ស្ទឹងត្រែងៈ អង្គការភ្លែនអន្តរជាតិកម្ពុជាសហការជាមួយក្រសួងអភិវឌ្ឍន៍ជនបទ មន្ទីរអភិវឌ្ឍន៍ជនបទខេត្តស្ទឹងត្រែង រដ្ឋបាលស្រុកបុរីអូរស្វាយសែនជ័យ និងអង្គការវឌ្ឍនភាពនៅថ្ងៃទី ២៦ ខែកុម្ភៈ បានសម្ពោធដាក់ឱ្យប្រើប្រាស់ ប្រព័ន្ធចែកចាយទឹកស្អាតនៅឃុំព្រះរំកិល ដើម្បីផ្តល់ទឹកស្អាតប្រើប្រាស់ដល់ប្រជាពលរដ្ឋជាង ៥០០ គ្រួសារ នៅក្នុងភូមិចំនួន ៥ ក្នុងស្រុកបុរីអូរស្វាយសែនជ័យ។
យោងតាមសេចក្តីប្រកាសព័ត៌មានឱ្យដឹងថា នេះគ្រាន់តែជាផ្នែកមួយនៃគម្រោងដែលមានឈ្មោះថា ១ ០០០ ថ្ងៃដំបូង ប៉ុណ្ណោះ ដែលគម្រោងនេះក៏មានការរួមបញ្ចូលថែមទៀតនូវការដោះស្រាយសន្តិសុខស្បៀង ការបង្កើនភាពធន់ ការកែលម្អសុខភាពមាតា និងទារកនៅក្នុងភូមិចំនួន ៥១ ក្នុងឃុំចំនួន ១៧ នៃស្រុកចំនួន ៣ ក្នុងខេត្តស្ទឹងត្រែង។
សេចក្ដីប្រកាសបញ្ជាក់ថា៖ «គោលបំណងសំខាន់នៃគម្រោងនេះ គឺដើម្បីកាត់បន្ថយអសន្តិសុខស្បៀង និងកង្វះអាហារូបត្ថម្ភក្នុងចំណោមទារក និងស្ត្រីក្នុងវ័យបន្តពូជ ដោយអនុវត្តវិធីសាស្ត្រ រួមបញ្ចូលគ្នា ដើម្បីធានាសន្តិសុខស្បៀង និងអាហារូបត្ថម្ភនៅក្នុងតំបន់គោលដៅ»។
លោក យី គីមថាន នាយករងប្រចាំប្រទេសទទួលបន្ទុកផ្នែកកម្មវិធីនៃអង្គការភ្លែនអន្តរជាតិកម្ពុជាថ្លែងថា លទ្ធផលជារួមនៃការខ្វះខាតទឹកស្អាតប្រើប្រាស់ រួមផ្សំនឹងលក្ខខណ្ឌអនាម័យមិនល្អបានជះឥទ្ធិពលដល់ការលូតលាស់ និងការអភិវឌ្ឍការយល់ដឹងដ៏ល្អប្រសើរក្នុងវ័យកុមារភាព បង្កើនហានិភ័យនៃជំងឺ និងការបង្ករោគដែលបណ្តាលឱ្យរាករូស និងកង្វះអាហារូបត្ថម្ភក្នុងចំណោមកុមារ និងមនុស្សពេញវ័យ។
លោកថ្លែងថា៖ «បញ្ហានេះ ក៏បានរួមចំណែកដល់ការបាត់បង់ប្រាក់ចំណូលគ្រួសារ តាមរយៈការចំណាយលើថ្លៃព្យាបាល ការបាត់បង់ពេលវេលានៅកន្លែងធ្វើការ និងអវត្តមានរបស់សិស្សនៅសាលារៀនផងដែរ»។
កត្តាដែលនាំទៅរកភាពជោគជ័យនៃសហគមន៍ ប្រព័ន្ធចែកចាយ និងស្ថានីយទឹកស្អាត គឺជាបញ្ហាចម្បង រួមមានការចូលរួមរបស់សហគមន៍នៅគ្រប់ដំណាក់កាលទាំងអស់ក្នុងការរៀបចំគម្រោង និងការសាងសង់។ ការប្រមូលប្រាក់កម្រៃដែលមានសមត្ថភាពគ្របដណ្តប់លើការចំណាយលើការជួសជុលធំៗ ជាជាងប្រតិបត្តិការ និងការថែទាំតិចតួច។ ភាពជាអ្នកដឹកនាំដ៏រឹងមាំ និងតម្លាភាពកម្រិតខ្ពស់ ជាពិសេសជាមួយសហគមន៍ ក្រុមប្រឹក្សាឃុំ និងរដ្ឋបាលស្រុក ក្នុងការសម្អាត និងការប្រើប្រាស់ថ្នាំសម្លាប់មេរោគឱ្យបានត្រឹមត្រូវនៅក្នុងប្រព័ន្ធ ក៏ជាកត្តាដែលនាំទៅរកភាពជោគជ័យនៃសហគមន៍ ប្រព័ន្ធចែកចាយ និងស្ថានីយទឹកស្អាតដែរ។
