.jpg)
ទិដ្ឋភាពរថយន្តដឹកឈើក្រឡាប់ក្រោយបុកគ្នាជាមួយរថយន្ត២គ្រឿងផ្សេងទៀត។ រូបថត ហ្វេសប៊ុក
កំពង់ធំៈ សមត្ថកិច្ចនគរបាលស្រុកបារាយណ៍ ខេត្តកំពង់ធំកំពង់បន្តនីតិវិធីស្រាវជ្រាវ លើករណីគ្រោះថ្នាក់ចរាចរណ៍រថយន្តដឹកឈើដ៏ធំមួយគ្រឿង បុករះរថយន្តLexus 330 និង រថយន្ត RAV4បណ្ដាលឲ្យមនុស្សប្រុស-ស្រី៤នាក់រងរបួសធ្ងន់ និងស្រាល។
លោក ទូច ដារា អធិការរងស្រុកបារាយណ៍ ទទួលបន្ទុកផ្នែកចរាចរណ៍ បានប្រាប់ភ្នំពេញប៉ុស្តិ៍នៅថ្ងៃទី២៧ ខែកុម្ភៈថា ក្រោយពេលកើតហេតុភាគីអ្នកបើកបររថយន្តដឹកឈើ បានរត់គេចខ្លួន បន្សល់ទុកតែរថយន្តមានពាក់ស្លាកលេខ ភ្នំពេញ3A-9224ក្រឡាប់ផ្ងារជើង និង ឈើដ៏ច្រើនសន្ធឹកសន្ធាប់ នៅលើកំណាត់ផ្លូវជាតិលេខ៦A ត្រង់ចំណុចបង្គោលគីឡូម៉ែត្រលេខ១២៦ ស្ថិតនៅក្នុងភូមិត្រពាំងស្វាយឃុំបល្ល័ង្គ ស្រុកបារាយណ៍ ខេត្តកំពង់ធំ។ ចំណែកភាគីរថយន្ត Lexus 330 និង រថយន្តRAV4 បានរងរបួសធ្ងន់និងស្រាល។
លោក ដារា បានបញ្ជាក់ថា៖«តំណាងភាគីរថយន្ត Lexus330 និង RAV4 បានអះអាងថា រថយន្តដឹកឈើដ៏ធំនោះ ជាអ្នកបង្កគ្រោះថ្នាក់ចរាចរណ៍ មកលើពួកគេ។ ទោះយ៉ាងណា មកទល់ពេលនេះ យើងនៅមិនទាន់សម្រេចធ្វើការសន្និដ្ឋាន ឬ ដាក់បន្ទុកទៅលើភាគីណាមួយនៅឡើយទេ។ យើងកំពុងរង់ចាំភាគីអ្នកបើកបររថយន្តដឹកឈើ ចូលខ្លួនមកឆ្លើយបំភ្លឺជាមុនសិន»។
បើតាមលោក ដារា នៅពេលនេះ សមត្ថកិច្ចបានស្ទូចរថយន្តវត្ថុតាងនៃបទល្មើសគ្រោះថ្នាក់ចរាចរណ៍ទាំង៣គ្រឿង ទៅរក្សាទុក នៅអធិការដ្ឋាននគរបាលស្រុកបារាយណ៍ ដើម្បីរង់ចាំគ្រប់ភាគីទាំងអស់ចូលខ្លួនមកសម្របសម្រួលដំណោះស្រាយតាមផ្លូវច្បាប់។
ជុំវិញករណីនេះ អ្នកស្រី មាស មុន្នីឡែន តំណាងភាគីរថយន្ត Lexus 330 បានប្រាប់ភ្នំពេញប៉ុស្តិ៍ថា គាត់និងប្ដីរបស់គាត់ គឺលោក នឹង ម៉ារីណា បានរងរបួសស្រាល ប៉ុន្តែរថយន្តរបស់គាត់ខូចខាតយ៉ាងដំណំ ក្រោយពីរថយន្តឡានដឹកឈើ បានបុកទង្គិចបណ្ដាលឲ្យដាច់កង់មុខផ្នែកខាងឆ្វេង។
អ្នកស្រីបានថ្លែងថា៖«ខ្ញុំបានចូលខ្លួនឆ្លើយបំភ្លឺប្រាប់សមត្ថកិច្ចនគរបាលរួចហើយលើករណីនេះ គឺ រថយន្តឡានធំដឹកឈើនោះ បានបើកមកបុករថយន្តរបស់ពួកយើង រួចបន្តទៅបុករថយន្តមួយគ្រឿងទៀត មុនពេលក្រឡាប់»។
