តាកែវៈ សមត្ថកិច្ចនគរបាលខេត្តតាកែវបានបញ្ជូនបុរសម្នាក់ទៅតុលាការនៅថ្ងៃទី ២៧ ខែកុម្ភៈនេះ ដើម្បីចាត់ការតាមនីតិវិធី បន្ទាប់ពីចាប់ខ្លួនបាននៅថ្ងៃទី ២៦ ខែកុម្ភៈ ឆ្នាំ ២០២២ ក្រោយពីបានសម្លាប់សត្វប្រើសយកសាច់ និងស្នែងនៅក្នុងសួនសត្វភ្នំតាម៉ៅ។
លោក យុង ញីវ ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តតាកែវ ថ្លែងនៅថ្ងៃទី ២៧ ខែកុម្ភៈថា ជនសង្ស័យដែលសម្លាប់សត្វប្រើស យកសាច់ និងស្នែងសត្វប្រើសត្រូវបានសមត្ថកិច្ចជំនាញការិយាល័យព្រហ្មទណ្ឌកម្រិតស្រាលបញ្ជូនទៅតុលាការហើយ នៅថ្ងៃទី ២៧ ខែកុម្ភៈនេះ ពីបទលួចសម្លាប់សត្វប្រើស។
លោក ទ្រី ស៊ីថេង ប្រធានបុគ្គលិកថែរក្សា និងសង្គ្រោះសត្វព្រៃភ្នំតាម៉ៅថ្លែងនៅថ្ងៃទី ២៧ ខែកុម្ភៈថា បុគ្គលិកថែរក្សាសត្វបានឃើញសត្វប្រើសងាប់ក្នុងទ្រុងនៅវេលាព្រឹកថ្ងៃទី ២ ខែកុម្ភៈ។ សាកសពសត្វប្រើសត្រូវបានគេកាត់យកជើងភ្លៅជើងមុខទាំង ២ ភ្លៅជើងក្រោយ ១ និងកាត់ក្បាលយកទៅបាត់។
លោកថា ក្រោយដឹងហេតុការណ៍លោកមានក្ដីរន្ធត់ជាខ្លាំង និងបានទៅប្តឹងសមត្ថកិច្ចនគរបាល ដើម្បីស្វែងរកជនប្រព្រឹត្តបទល្មើស។
លោកថ្លែងថា៖ «សត្វប្រើសនោះនៅក្នុងទ្រុងហើយម្យ៉ាងទៀតវាបាក់ជើងក្រោយខាងស្តាំដែលយើងកំពុងព្យាបាលតឆ្អឹងឱ្យវាបានល្អវិញ ប៉ុន្តែបែរជាមានអ្នកមកលួចអ៊ីចឹងបាត់ទៅ»។
លោក ឆាយ កែវមុន្នី អធិការនគរបាលស្រុកបាទីថ្លែងនៅថ្ងៃទី ២៧ ខែកុម្ភៈថា ក្រោយទទួលពាក្យបណ្តឹងសមត្ថកិច្ចបានធ្វើការស្រាវជ្រាវស្វែងរកជនសង្ស័យ អស់រយៈពេល ២៥ ថ្ងៃ ទើបចាប់បានជនសង្ស័យនៅចំណុចក្នុងព្រៃខាងលិចភូមិត្បែង ឃុំក្រាំងធ្នង់ ស្រុកបាទី ខេត្តតាកែវ នាំខ្លួនមកអធិការដ្ឋាននគរបាលស្រុកបាទី កាលពីថ្ងៃទី ២៦ ខែកុម្ភៈ។
លោកអធិការនគរបាលស្រុកបាទីប្រាប់ថា ជនសង្ស័យ ឈ្មោះ ធឹម រ៉ាវី ភេទប្រុស អាយុ ៣៣ ឆ្នាំ មុខរបរមិនពិតប្រាកដ មានទីលំនៅភូមិត្បែង ឃុំក្រាំងធ្នង់ ស្រុកបាទី ខេត្តតាកែវ។ ជនសង្ស័យបានសារភាពថា ខ្លួនពិតជាបានផ្លោះរបងចូលលួចសម្លាប់សត្វប្រើស កាត់យកភ្លៅមុខចំនួន ២ ភ្លៅក្រោយចំនួន ១ និង កាត់ក្បាលយកស្នែងមកលក់ពិតប្រាកដមែន។
លោក ឆាយ កែវមុន្នី បញ្ជាក់ថា៖ «ជនសង្ស័យថា យកស្នែង និងសាច់ប្រើសទៅលក់ឱ្យឈ្មោះ ញឹម យូហេង ហៅ ចក់ ភេទប្រុស អាយុ ៤៩ឆ្នាំ នៅភូមិត្បែង ឃុំក្រាំងធ្នង់ ស្រុកបាទី ខេត្តតាកែវ លក់សាច់បាន ១ គីឡូ ៣ ម៉ឺនរៀល ស្នែងលក់បាន ១០០ ដុល្លារ ដោយប្រាប់ថា សត្វជាប់អន្ទាក់ក្នុងព្រៃ»។
លោកអធិការបញ្ជាក់ទៀតថា ជនសង្ស័យត្រូវបានបញ្ជូនទៅស្នងការដ្ឋាននគរបាលខេត្តតាកែវនៅថ្ងៃទី ២៦ ខែកុម្ភៈ ចំណែកស្នែងប្រើស ត្រូវបានកម្លាំងជំនាញដកហូតពីឈ្មោះ ញឹម យូហេង ហៅចក់ និងបានប្រគល់ស្នែងប្រើសឱ្យទៅប្រធានសួនសត្វភ្នំតាម៉ៅវិញ៕
វីដេអូ៖