.jpg)
បុរសជនជាតិចិនដែលត្រូវបានតុលាការចោទប្រកាន់និងបញ្ជូនទៅឃុំខ្លួនពាក់ព័ន្ធនឹងគ្រឿងញៀន។ រូបថត នគរបាល
ភ្នំពេញៈ សាលាដំបូងរាជធានីភ្នំពេញ នៅថ្ងៃទី២៨ ខែកុម្ភៈ បានសម្រេចឃុំខ្លួនបុរសជនជាតិចិនម្នាក់ នៅពន្ធនាគាររាជធានីភ្នំពេញ (PJ) ក្រោមការចោទប្រកាន់ពីបទ ផលិត រក្សាទុក ជួញដូរនិងប្រើប្រាស់ដោយខុសច្បាប់នូវគ្រឿងញៀន ពាក់ព័ន្ធបទល្មើសគ្រឿងញៀនជាច្រើនគីឡូក្រាម។ នេះបើតាមអ្នកនាំពាក្យសាលាដំបូងរាជធានីភ្នំពេញ។
លោក អ៊ី រិន្ទ ប្រធានលេខាធិការដ្ឋានរដ្ឋបាលសាលាដំបូងរាជធានីភ្នំពេញ និងជាអ្នកនាំពាក្យផ្នែកចៅក្រមនៃ បានប្រាប់ ភ្នំពេញ ប៉ុស្តិ៍ថា តុលាការ បានសម្រេចឃុំខ្លួន បុរសជនជាតិចិន ឈ្មោះ Su Yunshi អាយុ ៤០ ឆ្នាំ ជាបណ្ដោះអាសន្ននៅពន្ធនាគារ បន្ទាប់ពីគាត់ ត្រូវបានកម្លាំងនគរបាលមន្ទីរប្រឆាំងគ្រឿងញៀន សហការជាមួយកម្លាំងស្នងការរដ្ឋាននគរបាលរាជធានីភ្នំពេញ បង្ក្រាបចាប់ខ្លួន កាលពីពេលថ្មីៗនេះ ជាមួយវត្ថុតាងគ្រឿងញៀនជាច្រើនគីឡូក្រាម រួមទាំងសម្ភារសម្រាប់កែច្នៃគ្រឿងញៀនមួយចំនួនទៀត។
លោកបានបញ្ជាក់ថា៖«ជនសង្ស័យឈ្មោះ Su Yunshi ត្រូវបាន ចៅក្រមស៊ើបសួរសាលាដំបូងរាជធានីភ្នំពេញ សម្រេចចោទប្រកាន់ ពីបទផលិត រក្សាទុក ជួញដូរ និងប្រើប្រាស់គ្រឿងញៀនខុសច្បាប់ និងបានបង្គាប់ឱ្យកម្លាំងសមត្ថកិច្ចនាំយកទៅឃុំខ្លួនជាបណ្ដោះអាសន្ននៅពន្ធនាគាររាជធានីភ្នំពេញ ដើម្បីរងចាំការជំនុំជម្រះទោសនៅពេលក្រោយ»។
លោក ម៉ក់ ជីតូ អគ្គស្នងការរងនគរបាលជាតិ ទទួលផែនប្រឆាំងបទល្មើសគ្រឿងញៀន បានប្រាប់ភ្នំពេញប៉ុស្តិ៍ថា ជនសង្ស័យឈ្មោះ Su Yunshi ត្រូវបានកម្លាំងការិយាល័យជំនាញ នៃមន្ទីរប្រឆាំងគ្រឿងញៀន សហការជាមួយកម្លាំងស្នងការរដ្ឋាននគរបាលរាជធានីភ្នំពេញ បង្ក្រាបចាប់ខ្លួន កាលពីរសៀលថ្ងៃទី២២ ខែកុម្ភៈ ឆ្នាំ២០២២ នៅចំណុច បន្ទប់លេខ១២ បេ ជាន់ទី១២ ខុនដូ MSK ផ្លូវលេខ 450 សង្កាត់ទួលទំពូង១ ខណ្ឌចំការមន រាជធានីភ្នំពេញ។