បើតាមសេចក្ដីប្រកាសព័ត៌មាន ការចំណាយសម្រាប់ប្រព័ន្ធចែកចាយ និងស្ថានីយទឹកស្អាតដែលទើបសាងសង់ថ្មីគឺប្រហែល $១០០ ០០០។ គម្រោងនេះក៏ត្រូវបានផ្តល់មូលនិធិដោយក្រសួងសហព័ន្ធអាល្លឺម៉ង់សម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (BMZ) និងអង្គការភ្លែនអន្តរជាតិអាល្លឺម៉ង់ ដែលមានទឹកប្រាក់សរុប ២,៥ លានដុល្លារ ក្នុងរយៈពេល ៥ ឆ្នាំចាប់ពីឆ្នាំ ២០១៩-២០២៤។
លោក យី គីមថាន បញ្ជាក់ថា៖ «អង្គការភ្លែនអន្តរជាតិកម្ពុជា គឺជាអង្គការអភិវឌ្ឍន៍ និងមនុស្សធម៌មួយដែលលើកកម្ពស់សិទ្ធិកុមារ និងសមភាពក្មេងស្រី។ យើងខិតខំប្រឹងប្រែងដើម្បីពិភពលោកយុត្តិធម៌មួយដោយធ្វើការរួមគ្នាជាមួយ កុមារ យុវជន អ្នកគាំទ្រ និងស្ថាប័នដៃគូរបស់យើង។ ជាមួយនឹងបទពិសោធជាង ៨០ ឆ្នាំ នៅទូទាំងពិភពលោក កម្មវិធីរបស់អង្គការភ្លែន-អន្តរជាតិមានគោលបំណងគាំទ្រក្មេងស្រី និងក្មេងប្រុស រៀនសូត្រ ដឹកនាំ សម្រេចចិត្ត និងអភិវឌ្ឍ។
លោករំឭកថា កាលពីខែតុលា ឆ្នាំ ២០២១ អង្គការភ្លែនអន្តរជាតិកម្ពុជា បានចាប់ផ្តើមអនុវត្តយុទ្ធសាស្ត្រប្រចាំប្រទេស ២,៥ លានហេតុផល ២០២១-២០២៦ ដោយមានមហិច្ឆតាផ្តល់ផលប្រយោជន៍ដល់ក្មេងស្រីវ័យជំទង់ និងស្ត្រីវ័យក្មេងចំនួន ២,៥ លាននាក់ក្នុងរយៈពេល ៥ ឆ្នាំទៅមុខ។
លោក ស្វាយ សំអ៊ាង អភិបាលខេត្តស្ទឹងត្រែង និងលោក ឈាង ឡាក់ ប្រធានក្រុមប្រឹក្សាខេត្ត នៅថ្ងៃទី ២៦ កុម្ភៈ បានធ្វើជាអធិបតីក្នុងពិធីសម្ពោធដាក់ឱ្យប្រើប្រាស់ស្ថានីយផលិត និងចែកចាយទឹកស្អាតសហគមន៍ព្រះរំកិលនេះ។
បើតាមរដ្ឋបាលខេត្ដស្ទឹងត្រែង ស្ថានីយនេះមានលទ្ធភាពផ្គត់ផ្គង់ទឹកបានចំនួន ៥ ភូមិ នៃឃុំព្រះរំកិល រួមមានភូមិអន្លង់ស្វាយ ភូមិលើ ភូមិកណ្តាល ភូមិក្រោម និងភូមិក្រឡាពាស ដែលមានប្រជាពលរដ្ឋទទួលផលប្រមាណ ៧០០ គ្រួសារ។ រដ្ឋបាលខេត្ដឱ្យដឹងថា ចាប់ពីខែមករា ឆ្នាំ ២០២២ មកដល់ពេលនេះសហគមន៍គ្រប់គ្រងស្ថានីយបានតភ្ជាប់បណ្តាញជូនប្រជាពលរដ្ឋប្រើប្រាស់បាន ៣២៣ បណ្តាញ ហើយបាននិងកំពុងខិតខំពង្រីកការតភ្ជាប់បណ្តាញជូនប្រជាពលរដ្ឋតាមការស្នើសុំជាបន្តបន្ទាប់៕