.jpg)
នគរបាលប្រឆាំងបទល្មើសសេដ្ឋកិច្ចបានដឹកនាំកម្លាំងចុះសហការជាមួយកម្លាំងអធិការដ្ឋាននគរបាលស្រុកប្រាសាទបាគង បង្ក្រាបបានឈើប្រណីត ១៨ ដុំ នៅថ្ងៃទី ២៤ ខែកុម្ភៈ ឆ្នាំ ២០២២។ នគរបាលជាតិ
សៀមរាបៈ នគរបាលប្រឆាំងបទល្មើសសេដ្ឋកិច្ចបានដឹកនាំកម្លាំងចុះសហការជាមួយកម្លាំងអធិការដ្ឋាននគរបាលស្រុកប្រាសាទបាគង បង្ក្រាបបានឈើប្រណីត ១៨ ដុំ នៅថ្ងៃទី ២៤ ខែកុម្ភៈ ឆ្នាំ ២០២២ តាមផ្លូវជាតិលេខ ០៦ ស្ថិតនៅភូមិរកាកំបុត ឃុំត្រពាំងធំ ស្រុកប្រាសាទបាគង ខេត្តសៀមរាប។
របាយការណ៍របស់អគ្គស្នងការនគរបាលជាតិបានឱ្យដឹងថា នៅថ្ងៃទី ២៤ ខែកុម្ភ: ឆ្នាំ ២០២២ វេលាម៉ោង ១៥:០០ នាទីល្ងាច លោកវរសេនីយ៍ត្រី ព្រាប រីសារ៉េត នាយរងការិយាល័យនគរបាលប្រឆាំងបទល្មើសសេដ្ឋកិច្ចបានដឹកនាំកម្លាំងចុះសហការជាមួយកម្លាំងអធិការដ្ឋាននគរបាលស្រុកប្រាសាទបាគង បង្ក្រាប និងប្រគល់ទទួលករណីបទល្មើសដឹកផល អនុផលព្រៃឈើខុសច្បាប់។
ក្នុងប្រតិបត្តិការនោះ សមត្ថកិច្ចបង្ក្រាបបានរថយន្តម៉ាកកាម៉ារីបាឡែនពណ៌សពាក់ស្លាកលេខភ្នំពេញ 2Q 5242 ដែលបានដឹកឈើធ្នង់ ចំនួន ១៨ ដុំ គ្មានលិខិតអនុញ្ញាតក្នុងពេលបង្កគ្រោះថ្នាក់ចរាចរណ៍កាលពីថ្ងៃទី ១៩ ខែកុម្ភៈ ឆ្នាំ ២០២២ វេលាម៉ោង ២០ និង ០០ នាទី តាមផ្លូវជាតិលេខ ០៦ ស្ថិតនៅភូមិរកាកំបុត ឃុំត្រពាំងធំ ស្រុកប្រាសាទបាគង ខេត្តសៀមរាប។
សូមបញ្ជាក់ថា វត្ថុតាងដែលកម្លាំងចម្រុះរកឃើញរួមមានៈ រថយន្តម៉ាកកាម៉ារីបាឡែន ចំនួន ១ គ្រឿង ឈើធ្នង់ ចំនួន ១៨ ដុំ ស្មើនឹង ០,៨៩១ ម៉ែត្រគុប។ ក្រោយពិនិត្យ និងធ្វើកំណត់ហេតុរួច សមត្ថកិច្ចចម្រុះបានប្រគល់ទៅឱ្យមន្ត្រីខណ្ឌរដ្ឋបាលព្រៃឈើស្រុកប្រាសាទបាគង ដើម្បីអនុវត្តបន្តតាមនីតិវិធីច្បាប់៕
