គភាព​ទៅ​បម្រើ​ការងារ​ក្រៅ​ក្របខ័ណ្ឌ​ដើម​ក្នុង​រយៈពេល​នៃ​អាណត្តិ​របស់ខ្លួន​»​។ បើតាម លោក សោម សូរីដា ក្នុងអំឡុង​ពេលនេះ សាមីខ្លួន​ត្រូវមាន​សិទ្ធិ​ឡើង​ថ្នាក់ និង​រក្សា​អតីតភាព​ការងារ​សម្រាប់​ទទួល​សោធន​និវត្តន៍​។ ច្បាប់​នេះ​ក៏បាន​បន្ធូរបន្ថយ​ខ្លះ​ដែរ ពាក់ព័ន្ធ​នឹង​ចប់​អាណត្តិ ក្រុមប្រឹក្សាឃុំ​-​សង្កាត់ សាមីខ្លួន​អាច​សុំ​ត្រឡប់មក​បម្រើការ​នៅ​ក្រសួង​ ឬ​អង្គភាព​ដើម​វិញ ប៉ុន្តែ​មុខងារ អាស្រ័យលើ​សាមីក្រសួង ឬក៏​សាមី​អង្គ​ភាពជា​អ្នកសម្រេច​។

លោក តាន់ ណាវិន បច្ចុប្បន្ន ជា​ចៅសង្កាត់​ទឹកថ្លា​ប្រាប់​ភ្នំពេញ​-​ប៉ុស្តិ៍​នៅ​ថ្ងៃទី ​២៤ កុម្ភៈ ថា លោក​ក៏​បន្ត​ឈរឈ្មោះ​ជា​បេក្ខជន​សម្រាប់ ការបោះឆ្នោត​ជ្រើសរើស​ក្រុម​-​ប្រឹក្សា​ឃុំ សង្កាត់​អាណត្តិ​ទី​ ៥ នេះដែរ​។ ប៉ុន្តែ​លោក​មិនទាន់​ទទួល​បាន​លិខិត​ណែនាំ​ពី​លោក ស ខេង នៅឡើយ​ទេ​។ ទោះជា​យ៉ាងណា លោក​ថ្លែងថា លោក​នឹង​អនុវត្តតាម​សេចក្តី​ណែនាំ​របស់លោក ស ខេង ឱ្យបាន​ខ្ជាប់ខ្ជួន ដើម្បីឱ្យ​ដំណើការ​នៃ​ការរៀបចំ​ការបោះឆ្នោត​នៅពេល​ខាងមុខនេះ ប្រព្រឹត្ត​ទៅដោយ​រលូន ត្រឹមត្រូវ និង​យុត្តិធម៌​។ លោក​ថ្លែងថា​៖ «​យើង​ត្រូវតែ​អនុវត្ត បើសិន​ជាមាន​លិខិត​នេះ​មកដល់ ហើយ​ចេញពី​ក្រសួង ឬក៏​មន្ទីរ​ណាមួយ​ក៏ដោយ យើង​ត្រូវតែ​អនុវត្ត​»​។

លោក​ថា ការធ្វើជា​បេក្ខជន​ឈរឈ្មោះ​បោះឆ្នោត លោក​រំពឹង​ទទួល​បាន​ការគាំទ្រ​ច្រើន​ពី​ប្រជាពលរដ្ឋ​ក្នុង​មូលដ្ឋាន​ព្រោះ​កន្លងមក លោក​បាន​ដឹកនាំ​សង្កាត់ មានការ​អភិវឌ្ឍ រីកចម្រើន​គួរកត់សម្គាល់ ជាពិសេស​ការពារ​សន្តិសុខ​សណ្តាប់ធ្នាប់​បាន​ល្អប្រសើរ​ជូន​ប្រជាពលរដ្ឋ​៕

អត្ថបទគួរចាប់អារម្មណ៍