.jpg)
គ្រាប់មិនទាន់ផ្ទុះដែលរកឃើញនៅខេត្តបាត់ដំបងពីថ្ងៃទី២៦ កុម្ភៈ ។ រូបថត ហ្វេសប៊ុក
បាត់ដំបងៈ អង្គភាពកម្ចាត់មីនស៊ីម៉ាក់ (CMAC) ប្រចាំខេត្តបាត់ដំបងកំពុងរៀបចំយកគ្រាប់យុទ្ធភណ្ឌមិនទាន់ផ្ទុះចំនួន ៣ គ្រាប់ ទៅកម្ទេចចោលនៅថ្ងៃទី ១ មីនាឆ្នាំ ២០២២ បន្ទាប់ពីបុរសជាកសិករម្នាក់កាប់ឆ្កាព្រៃប្រទះឃើញកាលពីថ្ងៃទី ២៦ កុម្ភៈ នៅក្នុងភូមិព្រៃទទឹង ឃុំបាយដំរាំ ស្រុកបាណន់ខេត្តបាត់ដំបង។
លោក ប៉ាន់ វ៉ាន់នី អធិការនគរបាលស្រុកបាណន ឱ្យដឹងនៅថ្ងៃទី២៨កុម្ភៈថា គ្រាប់យុទ្ធភណ្ឌមិនទាន់ផ្ទុះចំនួន៣គ្រាប់ត្រូវមន្ត្រីនៃអង្គភាពកម្ចាត់មីនប្រចាំនៅខេត្តបាត់ដំបងយកទៅកម្ទេចចោលនៅថ្ងៃទី១មីនានេះ។គ្រាប់យុទ្ធភណ្ឌទាំងនោះមានមីនកង្កែប១គ្រាប់ និងក្បាលគ្រាប់ប្រភេទ៦០មីល្លិម៉ែត្រចំនួន២គ្រាប់។
លោកថ្លែងថា៖ «ករណីនេះ សមត្ថកិច្ចខ្ញុំបានរាយការណ៍ទៅមន្ត្រីនៃអង្គភាពស៊ីម៉ាកនៅខេត្តបាត់ដំបងរួចហើយ។ ខាងមន្ត្រីស៊ីម៉ាក់ផ្តល់ព័ត៌មានមកខ្ញុំថាថ្ងៃស្អែក(ថ្ងៃទី១មីនា)គេមកយកទៅកម្ទេចចោល»។
លោក មុខ សាមុត នាយនគរបាលប៉ុស្តិ៍រដ្ឋបាល ឃុំបាយដំរាំ ប្រាប់នៅថ្ងៃទី២៨កុម្ភៈថា កាលពីវេលាម៉ោង១២ ថ្ងៃត្រង់ថ្ងៃទី២៦ ខែកុម្ភៈឆ្នាំ២០២២ មានប្រជាពលរដ្ឋ២នាក់រស់នៅក្នុងភូមិ ព្រៃទទឹង ឃុំបាយដំរាំ ស្រុកបាណន់ បាននាំគ្នាកាប់ឆ្កាព្រៃដើម្បីដាំដំណាំ ហើយបានប្រទះឃើញគ្រាប់ចំនួន៣គ្រាប់នៅកប់ដីក្បែរដំបូក។នៅពេលនោះពួកគាត់បានរាយការណ៍មកសមត្ថកិច្ចរបស់លោកហើយលោកបានរាយការណ៍ទៅលោកលោកប៉ាន់ វ៉ាន់នី អធិការនគរបាលស្រុកបាណនដើម្បីជ្រាប។
លោកបន្តថា ដោយទទួលបានគោលការណ៍ពីអធិការស្រុកមក លោកបានដឹកនាំកម្លាំងចុះទៅត្រួតពិនិត្យ និងព័ទ្ធខ្សែសុវត្ថិភាពនៅចំណុចដីទួលដំបូកនោះដើម្បីជាសញ្ញាមិនឱ្យប្រជាពលរដ្ឋទៅក្បែរទីតាំងនោះទៀត។ ចំពោះគ្រាប់ទាំងនោះអាចនៅមានគុណភាព និងធ្វើឱ្យផ្ទុះបណ្តាលឱ្យមានគ្រោះថ្នាក់ដល់មនុស្សបាន។
