ភ្នំពេញៈ គណៈកម្មការជាតិរៀបចំការបោះឆ្នោត «គ.ជ.ប» និងអ្នកជំនាញការរបស់ជប៉ុន កាលពីថ្ងៃទី ២៥ ខែកុម្ភៈ ឆ្នាំ ២០២២ បានផ្លាស់ប្តូរបទពិសោធន៍លើការរៀបចំកិច្ចការការងារបោះឆ្នោត និងការអប់រំអ្នកបោះឆ្នោត រវាងប្រទេសទាំងពីរ សម្រាប់ត្រៀមអនុវត្តដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី ៥ ដែលនឹងប្រព្រឹត្តិទៅនៅថ្ងៃទី ៥ ខែមិថុនា ឆ្នាំ ២០២២ ខាងមុខនេះ ។
លោក ហង់ ពុទ្ធា អ្នកនាំពាក្យ គ.ជ.ប ប្រាប់ភ្នំពេញប៉ុស្តិ៍នៅថ្ងៃទី ២៧ ខែកុម្ភៈនេះ ថា ភាគីជប៉ុន បានបង្ហាញបទពិសោធន៍នៃការអប់រំដល់សាធារណៈជន និងអ្នកបោះឆ្នោតនៅក្នុងប្រទេសជប៉ុនជូនមកដល់គ.ជ.ប ដើម្បីអនុវត្តសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី ៥នេះ ។ ជាមួយគ្នានេះ គ.ជ.ប ក៏បានចែករំលែកនូវការប្រើប្រាស់បច្ចេកវិទ្យា នៅក្នុងវិស័យបោះឆ្នោតនេះជូនដល់អ្នកជំនាញការរបស់ប្រទេសជប៉ុនផងដែរ។
លោកបន្តថា តាមរយៈជំនួបពិភាក្សានេះ គ.ជ.ប ក៏បានស្នើសុំអ្នកជំនាញការបស់ប្រទេសជប៉ុនឱ្យជួយបន្តលើសេវាផ្ទុកទិន្នន័យ អ្នកបោះឆ្នោត ព្រោះសម្ភារៈមួយចំនួន ក៏ទទួលរងនូវការខូចខាត និង រេចរិល ខណៈបច្ចុប្បន្ននេះ អ្នកជំនាញការបស់ជប៉ុនផ្នែកអប់រំសាធារណៈជន និងអ្នកបោះឆ្នោតមួយចំនួន បាននឹងកំពុងបម្រើការងារជាមួយ គ.ជ.ប ដោយផ្ទាល់។
លោកថ្លែងថា៖ « ពួកគាត់ បានលើកយកការចែករំលែកជាច្រើនពាក់ព័ន្ធនឹងបទពិសោធន៍នៅក្នុងប្រទេសជប៉ុន ហើយ គាត់សង្ឃឹម គ.ជ.ប នឹងជ្រើសរើសយកវិធីសាស្ត្រណាមួយ តាមដែលយើងគិតថា សមស្របស្ថានភាពនៃប្រទេសយើង ។ មួយវិញវិញទៀត ជប៉ុនបានបញ្ជាក់ប្រកបដោយបទពិសោធដែរថា នៅពេលមន្ត្រីគ.ជ.ប ចុះអប់រំដោយ ផ្ទាល់ជាមួយប្រជាពលរដ្ឋ ធ្វើឱ្យប្រជាពលរដ្ឋស្គាល់មន្ត្រីបោះឆ្នោត នៅពេលដែលគាត់ស្គាល់ហើយ គាត់មានភាពជឿជាក់ដល់ស្ថាប័នគ.ជ.ប »។
លោកបញ្ជាក់ទៀតថា ពាក់ព័ន្ធនឹងបញ្ហានេះ គ.ជ.ប បានកត់សម្គាល់ និងត្រៀមខ្លួនរួចជាស្រេចដែលបច្ចុប្បន្នកំពុងសហការផង និង ត្រៀមសហការទៅមុខទៀត ក្នុងការរៀបចំ និងអប់រំអ្នកបោះឆ្នោត ព្រោះភាគីជប៉ុន បានជួយកម្ពុជាលើផ្នែករៀបចំការបោះឆ្នោននេះ ចាប់តាំងពីកម្ពុជារៀបចំការបោះឆ្នោត ដំបូង រហូតមកទល់នឹងពេលនេះ ។
