.jpg)
ពិធីបិទវគ្គជំនាញអប់រំអ្នកបោះឆ្នោតកាលពីថ្ងៃទី២៥ខែកុម្ភ។ រូបថត គ.ជ.ប
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) គណៈកម្មការរាជធានី ខេត្តរៀបចំការបោះឆ្នោត (គធ.ខប) សមាគម និងអង្គការមិនមែនរដ្ឋាភិបាល ប្តេជ្ញារួមគ្នារៀបចំគម្រោងផែនការ អប់រំអ្នកបោះឆ្នោត និងអនាគតអ្នកបោះឆ្នោតឱ្យបានហ្មត់ចត់ ច្បាស់លាស់ មានប្រសិទ្ធភាព និងមានលក្ខណៈវិទ្យាសាស្ត្រគ្រប់ជ្រុងជ្រោយ។
យោងតាមលិខិតប្រកាសព័ត៌មានរបស់ គ.ជ.ប. នៅថ្ងៃទី ២៥ ខែកុម្ភៈ បានឱ្យដឹងថា សិក្ខាសាលារយៈពេល ២ ថ្ងៃ ស្តីពីការអប់រំអ្នកបោះឆ្នោតជាប្រចាំនៅកម្ពុជា សម្រាប់មន្ត្រី គណៈកម្មាធិការជាតិរៀបចំការបោះឆ្នោត (គ.ជ.ប) គណៈកម្មការរាជធានី ខេត្តរៀបចំការបោះឆ្នោត (គធ.ខប) សមាគម និងអង្គការមិនមែនរដ្ឋាភិបាល ត្រូវបានបិទបញ្ចប់ដោយជោគជ័យកាលពីថ្ងៃទី២៥ ខែកុម្ភៈ ឆ្នាំ២០២២ នៅសណ្ឋាគារកាំបូឌីយ៉ាណា។
លោក ទេព នីថា អគ្គលេខាធិការ គ.ជ.ប បានវាយតម្លៃខ្ពស់ និងកោតសរសើរដោយស្មោះចំពោះមន្ត្រី គ.ជ.ប គ្រប់លំដាប់ថ្នាក់ ប្រធានលេខាធិការដ្ឋានរាជធានី ខេត្តរៀបចំការបោះឆ្នោត តំណាងអង្គការមិនមែនរដ្ឋាភិបាល ជាពិសេស គណៈកម្មការរៀបចំការ បោះឆ្នោតទីក្រុងតូក្យូ (ECT/ គ.ជ.ប ជប៉ុន) តំណាងស្ថានទូតជប៉ុនប្រចាំកម្ពុជា តំណាងទីស្នាក់ការ កណ្តាល និងការិយាល័យ JICA ព្រមទាំងអ្នកពាក់ព័ន្ធទាំងអស់ ដែលបានរួមសហការគ្នាខិតខំ ផ្តល់គំនិតដ៏ឧត្តុង្គឧត្តម ដើម្បីធ្វើឱ្យសិក្ខាសាលាមួយនេះទទួលបានលទ្ធផលល្អ។
លោក ទេព នីថា បានថ្លែងថា នេះគឺជាសិក្ខាសាលាលើកដំបូងនៃការអនុវត្តកម្មវិធីរួមគ្នារបស់ គ.ជ.ប និង JICA ដើម្បីរួមគ្នាអភិវឌ្ឍន៍សមត្ថភាព ចំណេះដឹង ក្នុងគោលដៅ ធានាឱ្យបាននូវផែនការ កម្មវិធីអប់រំអ្នកបោះឆ្នោតជាប្រចាំមានភាពពេញលេញគ្រប់គ្រាន់ គ្រប់ជ្រុងជ្រោយ ច្បាស់លាស់ និងមានប្រសិទ្ធភាព ជាមួយការគោរពយ៉ាងខ្ជាប់ខ្ជួននូវគោលការណ៍ លទ្ធិប្រជាធិបតេយ្យសេរីពហុបក្ស ការគោរពសិទ្ធិ និងសេចក្តីថ្លៃថ្នូរ ដើរទន្ទឹមគ្នានឹងបច្ចេកវិទ្យា វិទ្យាសាស្ត្រ និងព័ត៌មានវិទ្យា នាពេលបច្ចុប្បន្ន។
អគ្គលេខាធិការ គ.ជ.ប បានលើកឡើងថា ផ្អែកតាមរបាយការណ៍សង្ខេបនៃអង្គសិក្ខាសាលានេះ អ្នកពាក់ព័ន្ធទាំងអស់ ត្រូវរួមគ្នាសម្រេចឱ្យបាននូវទិសដៅសំខាន់ៗចំនួន៣ រួមមានទី១ ត្រូវខិតខំរួមសហការគ្នារៀបចំគម្រោងផែនការអប់រំអ្នកបោះឆ្នោត និងអនាគតអ្នកបោះឆ្នោតឱ្យបានហ្មត់ចត់ ច្បាស់លាស់ មានប្រសិទ្ធភាព និងមានលក្ខណៈវិទ្យាសាស្ត្រគ្រប់ ជ្រុងជ្រោយ។
