.jpg)
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែនាំអាជ្ញាធរមូលដ្ឋានក្នុងខេត្តត្បូងឃ្មុំ យកចិត្តទុកដាក់ផ្តល់សេវាសាធារណៈ ព្រមទាំងលើកទឹកចិត្តឱ្យពលរដ្ឋចូលរួមធ្វើអនាម័យតាមលំនៅឋាន និងទីសាធារណៈផ្សេងៗ។ Sakhon Veng
កំពង់ចាមៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែនាំអាជ្ញាធរមូលដ្ឋានក្នុងខេត្តត្បូងឃ្មុំ យកចិត្តទុកដាក់ផ្តល់សេវាសាធារណៈ ព្រមទាំងលើកទឹកចិត្តឱ្យពលរដ្ឋចូលរួមធ្វើអនាម័យតាមលំនៅឋាន និងទីសាធារណៈផ្សេងៗ ដើម្បីសុខភាព និងសេចក្តីក្តីថ្លៃថ្នូរក្នុងសង្គមជាតិ។
ការណែនាំរបស់លោក វេង សាខុន ដូចនេះធ្វើឡើងក្នុងពិធីសម្ពោធឧបដ្ឋានសាលា និងសមិទ្ធផលផ្សេងៗទៀតក្នុងវត្តគីរីវង្ស ហៅវត្តស្រែវែង ក្នុងឃុំទឹកជ្រៅ ស្រុកតំបែរ ខេត្តត្បូងឃ្មុំ នៅថ្ងៃទី ២៦ ខែកុម្ភ: ឆ្នាំ ២០២២ នេះ។
លោករដ្ឋមន្ត្រីបានលើកទឹកចិត្ត ជំរុញ និងគាំទ្រគ្រប់រាល់សកម្មភាពទាំងអស់របស់ស្រុកក្នុងឆន្ទ:ចូលរួមកសាង និងអភិវឌ្ឍមូលដ្ឋានផ្ទាល់ បម្រើសុខភាពសាធារណ: ចូលរួមដោះស្រាយទុក្ខលំបាក កែលម្អកម្រិតជីវភាព និងអភិវឌ្ឍមូលដ្ឋានឱ្យកាន់តែរីកចម្រើនថែមទៀត ក្រោមម្លប់សុខសន្តិភាព ស្ថិរភាព និងការអភិវឌ្ឍរបស់ប្រទេសជាតិ។
លោកបញ្ជាក់ថា៖ «សុំឱ្យអាជ្ញាធរស្រុក ឃុំ ភូមិ ខិតខំយកចិត្តទុកដាក់ពង្រឹងប្រសិទ្ធភាពលើការផ្តល់សេវាសាធារណ:លើកទឹកចិត្តឱ្យបងប្អូនយកចិត្តទុកដាក់ធ្វើអនាម័យនៅតាមលំនៅឋាន ទីសាធារណ: វត្តអារាម ដងផ្លូវជាតិ សាលារៀន និងទីផ្សារដើម្បីសុខភាព និងសេចក្តីថ្លៃថ្នូរក្នុងសង្គមជាតិ»។
ជាមួយគ្នានោះ លោកក៏បានផ្តាំផ្ញើឱ្យយកចិត្តទុកដាក់មើលថែរក្សាសុខភាពជូនប្រជាពលរដ្ឋ ពង្រឹងការងារសន្តិសុខ និងសុវត្ថិភាពមូលដ្ឋានឱ្យបានល្អប្រសើរ និងបន្តអនុវត្តវិធានការ ៣ កុំ ៣ ការពារ។
លោក សុខ សារិទ្ធ អភិបាលនៃគណៈអភិបាលស្រុកតំបែរបានថ្លែងអំណរគុណយ៉ាងជ្រាលជ្រៅ ចំពោះប្រធានក្រុមការងារ និងសហការីទាំងអស់ដែលបានខិតខំពុះពារ យកអស់ស្មារតីទទួលខុសត្រូវខ្ពស់ក្នុងនាមជាប្រធានក្រុមការងារគណបក្សចុះមូលដ្ឋានស្រុកតំបែរ បានលះបង់កម្លាំងកាយចិត្ត និងធនធានផ្ទាល់ខ្លួន កៀរគរសប្បុរសជន រៀបចំកសាងសមិទ្ធផលទាំងវិស័យពុទ្ធចក្រ និងអាណាចក្រនេះឡើងទុកបម្រើឱ្យសេចក្តីត្រូវការរបស់ប្រជាពលរដ្ឋក្នុងសកម្មភាពជីវភាពប្រចាំថ្ងៃឱ្យបានកាន់តែសម្បូរសប្បាយ ស្របតាមបរិបទនៃគន្លងប្រក្រតីភាពថ្មី។
លោក សុខ សារិទ្ធ ប្រាប់ថា ស្រុកបានរួមសហការជាមួយក្រុមការងារគ្រប់ជាន់ថ្នាក់ ចុះដោះស្រាយបញ្ហាជូនប្រជាពលរដ្ឋបានទាន់ពេលវេលា និងមានប្រសិទ្ធភាពដូចជាភ្លើងឆេះផ្ទះ ខ្យល់កន្ត្រាក់ គ្រោះថ្នាក់ចរាចរ ចាស់ជរាគ្មានទីពឹង ការអនុវត្តគោលនយោបាយ ក៣ និងគោលនយោបាយភូមិ ឃុំមានសុវត្ថិភាពជាដើម។
លោកប្រាប់ទៀតថា សកម្មភាពនេះពិតជាបានឆ្លើយតបទៅនឹងកម្មវិធីជាតិកំណែទម្រង់រដ្ឋបាលសាធារណៈឆ្នាំ ២០២០-២០៣០ គោលនយោបាយកំណែទម្រង់វិមជ្ឈការ និងវិសហមជ្ឈការសម្រាប់ការអភិវឌ្ឍតាមបែបប្រជាធិបតេយ្យថ្នាក់ក្រោមជាតិរួមចំណែកអភិវឌ្ឍសេដ្ឋកិច្ច សង្គម ការពង្រឹងអភិបាលកិច្ច និងសមត្ថភាពមន្ត្រីរាជការសំដៅបង្កើនប្រសិទ្ធភាពសេវាសាធារណៈ ការពង្រឹងគោលនយោបាយ ភូមិ-ឃុំមានសុវត្ថិភាព សុខភាពសាធារណ: ដែលជាសេចក្តីត្រូវការចាំបាច់របស់ប្រជាពលរដ្ឋនៅក្នុងស្រុកតំបែរទាំងមូល៕