ទោះជាយ៉ាងណា ភាគីជប៉ុន មិនទាន់ឆ្លើយតបយ៉ាងណានៅឡើយទេ ចំបោះការស្នើសុំជំនួយបន្ថែម ប៉ុន្តែ គ.ជ.ប មានក្តីរំពឹងថា ភាគីជប៉ុននឹងស្ថិតនៅ ជាមួយនឹង គ.ជ.ប ជារៀងរហូត និងគ្រប់កាលៈទេសៈ សម្រាប់ការងារ អប់រំ អ្នកបោះឆ្នោត និងសាធារណៈជន ជាដើម និងអ្វីៗផ្សេងទៀត ដែលភាគីជប៉ុន អាចធ្វើបាន ។
បើតាម លោក ហង់ ពុទ្ធា ជប៉ុន គឺជាមិត្តស្មោះត្រង់ជាមួយកម្ពុជា និងដើរតួនាទីដ៏មានសារៈសំខាន់ណាស់ក្នុងដំណើរការក្នុងដំណើររៀបចំការបោះឆ្នោតនីមួយៗ ព្រោះ ជប៉ុន មិនសម្លឹងមករកផលប្រយោជន៍ខាងនយោបាយណាមួយជាមួយកម្ពុជានោះទេ ជប៉ុនស្ថិតនៅជាមិត្ត ហើយ ជួយជាលក្ខណៈជាទូទៅ ជាពិសេស ប្រជាពលរដ្ឋ ដោយមិនមានលក្ខខណ្ឌអ្វី នោះទេ ។
ពាក់ព័ន្ធនឹងបញ្ហានេះ លោក សោម សូរីដា អគ្គលេខាធិការរងគ.ជ.ប ប្រាប់ភ្នំពេញប៉ុស្តិ៍នៅថ្ងៃទី ២៧ខែកុម្ភៈនេះថា ភាគីជប៉ុនបានជួយដល់ដំណើរការរៀបចំការបោះឆ្នោតដល់កម្ពុជា ចាប់តាំងពីកម្ពុជារៀបចំការបោះឆ្នោតដោយខ្លួនកាលពីឆ្នាំ១៨៩៨ រហូតមក។ ដូច្នេះ តួនាទីរបស់ភាគីជប៉ុនដែលបានជួយដល់គ.ជ.ប គឺពិតជាមានអត្ថន័យយ៉ាងធំធេង ព្រោះប្រទេសជប៉ុន គឺជាប្រទេសអនុវត្តនូវការបោះឆ្នោតតាមរបបប្រជាធិប្បតេយ្យសេរី ពហុបក្ស និងមួយវិញទៀត ការជួយរបស់ភាគីជប៉ុននេះគឺជាជំនួយស្ថាបនាពិតប្រាកដ ដោយប្រាថ្នាឱ្យកម្ពុជា និងប្រជាពលរដ្ឋមានគោលការណ៍រួមមួយ និងលក្ខណៈពិសេសសម្រាប់ដំណើរការបោះឆ្នោត។
លោកបន្តថា ទោះជាមានការវាយតម្លៃមួយចំនួនថា ការរៀបចំការបោះឆ្នោតរបស់កម្ពុជា មិនទាន់មានស្តងដារ និងមិនមានប្រទេសណាមួយជួយដល់កម្ពុជានោះទេ ប៉ុន្តែ ភាគីជប៉ុននៅតែបន្តជួយដល់គ.ជ.ប ក្នងការរៀបចំការបោះឆ្នោតគ្រប់អាណត្តិ។ ជាក់ស្តែងកាលពីឆ្នាំ ២០២១ កន្លងមកនេះ ភាគីជប៉ុនបានបញ្ជូនអ្នកជំនាញការផ្នែកខាងអប់រំអ្នកបោះឆ្នោត មកធ្វើការនៅគ.ជ.ប ដើម្បីរៀបចំកម្មវិធី និងសកម្មភាពការងាររបស់គ.ជ.ប ក្នុងគោលដៅអប់រំអ្នកបោះឆ្នោត។
លោកថ្លែងថា៖ « អីចឹងទេ កាលពីប៉ុន្មានថ្ងៃមកនេះ ភាគីជប៉ុន ដែលអញ្ជើញមកពិភាក្សាជាមួយគ.ជ.ប នេះ គឺជាអតីតប្រធានគណៈកម្មការរៀបចំការបោះឆ្នោតជប៉ុន ។ ពួកគាត់មកសិក្សាពីយើងផង គាត់ផ្តល់បទពិសោធន៍ជប៉ុនឱ្យមកគ.ជ.ប ផង ។ អីចឹង យើងពិតជាមានមោនភាព យើងមិនឯកោទេ យើងនៅជាមួយនឹងពិភពលោក ដោយមានភាគីជប៉ុនជួយកិច្ចការងារបោះឆ្នោតដែរ»៕