.jpg)
ជនសង្ស័យចាប់រំលោភ ក្រោយពេលសមត្ថកិច្ចចាប់ខ្លួន ។ រូបថត ហ្វេសប៊ុក
បន្ទាយមានជ័យៈតុលាការខេត្តបន្ទាយមានជ័យសម្រេចឃុំខ្លួនបុរសស្រវឹងខួបម្នាក់ក្នុងពន្ធនាគារខេត្ត បន្ទាប់ពីសមត្ថកិច្ចចាប់ខ្លួនបាន២ថ្ងៃ ពាក់ព័ន្ធចាប់ក្មេងស្រីវិកលចរិតម្នាក់រំលោភសេពសន្ថវៈប្រព្រឹត្តនៅឃុំណាំតៅ ស្រុកភ្នំស្រុក ខេត្តបន្ទាយមានជ័យ។
លោកស្រី ឌី សុជាតិ ស្នងការរងទទួលផែនការងារនគរបាលប្រឆាំងការជួញដូរមនុស្ស និងការពារអនីតិជន ខេត្ត បន្ទាយមានជ័យឱ្យភ្នំពេញប៉ុស្តិ៍ដឹងនៅថ្ងៃទី២៧ កុម្ភៈថា បុរសឈ្មោះ ដូត ពៅ អាយុ៥៤ឆ្នាំ ត្រូវបានចៅក្រមស៊ើបសួរ នៃសាលាដំបូងខេត្តបន្ទាយមានជ័យចេញដីកាឃុំនៅពន្ធនាគារហើយ។
លោកស្រីថ្លែងថា៖«ករណីជនសង្ស័យម្នាក់នេះត្រូវបានចៅក្រមស៊ើបសួរសម្រេចចេញដីកាឃុំព្រឹកមិញនេះឯង(ថ្ងៃទី២៧កុម្ភៈ)។ ការឃុំខ្លួននេះពាក់ព័ន្ធនឹងការរំលោភសេពសន្ថវៈ»។
លោក ឃុំ វ៉ាយ នាយនគរបាលប៉ុស្តិ៍ឃុំ ណាំតៅ ក្នុងស្រុកភ្នំព្រឹក បានប្រាប់នៅថ្ងៃទី២៧ កុម្ភៈថា ក្មេងស្រីរងគ្រោះឈ្មោះ ម.ណ អាយុ១៥ឆ្នាំ រស់នៅក្នុងឃុំ ណាំតៅ ស្រុកភ្នំព្រឹក ខេត្តបន្ទាយមានជ័យ និងមានឪពុកម្តាយជាអ្នកស៊ីឈ្នួលធ្វើចម្ការដំបូងមីឱ្យគេប៉ុន្តែក្មេងរងគ្រោះជាមនុស្សសតិមិនគ្រប់ទេ។
លោកបន្តតាមសម្តីសាច់ញាតិរបស់ក្មេងស្រីរងគ្រោះថាជនសង្ស័យឈ្មោះដូត ពៅ ជាមនុស្សញៀនស្រាស្រវឹងខួបស្ទើរតែបាត់ស្មារតីទៅហើយ ហើយក្មេងស្រីរងគ្រោះក៏ជាមនុស្សវិកលចរិតដែរ។ នៅមុនពេលកើតហេតុថ្ងៃទី២៥ កុម្ភៈ ឆ្នាំ២០២២ ក្មេងស្រីរងគ្រោះបានដើរលេងក្នុងភូមិ ហើយក៏ត្រូវបានជនសង្ស័យចាប់អូសចូលក្នុងផ្ទះ និងធ្វើសកម្មភាពចាប់បង្ខំរំលោភក្មេងរងគ្រោះរហូតបានសម្រេចតែម្តង។
លោកបន្តទៀតថា តែចៃដន្យ ខណៈជនសង្ស័យកំពុងធ្វើសកម្មភាពពោបលើនាង ស្រាប់តែមានបុរសម្នាក់ឈ្មោះឆាវ ឈួរ អាយុ៤០ឆ្នាំ ដែលជាមនុស្សញៀនស្រាដូចគ្នាបានដើរចូលទៅទាន់ ហើយបានស្រែកប្រាប់ជនសង្ស័យកុំឱ្យធ្វើបាបក្មេងរងគ្រោះ។ ភ្លាមៗនោះបុរសដែលបានឃើញហេតុការណ៍នោះបានទៅប្រាប់យាយរបស់ក្មេងរងគ្រោះ និងប្តឹងមកសមត្ថកិច្ចរបស់លោកនៅថ្ងៃទី២៥ កុម្ភៈតែម្តង។
លោកឃុំ វ៉ាយ បញ្ជាក់ថា៖«យាយរបស់ក្មេងរងគ្រោះបានមកប្តឹងខ្ញុំហើយខ្ញុំបានសុំគោលការណ៍ពីលោក ប៉ិក គឹមហ៊ាក អធិការនគរបាលស្រុកភ្នំស្រុកចុះចាប់ខ្លួននៅថ្ងៃនោះឯង។គាត់បានសារភាពប្រាប់យើងអំពីរឿងនេះអស់ហើយ»។
បើតាមលោកឃុំ វ៉ាយ ជនសង្ស័យម្នាក់នេះមានប្រពន្ធកូនដែរ ប៉ុន្តែដោយសារតែគាត់ញៀនស្រាចេះតែដើរផឹកដែលហាក់ក្លាយទៅជាមនុស្សវិកលចរិតទៅហើយ។ដោយឡែកក្មេងស្រីរងគ្រោះក៏បានឆ្លើយស៊ីចង្វាក់នឹងចម្លើយរបស់ជនសង្ស័យដែរ ទើបសមត្ថកិច្ចសម្រេចឃាត់ខ្លួនទៅ៕