លោកបានបញ្ជាក់ថា៖«ក្នុងប្រតិបត្តិការនោះ កម្លាំងសមត្ថកិច្ច បានចាប់រឹបអូសវត្ថុតាងគ្រឿងញៀនមេតំហ្វេតាមីន(WY) ជាង ២,៦៦គីឡូក្រាម អ៊ិចស្តាស៊ី(MDMA) ជាង ២,៦៥ គីឡូក្រាម, កេតាមីន(KETAMIN)ជិត ២២០ក្រាម នីមេតាហ្សេប៉ាម(4CEC) ៣៦ក្រាម កញ្ឆាក្រៀម ៤,៥៤គីឡូក្រាម និងសារធាតុគីមីផ្សំចំនួន ១៣ គីឡូក្រាម រួមទាំង ឧបករណ៍កែច្នៃមួយចំនួនធំ»។
លោកបានបន្តថា ជនសង្ស័យ ត្រូវបានកម្លាំងការិយាល័យជំនាញនៃមន្ទីរប្រឆាំងគ្រឿងញៀន កសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញ នៅព្រឹកថ្ងៃទី២៨ ខែកុម្ភៈ ឆ្នាំ២០២២ បន្ទាប់ពីសាកសួរដើម្បីស្រាវជ្រាវ រកខ្សែបណ្ដាញ និងមេក្លោងរបស់ពួកគេ អស់រយៈពេលជិតមួយសប្ដាហ៍មិនបានសម្រេច។
លោកមានប្រសាសន៍ថា៖«ជនសង្ស័យ មិនបានសហការជាមួយកម្លាំងសមត្ថកិច្ចនគរបាលជំនាញយើង ក្នុងការស្រាវជ្រាវចាប់មេក្លោងធំ និងបក្ខពួករបស់ខ្លួន ដែលប៉ុនប៉ងបង្កើតទីតាំងផលិតគ្រឿងញៀននៅកម្ពុជានោះទេ»។
បើតាម លោក ម៉ក់ ជីតូ ក្រុមមន្ត្រីនគរបាលជំនាញ កំពុងបន្តស្រាជ្រាវលើករណីនេះបន្ថែមទៀត ដោយសំអាងថា ទង្វើនិងសកម្មភាពរបស់ជនសង្ស័យរូបនេះ អាចមានខ្សែបណ្ដាញច្រើន រួមទាំងមេក្លោងរបស់ពួកគេមួយចំនួនទៀតនៅកម្ពុជា។
លោកប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញ បានប្រាប់ភ្នំពេញប៉ុស្តិ៍ថា ជនសង្ស័យត្រូវបានតំណាងអយ្យការ អមសាលាដំបូងរាជធានីភ្នំពេញ ចោទប្រកាន់ពីបទ ផលិត រក្សាទុក ជួញដូរនិងប្រើប្រាស់ដោយខុសច្បាប់នូវគ្រឿងញៀន តាមមាត្រា ៣៩ មាត្រា ៤០ មាត្រា ៤៥ នៃច្បាប់ស្តីពីការត្រួតពិនិត្យគ្រឿងញៀន។
យោងតាមវត្ថុតាងដែលសមត្ថកិច្ចរឹបអូស បានពីការបង្ក្រាបបទល្មើសខាងលើនេះ និងបទចោទប្រកាន់តាមមាត្រា៤០នៃច្បាប់ស្ដីពីការត្រួតពិនិត្យគ្រឿងញៀន ជនសង្ស័យ អាចនឹងប្រឈមការផ្ដន្ទាទោសជាប់ពន្ធនាគារពី២០ឆ្នាំទៅ៣០ឆ្នាំ ឬ អស់មួយជីវិត ព្រមទាំងទោសពិន័យជាប្រាក់ពី៤០លានរៀល ទៅ១០០លានរៀល៕