ទី២ រៀបចំបង្កើតឯកសារមេរៀនអប់រំ និងឯកសារបណ្ដុះបណ្ដាលឱ្យបានល្អគ្រប់គ្រាន់ ផ្អែកតាមច្បាប់ បទបញ្ជា និងនីតិវិធីបច្ចុប្បន្នភាព និងតាមរយៈស្មារតីនៃអង្គសិក្ខាសាលានាពេលនេះផងដែរ។ និងទី៣ បង្កើតក្រុមគ្រូឧទ្ទេសបណ្តុះបណ្តាល ក្រុមគ្រូបង្គោលអប់រំដែលមានជំនាញច្បាស់លាស់ មានគរុកោសល្យត្រឹមត្រូវ មានបទពិសោធន៍ ច្នៃប្រឌិត និងមានភាពវាងវៃគ្រប់គ្រាន់ ដែលអាចឆ្លើយតបទៅនឹងសេចក្តីត្រូវការចាំបាច់។
ជាមួយគ្នានេះដែរ ឯកឧត្តម ទេព នីថា បានជម្រាបជូនអង្គសិក្ខាសាលាថា ក្នុងរយៈពេលចាប់ ពីឆ្នាំ២០២២ រហូតដល់ឆ្នាំ២០២៤ គ.ជ.ប ត្រូវរៀបចំការបោះឆ្នោតចំនួន ៤ ទៅតាមការកំណត់នៃច្បាប់ដែលរួមមាន៖ ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ថ្ងៃទី៥ ខែមិថុនា ឆ្នាំ២០២២ ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ និង ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ លើកទី៤ ឆ្នាំ២០២៤។
លោក ទេព នីថា បានសង្កត់ធ្ងន់ថា៖«តាមបទពិសោធន៍ដើម្បីសម្រេចបានជោគជ័យ លើការងាររៀបចំការបោះឆ្នោតទាំងអស់នេះ គឺមានតែការរួមសហការគ្នា អនុវត្តប្រកបដោយ ការទទួលខុសត្រូវតាមតួនាទីតាមការកំណត់នៃច្បាប់ និងសមស្របតាមសភាពការណ៍ជាក់ស្តែង»។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា ថ្លែងនៅថ្ងៃទី ២៧ ខែកុម្ភៈថា ជារឿងល្អមួយដែល គ.ជ.ប. និងអង្គការមិនមែនរដ្ឋាភិបាលមួយចំនួនប្តេជ្ញារួមគ្នាបង្កើតគម្រោងផែនការអប់រំអ្នកបោះឆ្នោតដើម្បីលើកកម្ពស់ការយល់ដឹង និងការចូលរួមការបោះឆ្នោតនៅពេលខាងមុខ។ ប៉ុន្តែទោះជាយ៉ាងណាត្រូវឲ្យមានការចូលរួមពីអាជ្ញាធរមូលដ្ឋាន នៅក្នុងការធានាបាននូវលំហប្រជាធិបតេយ្យដើម្បីឲ្យប្រជាពលរដ្ឋ និងភាគីពាក់ព័ន្ធទាំងអស់អាចធ្វើសកម្មភាពលើកកម្ពស់ការ យល់ដឹងនិងការចូលរួមរបស់ប្រជាពលរដ្ឋ។
លោកថ្លែងថា៖«កន្លងមកនេះ ក៏មានការគាបសង្កត់ ឬក៏ការរំខានពីអាជ្ញាធរមូលដ្ឋានទាក់ទងនឹងសកម្មភាពរបស់គណបក្សនយោបាយ និងអង្គការសង្គមស៊ីវិលមួយចំនួនដែលធ្វើសកម្មភាពដើម្បីលើកកម្ពស់ការយល់ដឹង និងការចូលរួមរបស់ប្រជាពលរដ្ឋសម្រាប់ការបោះឆ្នោតនៅពេលខាងមុខ» ។
លោក ឡឹក សុធា អ្នកនាំពាក្យគណបក្សប្រជាធិបតេយ្យមូលដ្ឋាន ថ្លែងនៅថ្ងៃទី ២៧ ខែកុម្ភៈថា បើសិនជា គ.ជ.ប បង្កើតវគ្គបណ្តុះបណ្តាល ឬផ្សព្វផ្សាយអំពីការបោះឆ្នោតនោះជារឿងល្អ ព្រោះការធ្វើបែបនេះជាហេតុនាំឲ្យមានការជ្រួតជ្រាបដល់ប្រជាពលរដ្ឋមួយចំនួនចាប់ផ្តើមយល់អំពីសិទ្ធិរបស់ខ្លួន ដើម្បីអនុវត្តសិទ្ធិ អនុវត្តកតព្វកិច្ចក្នុងការជ្រើសរើសអ្នកដឹកនាំបានល្អតាំងពីថ្នាក់មូលដ្ឋាន រហូតដល់ថ្នាក់ជាតិ។
លោកថ្លែងថា៖«វាជារឿងល្អ ជាទូទៅប្រសិនបើប្រជាពលរដ្ឋបានយល់ដឹងអំពីការបោះឆ្នោត សារៈប្រយោជន៍នៃការបោះឆ្នោត នីតិវិធីនៃការបោះឆ្នោត និងចំណុចផ្សេងៗទៀតដែលធានាបានដល់តម្លាភាព សេរីភាព និងយុត្តិធម៌នៅក្នុងការបោះឆ្នោត» ៕