ជាមួយគ្នានេះ តំណាងភាគីខាងរថយន្ត RAV4 លោក អ៊ឹង ស៊ីគ័ង អាយុ៥៧ឆ្នាំ ជាជនជាតិចិន បានប្រាប់ភ្នំពេញប៉ុស្តិ៍ថា គាត់រងរបួសស្រាល ប៉ុន្តែប្រពន្ធរបស់គាត់ គឺលោកស្រី ហ្វូ ម៉ីលីញ អាយុ៥៥ឆ្នាំ បានរងរបួសធ្ងន់ ក្រោយពីរថយន្តដឹកឈើដ៏ធំនោះ បានបុកមកលើរថយន្តរបស់គាត់។ បច្ចុប្បន្ន ពួកគាត់កំពុងសម្រាកព្យាបាលនៅឯមន្ទីរពេទ្យរ៉ូយ៉ាល់ភ្នំពេញ។
លោកស៊ីគ័ង បានបញ្ជាក់ថា៖«ប្រពន្ធខ្ញុំជាអ្នកបើកបរ គាត់បានរងរបួសបាក់ឆ្អឹងជំនី និងឆ្អឹងត្រគាក។ ចំណែកខ្ញុំជាអ្នករួមដំណើរលើរថយន្ត RAV4 រងរបួសដៃបន្តិចបន្តួចប៉ុណ្ណោះ»។
លោកបានបន្ថែមថា៖«ឡានធំដឹកឈើនោះ បើកលឿនណាស់។ បន្ទាប់មកបានបុកជាមួយឡានតូចមួយគ្រឿង នៅពីមុខឡានរបស់ពួកយើង ហើយឡានធំនោះបានបន្តមកបុកឡានពួកយើង រួចហើយក៏ក្រឡាប់តែម្ដង»។
បើតាមលោកស៊ីគ័ង នៅពេលនេះ ខាងក្រុមហ៊ុនធានារ៉ាប់រងមួយ ដែលលោកនិងភរិយាបានទិញសេវ៉ាធានារ៉ាប់រងជីវិត និងគ្រោះថ្នាក់ផ្សេងៗ កំពុងចុះធ្វើការលើករណីនេះ ជំនួសលោកនិងប្រពន្ធរបស់លោក ដែលកំពុងសម្រាកព្យាបាលនៅមន្ទីរពេទ្យ។
ជុំវិញករណីគ្រោះថ្នាក់ចរាចរណ៍ឡានធំបុករះហើយក្រឡាប់ផ្ងារជើង ធ្លាយចេញឈើជាច្រើនម៉ែត្រគូបនេះផងដែរ លោក ដារា បាននិយាយថា ឡានដឹកឈើនោះ ធ្វើដំណើរមកពីខេត្តព្រះវិហារ។ ឈើទាំងនោះត្រូវបានក្រុមសមត្ថកិច្ចជំនាញផ្នែករដ្ឋបាលព្រៃឈើកំពង់ថ្ម នាំយកទៅរក្សាទុក ដើម្បីរង់ចាំម្ចាស់ឈើមកបំភ្លឺ។
ជុំវិញករណីឈើនេះ ភ្នំពេញប៉ុស្តិ៍ នៅថ្ងៃទី២៧ ខែកុម្ភៈ បានព្យាយាមទាក់ទងតាមទូរសព្ទ័ជាច្រើនដង ទៅលោក មុំ សុផល នាយផ្នែករដ្ឋបាលព្រៃឈើ កំពង់ថ្ម និង លោក ប៊ុន សុទ្ធី នាយខណ្ឌរដ្ឋបាលព្រៃឈើខេត្តកំពង់ធំ ដើម្បីស្នើសុំការបំភ្លឺ ថាតើឈើទាំងនោះមានចំនួនប៉ុន្មានម៉ែត្រគូប និង មានច្បាប់អនុញ្ញាតឲ្យដឹកជញ្ជូនដែរឬយ៉ាងណា? ប៉ុន្តែ លោកទាំង២ មិនបានលើកទូរស័ព្ទនោះទេ។
យ៉ាងណាក៏ដោយ លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់និងនេសាទ បានបញ្ជាក់ប្រាប់ភ្នំពេញប៉ុស្តិ៍យ៉ាងខ្លីថាឈើទាំងនោះ «មានច្បាប់អនុញ្ញាត»ចេញដោយសមត្ថកិច្ចខណ្ឌរដ្ឋបាលព្រៃឈើព្រះវិហារ៕