លោកបញ្ជាក់ថា៖«តំបន់ខ្លះនៅក្នុងឃុំបាយដំរាំ នៅមានគ្រាប់យុទ្ធភណ្ឌមិនទាន់ផ្ទុះខ្លះដែរនៅក្នុងព្រៃ ព្រោះតំបន់នោះជាតំបន់ប្រឈមប្រយុទ្ធប្រឆាំងគ្នានៅសម័យខ្មែរក្រហម។ ប៉ុន្តែនៅក្នុងភូមិសាស្ត្រឃុំខ្ញុំនេះគ្មានមនុស្សរបួសឬស្លាប់ដោយសារគ្រាប់យុទ្ធភណ្ឌមិនទាន់ផ្ទុះទេ»។
លោកបានបន្ថែមថា កន្លងមកអាជ្ញាធរមូលដ្ឋានក៏ដូចជាសមត្ថកិច្ច តែងតែផ្សព្វផ្សាយអប់រំស្តីពីគ្រោះថ្នាក់ដោយសារគ្រាប់មីននៅតាមមូលដ្ឋានភូមិឃុំដើម្បីឱ្យពួកគាត់យល់ដឹងពីបញ្ហាគ្រោះថ្នាក់ដោយគ្រាប់មីន។ប្រសិនបើប្រជាពលរដ្ឋឬសិស្សសាលាបានប្រទះឃើញគ្រាប់ប្រភេទណាក៏ដោយត្រូវតែរាយការណ៍មកសមត្ថកិច្ចហើយសមត្ថកិច្ចនឹងចុះទៅព័ទ្ធខ្សែសុវត្ថិភាពនិងរាយការណ៍ទៅអង្គភាពស៊ីម៉ាកដើម្បីឱ្យគាត់យកទៅកម្ទេចចោល។
អគ្គនាយកមជ្ឈមណ្ឌលសកម្មភាពកំចាត់មីនកម្ពុជា(CMAC)លោក ហេង រតនា បានសរសេរលើបណ្តាញសង្គមហ្វេសប៊ុករបស់លោកថាអង្គភាពស៊ីម៉ាកសូមជម្រាបជូនដំណឹងដល់ប្រជាពលរដ្ឋទាំងអស់មេត្តាជ្រាបថា ដើម្បីបង្កើនភាពងាយស្រួលដល់ប្រជាពលរដ្ឋក្នុងការរាយការណ៍មកអង្គភាពស៊ីម៉ាក់(CMAC)នៅពេលជួបប្រទះឃើញគ្រាប់មីន និងសំណល់យុទ្ធភណ្ឌមិនទាន់ផ្ទុះ អង្គភាពស៊ីម៉ាកបានបង្កើតប្រព័ន្ធរាយការណ៍ឌីជីថល។
សារនោះបានបញ្ជាក់ថា ប្រព័ន្ធApplicationមានឈ្មោះថា“CMAC Helps”ហើយនឹងដាក់ឱ្យប្រើប្រាស់ជាផ្លូវការនៅថ្ងៃទី១មីនាឆ្នាំ២០២២។
សាររបស់លោកបន្តថា៖«បងប្អូនគ្រាន់តែថតរូបគ្រាប់យុទ្ធភណ្ឌមិនទាន់ផ្ទុះរួចផ្ញើមកអង្គភាពCMACនោះក្រុមការងារអាចឆ្លើយតបបន្ទាន់ឬធ្វើការទំនាក់ទំនងទៅបងប្អូនភ្លាម»៕
