.jpg)
កម្មករសំណង់ជិះឡានឆ្លងកាត់ស្ពានជ្រោយចង្វារត្រឡប់ទៅផ្ទះវិញ កាលពីថ្ងៃទី ៣ ខែ មករា ឆ្នាំ ២០២២។ ហេង ជីវ័ន
ភ្នំពេញៈ របាយការណ៍បេឡាជាតិសនិ្តសុខសង្គម (ប.ស.ស) បានឱ្យដឹងថា ក្នុងឆ្នាំ ២០២១ ទោះបីប្រទេសកម្ពុជាកំពុងប្រឈមនឹងការរីករាលដាលនៃជំងឺកូវីដ ១៩ ដែលធ្វើឱ្យរំហូរចរាចរណ៍នៅលើដងផ្លូវមានការថយចុះក៏ដោយ ក៏គិតជាមធ្យមមានកម្មករនិយោជិតវិស័យកាត់ដេរសម្លៀកបំពាក់ និងផលិតស្បែកជើងដែលធ្វើដំណើរទៅមកបំពេញការងារប្រមាណ ២០៩ នាក់ទទួលរងគ្រោះដោយសារគ្រោះថ្នាក់ចរាចរណ៍ក្នុង ១ ខែៗ។
យោងតាមរបាយការណ៍ស្តីពីលទ្ធផលការងារសម្រេចបាននៅក្នុងឆ្នាំ ២០២១ និងទិសដៅអនុវត្តបន្តឆ្នាំ ២០២២ របស់ ប.ស.ស បង្ហាញថា ជាង ៤៩% នៃកម្មករនិយោជិតដែលរងគ្រោះដោយសារហានិភ័យការងារដែលបានរាយការណ៍គឺជាគ្រោះថ្នាក់ចរាចរណ៍ ដែលជាបញ្ហាប្រឈមដ៏ចម្បងគួរឱ្យព្រួយបារម្ភយ៉ាងខ្លាំងមួយ សម្រាប់កម្មករនិយោជិតជាពិសេសអ្នកដែលកំពុងបម្រើការងារក្នុងវិស័យកាត់ដេរសម្លៀកបំពាក់ និងផលិតស្បែកជើងដែលមានប្រមាណជាង ៨០ ម៉ឺននាក់។ ក្នុងចំណោមកម្មករនិយោជិតដែលទទួលរងគ្រោះថ្នាក់ប្រមាណពាក់កណ្តាលនៃពួកគេ គឺជាកម្មករនិយោជិតដែលបម្រើការងារក្នុងវិស័យកាត់ដេរសម្លៀកបំពាក់ និងផលិតស្បែកជើង។ ក្នុងករណីជាច្រើនកម្មករនិយោជិតដែលរងគ្រោះ ត្រូវសម្រាកថែទាំនៅមន្ទីរពេទ្យ និងផ្ទះរបស់ខ្លួនជាច្រើនថ្ងៃ-ខែ ឯខ្លះទៀតត្រូវធ្លាក់ខ្លួនពិការបាត់បង់សមត្ថភាពបំពេញការងារសម្រាប់ទ្រទ្រង់ជីវភាពគ្រួសារ តម្រូវឱ្យឱពុក-ម្តាយ ឬបងប្អូនសាច់ញាតិត្រូវទទួលបន្ទុកនៅមើលថែទាំជាប្រចាំ។ល។
អង្គការមូលនិធិបង្ការរបួសអាស៊ីប្រចាំនៅកម្ពុជា (AIP Foundation) សហការជាមួយស្ថាប័នរដ្ឋាភិបាលមានក្រសួងការងារ និងបណ្ដុះបណ្ដាលវិជ្ជាជីវៈ ក្រសួងមហាផ្ទៃ និងដោយទទួលបានការគាំទ្រពីក្រុមហ៊ុនសាជីវកម្មវីអេហ្វ (VF Corporation) នៅថ្ងៃទី ២៨ កុម្ភៈនេះបានរួមគ្នាធ្វើសិក្ខាសាលាឆ្នាំចែករំលែកបទពិសោធ និងការអនុវត្តល្អស្តីពី «ការលើកកម្ពស់សុវត្ថិភាពចរាចរណ៍សម្រាប់កម្មករនិយោជិតកម្ពុជា»។ សិក្ខាសាលានេះប្រព្រឹត្តទៅរយៈពេល ១ ថ្ងៃពេញ តាមប្រព័ន្ធវីដេអូហ្ស៊ូម ដោយមានអ្នកចូលរួមសរុបប្រមាណ ១០០ នាក់។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជាថ្លែងថា គោលបំណងបង្កើតឱ្យមានវេទិកាជួបជុំគ្នានៃអ្នកតំណាងមកពីរោងចក្រនានា ក្រុមអ្នកបញ្ជាទិញ សហជីព តំបន់សេដ្ឋកិច្ចពិសេស សមាគម អ្នកបើកបរ អ្នកពាក់ព័ន្ធនៅថ្នាក់ជាតិ និងថ្នាក់ក្រោមជាតិដែលបានចូលរួមក្នុងការអនុវត្តកម្មវិធីដើម្បីជំរុញការបន្តកិច្ចសន្ទនា និងឱកាសក្នុងការធ្វើកិច្ចសហប្រតិបត្តិការ ការអនុវត្តយុទ្ធសាស្ត្រសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិតក្នុងវិស័យកាត់ដេរ និងផលិតស្បែកជើង ព្រមទាំងអនុវត្តឱ្យបានកាន់តែទូលំទូលាយនូវគំនិតផ្តួចផ្តើមនានាដែលពាក់ព័ន្ធ។
លោកលើកឡើងថា ស្របពេលដែលមានការវិវឌ្ឍជាវិជ្ជមានគួរឱ្យកត់សម្គាល់មួយចំនួនក្នុងកិច្ចខិតខំលើកកម្ពស់សុវត្ថិភាពចរាចរណ៍នៅកម្ពុជា គ្រោះថ្នាក់ចរាចរណ៍នៅតែជាបញ្ហាប្រឈមដ៏ធ្ងន់ធ្ងរបំផុតមួយសម្រាប់ប្រទេសកម្ពុជា ដោយក្នុង ១ ថ្ងៃៗគ្រោះថ្នាក់នេះបានសម្លាប់ជីវិតមនុស្ស និងបង្កឱ្យមានការរងរបួសធ្ងន់ស្រាលជាច្រើននាក់ ព្រមទាំងបន្សល់ទុកនូវផលលំបាកជាច្រើនដល់ក្រុមគ្រួសារជនរងគ្រោះ និងសង្គមជាតិ។ លោកឱ្យដឹងថា បើទោះបីជាករណីគ្រោះថ្នាក់ភាគច្រើនកើតមានឡើងលើកម្មករដែលធ្វើដំណើរតាមយានយន្តផ្ទាល់ខ្លួន កម្មករនិយោជិតដែលធ្វើដំណើរតាមរថយន្តដឹកកម្មកររួមនៅតែបន្តទទួលរងគ្រោះនៅពេលធ្វើដំណើរទៅមកបំពេញការងារ។
លោកបញ្ជាក់ថា៖ «បើគិតជាមធ្យមក្នុង ១ ខែៗ មានករណីគ្រោះថ្នាក់លើរថយន្តដឹកកម្មកររួមបែបនេះយ៉ាងតិចណាស់ក៏ ១ ករណីដែរ និងបណ្តាលឱ្យកម្មករនិយោជិតរងរបួសធ្ងន់ស្រាលជាច្រើននាក់ក្នុងករណីនីមួយៗ (និងករណីខ្លះរហូតដល់ស្លាប់ ឬពិការជាច្រើននាក់)»។
