ស្ទឹងត្រែងៈ ជនម្នាក់ដែលវាយប្រពន្ធនឹងចបជីកបាក់ឆ្អឹងក្តោងច្រមុះ និងបាក់ឆ្អឹងកំភួនដៃម្ខាង ត្រូវបានចៅក្រមស៊ើបសួរ សាលាដំបូងខេត្តស្ទឹងត្រែងចេញដីកាឃុំខ្លួននៅពន្ធនាគារខេត្ត កាលពីថ្ងៃទី ២៣ កុម្ភៈ បន្ទាប់ពីប្រព្រឹត្ត និងឃាត់ខ្លួនពីថ្ងៃទី ២១ កុម្ភៈ នៅភូមិកេតមឿង ឃុំ ស្រែសំបូរ ស្រុកសៀមប៉ាង។
លោក ឈុំ ស៊ាងហាក់ អ្នកនាំពាក្យតុលាការខេត្តស្ទឹងត្រែងឱ្យដឹងនៅថ្ងៃទី ២៤ កុម្ភៈថា បុរសឈ្មោះ ម៉ាន ឡន អាយុ ៣៣ ឆ្នាំ ត្រូវបានចៅក្រមស៊ើបសួរចេញដីកាឃុំខ្លួនក្នុងពន្ធនាគារខេត្តហើយ ពីថ្ងៃទី ២៣ កុម្ភៈ បន្ទាប់ពីតំណាងអយ្យការចោទប្រកាន់បានប៉ុន្មានម៉ោង។ លោកថ្លែងថា៖ «បុរសម្នាក់នេះ ត្រូវបានតំណាងអយ្យការ ចោទពីបទអំពើហិង្សាប្រព្រឹត្តដោយសហព័ន្ធ ឬអនីតិសង្វាសជនតាមបញ្ញតិ្តមាត្រា ២២២ នៃក្រមព្រហ្មទណ្ឌ»។ យោងតាមមាត្រា ២២២ នៃក្រមព្រហ្មទណ្ឌ ជនត្រូវចោទ អាចនឹងត្រូវផ្តន្ទាទោសដាក់ពន្ធនាគារពី ២ ទៅ ៥ ឆ្នាំ និងពិន័យជាប្រាក់ពី ៤ លានទៅ ១០ លានរៀលប្រសិនបើតុលាការ រកឃើញថាពិតជាមានបទល្មើស។
លោក ខៀវ សម្បត្តិ នាយនគរបាលប៉ុស្តិ៍ឃុំ ស្រែសំបូរ រៀបរាប់តាមសម្តីសាច់ញាតិស្ត្រីរងគ្រោះ នៅថ្ងៃទី ២៤ កុម្ភៈថា ជនឈ្មោះ ម៉ាន ឡន មានប្រពន្ធឈ្មោះ កាន ញ៉ុត អាយុ ២៩ ឆ្នាំ មានកូនតូចៗចំនួន ៣ នាក់កំពុងរស់នៅក្នុងបន្ទុក។ ប៉ុន្តែកន្លងមក គ្រួសារមួយនេះ មិនដែលឈ្លោះប្រកែកគ្នាទេ ទើបតែថ្ងៃទី ២១ កុម្ភៈ នៅវេលាម៉ោងជាង ៧ យប់ក៏ពួកគេឈ្លោះគ្នា។ មុនមានទំនាស់គ្នានោះ ជនជាប់ចោទបានឱ្យលុយទៅស្ត្រីរងគ្រោះចំនួន ៦ ម៉ឺនរៀល ហើយបន្ទាប់មកគាត់ក៏ទិញស្រាផឹករហូតស្រវឹង។ ពេលនោះជនជាប់ចោទបានសួរប្រពន្ធថា លុយដែលគាត់ប្រគល់ឱ្យ ៦ ម៉ឺនរៀលឥឡូវបាត់ ១ ម៉ឺនរៀលហើយ តើយកទៅណា? មិនត្រឹមតែប៉ុណ្ណោះ ជនជាប់ចោទបានប្រចណ្ឌប្រពន្ធទៅនឹងអ្នកផ្សេង តែតាមពិតគ្មានអ្នកណាគេទៅស្រឡាញ់ប្រពន្ធគាត់នោះទេ។
លោកបញ្ជាក់ថា៖ «បើតាមខ្ញុំសាកសួរសាច់ញាតិជនល្មើស ក៏ដូចជាសាច់ញាតិរបស់ស្ត្រីរងគ្រោះ គឺគេប្រាប់ខ្ញុំថា ពួកគេមិនដែលឈ្លោះគ្នាទេ។ តែអារឿងប្រចណ្ឌឈ្លោះគ្នា គឺមានម្តងគឺតាំងពី ៤-៥ ឆ្នាំមុនម្ល៉េះ តែមិនប្រើអំពើហិង្សាទេ»។ បើតាមលោក សម្បត្តិ ពេលឈ្លោះគ្នាកាលពីថ្ងៃទី ២១ កុម្ភៈនោះ ជនសង្ស័យបានយកចបជីកដែកវាយសំពងលើស្ត្រីជាប្រពន្ធ បណ្តាលឱ្យបាក់ឆ្អឹងក្តោងច្រមុះ បាក់ឆ្អឹងកំភួនដៃម្ខាង និងត្រូវរបួសខ្លួនប្រាណទៀត។ កាលពីត្រូវរបួសភ្លាមៗត្រូវបានក្រុមគ្រួសារដឹកទៅព្យាបាលនៅមន្ទីរពេទ្យបង្អែកខេត្តស្ទឹងត្រែង តែដោយស្ថានភាពរបួសធ្ងន់ពេកក្រុមគ្រួសារស្ត្រីរងគ្រោះបានដឹកទៅព្យាបាលនៅមន្ទីរពេទ្យបង្អែកខេត្តសៀមរាប៕