សៀមរាបៈ បុរសម្នាក់ជាអ្នកបើកបរបានរងរបួសធ្ងន់ក្រោយបើកឡានឆ្លងស្ពានដែលចាស់ទ្រុឌទ្រោមហើយបានបាក់ធ្លាក់ចុះក្រោមកាលពីថ្ងៃទី ២៥ ក្នុងស្រុកជីក្រែង ខេត្តសៀមរាប ខណៈអាជ្ញាធរកំពុងស្រាវជ្រាវ និងគ្រោងឱ្យម្ចាស់អាជីវកម្មសងការខូចខាតស្ពាន។
លោក តាំង លីហេង អធិការនគរបាលស្រុកជីក្រែងឱ្យដឹងនៅថ្ងៃទី ២៧ កុម្ភៈថា អ្នកបើករថយន្តឈ្មោះ លឹម រ៉េត ភេទប្រុស អាយុ ៣៧ ឆ្នាំ រស់នៅភូមិដូនសុខ ឃុំគោកធ្លកក្រោម ស្រុកជីក្រែង ខេត្តសៀមរាប កំពុងសង្គ្រោះបន្ទាន់នៅក្នុងមន្ទីរពេទ្យខេត្តសៀមរាបនៅឡើយទេ។
លោកថ្លែងថា៖ «ករណីនេះតៃកុងឡានគាត់អាចត្រូវតែជាប់ពាក់ព័ន្ធនឹងបទល្មើសព្រហ្មទណ្ឌ។ ចំពោះសំណងវិញគឺអាជ្ញាធរនឹងបង្កើតគណៈកម្មការចម្រុះមួយដែលដើមបណ្តឹងរដ្ឋប្បវេណីអាចជាគណៈបញ្ជាការឯកភាពស្រុកជីក្រែង ឬអាជ្ញាធរខេត្តសៀមរាប ដើម្បីដាក់តម្លៃការខូចខាតស្ពានទៅម្ចាស់អាជីវកម្មដឹកថ្មនោះសង។ នេះបើតាមខ្ញុំដឹង»។
លោកបញ្ជាក់ថា ពេលនេះសមត្ថកិច្ចរបស់លោកគ្រោងនឹងបើកការស៊ើបសួរអ្នកបើកបររថយន្តបង្កម្នាក់នោះ ដើម្បីរកធាតុផ្សំនៃបទល្មើស ឬរកមូលហេតុពិតដែលនាំឱ្យអ្នកបើករថយន្តនោះបំពាននឹងបម្រាមរបស់សមត្ថកិច្ច ឬបម្រាមរបស់អាជ្ញាធរស្រុកពាក់ព័ន្ធការហាមឃាត់មិនឱ្យដឹកធ្ងន់ឆ្លងកាត់ស្ពានដែលកំពុងទ្រុឌទ្រោមនោះ។ ប្រសិនបើសមត្ថកិច្ចរកឃើញថាមានធាតុផ្សំនៃបទល្មើសមែន គឺសមត្ថកិច្ចនឹងចាត់វិធានការតាមច្បាប់ទៅលើអ្នកបើកបររថយន្តនោះ។
លោក លីហេង បន្តថា៖ «ជាប់ពាក់ព័ន្ធនឹងបទល្មើសព្រហ្មទណ្ឌនោះគឺប្រសិនបើនៅទីតាំងស្ពាននោះមានដាក់ស្លាកសញ្ញាហាមឃាត់ តែគាត់នៅតែបំពានគឺវាពាក់ព័ន្ធបទល្មើសហើយ។ បើឃើញថាមានស្លាកហាមហើយហេតុអ្វីបានជាគាត់នៅតែបើកឆ្លងស្ពានអ៊ីចឹង។ នេះសុទ្ធតែជាចំណុចពាក់ព័ន្ធបទល្មើស»។
លោក ទីវ ប៉ុនរ៉ា នាយនគរបាលប៉ុស្តិ៍ឃុំជីក្រែងបានប្រាប់នៅថ្ងៃទី ២៧ កុម្ភៈថា ស្ពាននោះស្ថិតនៅចំណុចស្ពាន វត្តស្លែងក្នុងភូមិព្រីង ឃុំ-ស្រុកជីក្រែង ខេត្តសៀមរាប ត្រូវបានកសាងឡើងកាលពីឆ្នាំ ២០០៧ ហើយស្ថានភាពស្ពានរហូតមកដល់បច្ចុប្បន្ននេះមានលក្ខណៈទ្រុឌទ្រោមយ៉ាងខ្លាំង។ ចំពោះការធ្វើដំណើរឆ្លងកាត់អ្វីនោះបានតែទម្ងន់ស្រាលៗទេ។
លោកឱ្យដឹងតាមសម្តីអ្នកភូមិថា នៅថ្ងៃទី ២៥ កុម្ភៈ ឆ្នាំ ២០២២ គេបានឃើញរថយន្ត ១ គ្រឿងម៉ាក NISSAN DESEL ពាក់ស្លាកលេខសៀមរាប 3A- 3222 ដឹកថ្មប្រមាណជា ២៨ តោន។ អ្នកបើករថយន្តបានកៀបជាប់នឹងកាប៊ីន ហើយសមត្ថកិច្ចបានប្រើពេលជាង ៣ ម៉ោងទើបយកជនរងគ្រោះបាន៕