កែបៈ គម្រោងសាងសង់ផ្លូវបេតុងប្របមាត់សមុទ្រខេត្តកែបប្រវែងជាង ១១ គីឡូម៉ែត្រដែលត្រូវបានពន្យារពេលច្រើនខែមកនេះនឹងត្រូវរដ្ឋបាលខេត្តសម្រេចចាប់ផ្តើមសាងសង់ឡើងវិញ នៅដើមខែមីនា ខាងមុខនេះ ខណៈអ្នកជំនាញធ្វើការងារផ្នែកទេសចរណ៍ថា គម្រោងនេះនឹងលើកមុខមាត់ខេត្តនេះ។
រដ្ឋបាលខេត្តកែបកាលពីថ្ងៃទី ២៤ ខែកុម្ភៈបានបើកកិច្ចប្រជុំជាមួយភាគីពាក់ព័ន្ធ ជាមួយតំណាងកងកម្លាំងទាំង ៣ តំណាងរដ្ឋបាលក្រុងស្រុក មន្ទីរ-អង្គភាពជុំវិញខេត្តដើម្បីពិភាក្សាពីការរៀបចំបើកការដ្ឋាន។
អ្នកនាំពាក្យរដ្ឋបាលខេត្តកែប លោក ឈុន ច័ន្ទវ៉ាន់ថុន ប្រាប់ភ្នំពេញប៉ុស្តិ៍ថា គម្រោងនេះនឹងចាប់ផ្តើមបើកការដ្ឋាននៅថ្ងៃទី ១ ខែមីនា ដោយសាងសង់ចាប់ពីចំណុចផែទេសចរណ៍កែប ដល់ផ្លូវ ១ ៣៥២ ដែលជាផ្លូវទៅព្រែកចាកដល់ឆ្នេរអង្កោល។
លោកបង្ហាញក្តីរំពឹងថាគម្រោងនេះនឹងជួយដល់ផែនការអភិវឌ្ឍន៍វិស័យទេសចរ និងបង្កើនចំណូលដល់ប្រជាពលរដ្ឋមួយកម្រិតទៀត។ លោកថា៖ «បច្ចុប្បន្ននេះអភិបាលខេត្តបានជំរុញការអភិវឌ្ឍហេដ្ឋារចនាសម្ព័ន្ធដើម្បីឆ្លើយតបការអភិវឌ្ឍ និងផែនការវិស័យទេសចរណ៍ខេត្ត ព្រោះខេត្តនេះជាសរសៃឈាមសំខាន់ណាស់សម្រាប់តភ្ជាប់តំបន់ទេសចរណ៍ពីខេត្តកែបទៅតំបន់ផ្សេងៗទៀត។ យើងសង្ឃឹមថា ភ្ញៀវទេសចរនឹងកើនឡើង ហើយជីវភាពពលរដ្ឋនឹងធូរធារ»។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោក ហូ វណ្ឌី ថ្លែងថា នៅពេលគម្រោងនេះលេចរូបរាងនឹងជួយកែប្រែមុខមាត់ខេត្តកែបឱ្យកាន់តែមានភាពទាក់ទាញផ្នែកវិស័យទេសចរណ៍មួយកម្រិតទៀត។
លោកថា៖ «និយាយរួមទៅប្រសិនបើគម្រោងចេញជារូបរាងដូចក្រុងព្រះសីហនុ វានឹងផ្តល់ផលប្រយោជន៍ធំសម្រាប់ពលរដ្ឋក្នុងមូលដ្ឋានទាំងខេត្តកែប និងកំពត ហើយទាក់ទាញទេសចរបរទេស ព្រោះថា កែបជាតំបន់មួយដែលមានសក្តានុពលទេសចរណ៍អេកូ»។
គម្រោងសាងសង់ផ្លូវជាកម្ចីរបស់ ADB នេះ គឺស្ថិតក្នុងគម្រោងហេដ្ឋារចនាសម្ព័ន្ធទេសចរណ៍សម្រាប់កំណើនប្រកបដោយបរិយាប័ន្ននៃមហាអនុតំបន់មេគង្គជំហានទី ២។ ផ្លូវនេះមានប្រវែងជាង ១១ គីឡូម៉ែត្រ ទទឹងពី ៩ ម៉ែត្រទៅ ១៥ ម៉ែត្រដែលគ្រោងប្រើពេលសាងសង់ ២២ ខែ ដោយចំណាយថវិកាជាង ១០ លានដុល្លារ។
តាមរយៈគម្រោងនេះ ADB ក៏សម្រេចផ្ដល់ថវិកា ១,៦ លានដុល្លារសង់កំពង់ផែទេសចរណ៍ថ្មីនៅកោះទន្សាយផងដែរ៕