លោក បញ្ញា ថា៖ «យ៉ាងហោចណាស់លោកអ្នកគួរពិនិត្យលទ្ធភាពបង្កើតឱ្យមាន ឬដាក់បញ្ចូល និងអនុវត្តនូវគោលនយោបាយបទបញ្ជាផ្ទៃក្នុងអំពីសុវត្ថិភាពចរាចរណ៍ផ្លូវគោកនៅរោងចក្ររបស់ខ្លួន និងជំរុញការផ្សព្វផ្សាយអប់រំដល់មន្ត្រីបុគ្គលិក កម្មករនិយោជិត នៅរោងចក្ររបស់លោកអ្នកឱ្យបានជាប់ជាប្រចាំក្នុងគោលបំណងបង្កើនចំណេះដឹង និងកែប្រែឥរិយាបថរបស់ពួកគេលើបញ្ហាសុវត្ថិភាពចរាចរណ៍»។
លោក ជឿន សុធន ប្រធានរដ្ឋបាលតំបន់សេដ្ឋកិច្ចពិសេស 7NG ស្ថិតនៅឃុំវិហារសួគ៌ ស្រុកខ្សាច់កណ្តាល ខេត្តកណ្តាលបានឱ្យដឹងថា នៅតំបន់សេដ្ឋកិច្ចពិសេស 7NG មានរោងចក្រចំនួន ១១ រោងចក្រ និងមានកម្មករសរុបជាង ៨ ម៉ឺននាក់ និងមានរថយន្តក្រុងចំនួន ២៥០ គ្រឿងត្រូវបានប្រើជាមធ្យោបាយសម្រាប់ដឹកជញ្ជូនកម្មករនិយោជិតទៅមកបំពេញការងារ ដែលនេះជាការផ្លាស់ប្តូរពីយានយន្តដឹកទំនិញមកជារថយន្តមានសុវត្ថិភាពប្រសើរជាង។
តំណាងមកពី រោងចក្រ KKN បានចែករំលែកបទពិសោធ និងការអនុវត្តល្អ ក្នុងការផ្លាស់ប្តូររថយន្តដឹកកម្មករស្របពេលដែលរោងចក្រនេះស្ថិតនៅក្នុងតំបន់សេដ្ឋកិច្ចពិសេស កោះកុង ស្ថិតនៅ ភូមិនាងកុក ឃុំមណ្ឌលសីមា ស្រុកប៉ាក់ខ្លង មានរោងចក្រ ៤ រោងចក្រ មានកម្មករសរុប ៨ ០០០ នាក់ មានរថយន្ត ៧៥ គ្រឿង និងមានម៉ូតូ ៤ ០០០ គ្រឿង។
លោក ស៊ុំ សោភ័ណ្ឌ រដ្ឋលេខាធិការក្រសួងការងារ និងបណ្ដុះបណ្តាលវិជ្ជាជីវៈបានលើកឡើងក្នុងសិក្ខាសាលានេះថា បច្ចុប្បន្នមានរថយន្តប្រភេទដឹកទំនិញដែលយកទៅដឹកជញ្ជូនកម្មករ និយោជិត ក្នុងវិស័យកាត់ដេរសម្លៀកបំពាក់ និងស្បែកជើងចំនួន ៣៩៦ គ្រឿងហើយ ដែលត្រូវបានកែច្នៃមកជារថយន្តមានសុវត្ថិភាពប្រសើរជាងមុន ដើម្បីឈានទៅរកលទ្ធភាពប្រើប្រាស់រថយន្តក្រុងនៅមិនទាន់អាចធ្វើការ ដោយសារកត្តាសេដ្ឋកិច្ចរបស់អ្នកបើកបរ និងកត្តាចូលរួមពីអ្នកធ្វើដំណើររួម និងអ្នកពាក់ព័ន្ធ។ ក្រសួងបានគាំទ្រឱ្យមានការផ្លាស់ប្តូររថយន្តដឹកកម្មករនិយោជិតមិនមានសុវត្ថិភាព មកជារថយន្តដែលមានសុវត្ថិភាពវិញ៕
វីដេអូ៖
