.jpg)
សមត្ថកិច្ចវាយកម្ទេចឡដុតធ្យូងខុសច្បាប់នៅក្នុងភូមិសាស្ត្រ ឃុំបឹងមាលា ស្រុកស្វាយលើពីថ្ងៃទី ២៣ កុម្ភៈ។ រូបថត ហ្វេសប៊ុក
សៀមរាបៈ កម្លាំងខណ្ឌរដ្ឋបាលព្រៃឈើសៀមរាបសហការជាមួយអាជ្ញាធរស្រុកស្វាយលើបានរកឃើញឡដុតធ្យូងចំនួន ៥៧ ឡ និងបានរុះរើវាយបំផ្លាញចោលភ្លាមៗចំនួន ២៨ ឡ ព្រមទាំងបានតម្រូវឱ្យម្ចាស់អាជីវកម្មចំនួន ៥៤ នាក់ ធ្វើកិច្ចសន្យាបញ្ឈប់សកម្មភាពអាជីវកម្មដោយខុសច្បាប់នេះជាបន្ទាន់ បើពុំនោះទេនឹងត្រូវប្រឈមការចាប់ខ្លួនបញ្ជូនទៅតុលាការ ដើម្បីផ្តន្ទាទោសតាមច្បាប់ព្រៃឈើ។
លោក ម៉ុង ប៊ុនលឹម នាយខណ្ឌរដ្ឋបាលព្រៃឈើសៀមរាបបានប្រាប់ភ្នំពេញប៉ុស្តិ៍នៅថ្ងៃទី ២៤ ខែកុម្ភៈថា ប្រតិបត្តិការចុះរុះរើឡដុតធ្យូងនេះបានធ្វើឡើងរយៈពេល ២ ថ្ងៃ គឺពីថ្ងៃទី ២២-២៣ ខែកុម្ភៈ ឆ្នាំ ២០២២ នៅក្នុងភូមិសាស្ត្រ ឃុំបឹងមាលា ស្រុកស្វាយលើ។
ក្នុងប្រតិបត្តិការនេះ ក្រុមការងាររបស់លោកបានរកឃើញការធ្វើអាជីវកម្មឡដុតធ្យូងខុសច្បាប់រហូតដល់ ៥៧ ឡ ដែលមានម្ចាស់អាជីវកម្មចំនួន ៥៤ នាក់។
ក្នុងនោះឡដុតធ្យូងចំនួន ២៨ ត្រូវបានម្ចាស់អាជីវកម្មប្រមូលផលធ្យូងរួច និង ២៩ ទៀត កំពុងដំណើរការដុតអុសដើម្បីផលិតធ្យូង។
លោក ប៊ុនលឹម បានបញ្ជាក់ថា៖ «ក្រោយពីបានពន្យល់ណែនាំ និងតម្រូវឱ្យម្ចាស់អាជីវកម្មឡដុតធ្យូងទាំងនោះ ធ្វើកិច្ចសន្យាបញ្ឈប់ការធ្វើអាជីវកម្មនេះ ក្រុមការងារយើង ក៏បានសម្រេចវាយកម្ទេចឡដុតធ្យូងដែលពួកគេប្រមូលផលធ្យូងរួចទាំង ២៨ នោះចោល។ ចំណែក ២៩ ឡទៀត គឺក្រុមការងារយើងបានទុករយៈពេល ៣០ ថ្ងៃ ដើម្បីឱ្យម្ចាស់អាជីវកម្មវាយកម្ទេចដោយខ្លួនឯង ក្រោយពីប្រមូលផលធ្យូងរួច»។
ជាមួយគ្នានេះ លោកបានព្រមានថា នឹងចាត់វិធានការតាមច្បាប់ព្រៃឈើ ក្នុងករណីក្រុមការងារលោករកឃើញម្ចាស់អាជីវកម្មណាមួយបន្តលួចលាក់ប្រកបអាជីវកម្មឡដុតធ្យូងនេះដោយខុសច្បាប់ជាបន្តទៀត។
លោកបានថ្លែងថា៖ «នៅក្នុងកិច្ចសន្យាដែលម្ចាស់អាជីវកម្មទាំងនោះបានព្រមព្រៀងផ្ដិតមេដៃបញ្ឈប់ការធ្វើអាជីវកម្មឡដុតធ្យូងនោះ យើងបានបញ្ជាក់យ៉ាងច្បាស់ហើយថា ក្នុងករណីរកឃើញមានធ្វើសកម្មភាពអាជីវកម្មឡដុតធ្យូង ដោយខុសច្បាប់ទៀតនោះនឹងត្រូវប្រឈមការចាប់បញ្ជូនខ្លួនទៅតុលាការតាមមាត្រា ៩៧ នៃច្បាប់ព្រៃឈើ ដែលនឹងត្រូវផ្ដន្ទាទោសជាប់ពន្ធនាគារពី ៣ ឆ្នាំ ទៅ ៥ ឆ្នាំ»។
បើតាមលោក ប៊ុនលឹម ឈើដែលអ្នកភូមិទាំងនោះកាប់យកមកដុតធ្វើធ្យូង គឺកាប់ចេញពីព្រៃសហគមន៍ទទឹងថ្ងៃ ដែលមានផ្ទៃដី ១ ០០០ ហិកតា និងមានទីតាំងស្ថិតនៅក្នុងឃុំមាលា ស្រុកស្វាយលើ ខេត្តសៀមរាប។
តាមរយៈការធ្វើអាជីវកម្មឡដុតធ្យូងខុសច្បាប់នេះ បានធ្វើឱ្យព្រៃឈើក្នុងសហគមន៍នេះមានការរេចរឹលគួរឱ្យកត់សម្គាល់។
ទន្ទឹមនឹងនេះ លោកបានព្រមានថា នឹងមានការកែសម្រួលជាថ្មីនូវគណៈកម្មការសហគមន៍ព្រៃទទឹងថ្ងៃនេះឡើងវិញ ដើម្បីធានាបាននូវយន្តការនៃការគ្រប់គ្រង ការពារ និងអភិរក្សព្រៃសហគមន៍នេះប្រកបដោយនិរន្តរភាព៕
