ភ្នំពេញៈ នគរបាលខណ្ឌសែនសុខគ្រោងបញ្ជូនក្រុមចោរប្លន់ចំនួន ១១ នាក់ ទៅសាលាដំបូងរាជធានីភ្នំពេញនៅថ្ងៃទី ១ មីនា ក្រោយពីឃាត់ខ្លួនកាលពីថ្ងៃទី ២៦ កុម្ភៈពាក់ព័ន្ធដើរធ្វើសកម្មភាពធាក់ប្លន់យកម៉ូតូអ្នកដំណើរនៅក្នុងភូមិសាស្ត្រ ភូមិ ត្រពាំងរាំង សង្កាត់ឃ្មួញ ខណ្ឌ សែនសុខ រាជធានីភ្នំពេញ។
លោក ហួរ ម៉េងវ៉ាង អធិការនគរបាលខណ្ឌ សែនសុខ ឱ្យដឹងនៅថ្ងៃទី២៨ កុម្ភៈថា នគរបាលរបស់លោកគ្រោងកសាងសំណុំរឿងបញ្ជូនក្រុមជនសង្ស័យដែលជាយុវជនចំនួន១១នាក់ទៅសាលាដំបូងរាជធានីភ្នំពេញនៅថ្ងៃទី១ មីនា ខណៈមន្ត្រីនគរបាលជំនាញរបស់លោកមមាញឹកដើម្បីបញ្ចប់នីតិវិធី។
លោកថ្លែងថា៖« ករណីនេះ នគរបាលជំនាញកំពុងបន្តនីតិវិធីដើម្បីបញ្ចប់ និងកសាងសំណុំរឿងបញ្ជូនពួកគេទៅតុលាការ។ (ថ្ងៃទី១មីនា)យើងបញ្ជូនពួកគេទៅតុលាការហើយដើម្បីចាត់ការតាមច្បាប់»។
យោងតាមការផ្សព្វផ្សាយក្នុងបណ្តាញទំនាក់ទំនងសង្គមហ្វេសប៊ុករបស់អធិការដ្ឋាននគរបាលខណ្ឌសែនសុខបានសរសេរថា កាលពីកាលពីវេលាម៉ោង២រសៀលថ្ងៃទី២៦ កុម្ភៈ ឆ្នាំ ២០២២ ប៉ុស្តិ៍នគរបាលរដ្ឋបាលឃ្មួញ ឃាត់ខ្លួនជនសង្ស័យ ១១នាក់ ពាក់ព័ន្ធករណីលួចមានស្ថានទម្ងន់ទោសធាក់យកម៉ូតូអ្នកដំណើរ។ ក្រុមជនសង្ស័យប្រព្រឹត្តនៅចំណុចម្តុំក្បាលហុងទឹក ផ្លូវវិមានឈ្នះឈ្នះ ភូមិត្រពាំងរាំងចាស់ សង្កាត់ឃ្មួញ ខណ្ឌសែនសុខ រាជធានីភ្នំពេញ។ ជាមួយនឹងការឃាត់ខ្លួននោះសមត្ថកិច្ចរឹបអួសបានម៉ូតូចំនួន៤គ្រឿងផងដែរ។
បើតាមរបាយការណ៍ថា ពួកគេមានអាយុចន្លោះពី១៨ទៅ២៤ឆ្នាំ និងសុទ្ធតែអ្នកមានលំនៅក្នុងរាជធានីភ្នំពេញ។ ក្រុមជនសង្ស័យមិនត្រូវបានសមត្ថកិច្ចពិនិត្យរកឃើញសារធាតុញៀននៅក្នុងខ្លួនទេ។ ជាមួយគ្នានេះដែរនគរបាលបានកសាងសំណុំរឿងដោយចោទពួកគេបឋមពីបទលួចមានស្ថានទម្ងន់ទោស។
លោក សេក សុជាតិ នាយកប្រតិបត្តិអង្គការអភិវឌ្ឍន៍ផ្នត់គំនិតថ្លែងនៅថ្ងៃទី ២៨ កុម្ភៈថា រដ្ឋាភិបាល គួរធ្វើការអប់រំផ្នែកសីលធម៌ និងកាតព្វកិច្ចរបស់យុវជនក្នុងនាមជាអ្នកបន្តវេនរបស់ជាតិ។ គួរតម្រង់ទិស និងផ្សព្វផ្សាយពីបទល្មើស និងច្បាប់ពាក់ព័ន្ធដល់យុវជន និងក្មេងជំទង់ៗ ដើម្បីចៀសវាង និងទប់ស្កាត់បញ្ហាកុំឲ្យបន្តរីករាលដាល់កាន់តែធំឡើងៗ។ គួរចាត់វិធានការរដ្ឋបាលចំពោះក្មេងទំនើង ឬយុវជនខិលខូច ដោយគ្មានការរើសអើងនិន្នាការ និងគ្មានការយោគយល់ឡើយ៕