ព្រះវិហារៈ ដើមឈើធំៗក្នុងតំបន់ឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹប ក្នុងខេត្តព្រះវិហារកំពុងរងការកាប់បំផ្លាញហើយដីព្រៃប្រមាណ ៥ ហិកតាថ្មីទៀត នៅក្នុងតំបន់ឧទ្យាននេះត្រូវបានគេលួចឈូសឆាយ ដើម្បីទន្ទ្រានយកដីធ្វើកសិកម្មដោយខុសច្បាប់។ នេះបើតាមលោក សុខ ទូច ប្រធានរាជបណ្ឌិត្យសភាកម្ពុជា។
លោក សុខ ទូច បានថ្លែងថា កាលពីថ្ងៃទី ២៦ ខែកុម្ភៈ ឆ្នាំ ២០២២ លោក និងក្រុមការងារបានចុះល្បាតនៅក្នុងឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹប ហើយបានឃើញការកាប់ទន្ទ្រានយកដីថ្មី ចំនួន ៣ ទីតាំង ដែលមានផ្ទៃដីសរុបប្រមាណ ៥ ហិកតា។
លោកបញ្ជាក់ថា៖ «ការកាប់ទន្ទ្រានយកដីថ្មីនេះ ដោយប្រើប្រាស់រណារយន្ត និងត្រាក់ទ័រឈូសឆាយដី»។
បើតាមលោក សុខ ទូច ដើមឈើធំៗ ដែលត្រូវបានគេលួចកាប់បំផ្លាញ ភាគច្រើនជាប្រភេទឈើប្រណីតដែលមានទំហំ ២-៣ ឱបមនុស្សចាស់។ ទន្ទឹមជាមួយគ្នានេះ លោកបានព្រមានថា នឹងមានចំណាត់ការផ្លូវច្បាប់យ៉ាងតឹងរ៉ឹងបំផុត និងដោយគ្មានការលើកលែងទៀតឡើយ ចំពោះបុគ្គលទាំងឡាយណា ដែលនៅតែគឃ្លើនចូលកាប់ព្រៃឈើ ឬឈូសឆាយទន្ទ្រានដីព្រៃនៅក្នុងឧទ្យាននេះដោយខុសច្បាប់។
លោកបានថ្លែងថា៖ «បើអស់លោក លួចចូលកាប់បំផ្លាញព្រៃឈើ និង ឈូសឆាយដីព្រៃក្នុងតំបន់អភិរក្សបែបនេះតើឱ្យក្រុមការងារយើង អភិរក្សព្រៃឈើបានយ៉ាងដូចម្ដេច? ចាប់ពីពេលនេះទៅ អ្នកដែលកាប់ទន្ទ្រានដីព្រៃ និងឈូសឆាយដីព្រៃនៅក្នុងឧទ្យាន ពេលដែលក្រុមការងារយើងឃើញ យើងនឹងរឹបអូសទុកនៅស្នាក់ការឧទ្យាន។ យើងនឹងមិនប្រគល់សម្ភារជូនទៅវិញទេ ក្នុងករណីមិនចូលខ្លួនមកដាំកូនឈើឡើងវិញលើផ្ទៃដីដែលបានឈូសឆាយនោះ»។
ជាង ២ ឆ្នាំកន្លងមកនេះ លោក និងក្រុមការងារបានចុះធ្វើការផ្សព្វផ្សាយ អប់រំ ណែនាំដល់អ្នកភូមិ និងអាជ្ញាធរមូលដ្ឋានអំពីផលប្រយោជន៍នៃធនធានធម្មជាតិក្នុងតំបន់ឧទ្យានរាជបណ្ឌិត្យសភា តេជោសែនឫស្សីត្រឹបនេះ និងបានអំពាវនាវឱ្យមានការចូលរួមការពារ និងអភិរក្សព្រៃឈើ និងសត្វព្រៃនៅក្នុងតំបន់ឧទ្យាននេះដើម្បីជាប្រយោជន៍ដល់មនុស្សជំនាន់ក្រោយ។
លោក ឈួន ម៉ាឌី អធិការស្រុកឆែបប្រាប់ ភ្នំពេញ ប៉ុស្តិ៍ថា ការផ្សព្វផ្សាយអប់រំតែមួយមុខ មិនគ្រប់គ្រាន់ទេ ចាំបាច់ត្រូវតែមានការពង្រឹងការអនុវត្តច្បាប់ ចំពោះបុគ្គលដែលល្មើសច្បាប់ឱ្យបានតឹងរ៉ឹង គឺត្រូវបង្ក្រាបចាប់ និងកសាងសំណុំរឿងបញ្ជូនឱ្យតុលាការ។ លោកថា៖ «យើងគាំទ្រឱ្យមានការអនុវត្តច្បាប់ទៅលើជនប្រព្រឹត្តបទល្មើស ព្រោះវាល្មមដល់ពេលដែលយើងត្រូវរឹតបន្តឹងការអនុវត្តច្បាប់ប្រឆាំងជនប្រព្រឹត្តបទល្មើសទាំងនោះហើយ»។
លោក ម៉ាឌី បន្ថែមថា ដើម្បីពង្រឹងការអនុវត្តច្បាប់ការពារធនធានធម្មជាតិ នៅក្នុងតំបន់ឧទ្យានរាជបណ្ឌិត្យសភា តេជោសែនឫស្សីត្រឹប ក៏ដូចជាក្នុងតំបន់ដែនជម្រកសត្វព្រៃព្រះរកា និង ព្រៃសហគមន៍ក្នុងភូមិសាស្ត្រស្រុកឆែបនេះ ចាំបាច់ត្រូវមានការចូលរួមគាំទ្រពីសហគមន៍ និងអាជ្ញាធរមូលដ្ឋាន។
លោក ផាវ ឈឿម មេភូមិដងផ្លិតនៃឃុំឆែប ២ ថ្លែងថា ប្រជាសហគមន៍ឫស្សីត្រឹបមិនបានចូលទៅកាប់ឈើ ឬឈូសឆាយដីព្រៃនោះទេ។ «ពលរដ្ឋក្នុងសហគមន៍យើងគាំទ្រឱ្យមានការអនុវត្តច្បាប់ប្រឆាំងជនប្រព្រឹត្តបទល្មើស ដើម្បីការពារព្រៃឈើ និងសត្វព្រៃនៅក្នុងតំបន់ឧទ្យានជាតិនេះ»។
លោក ស៊ឹង សាំ ប្រធានសហគមន៍ការពារព្រៃឈើសាអែម ថ្លែងបន្ទរថា ករណីកាប់ឈើ និងឈូសឆាយដីព្រៃក្នុងតំបន់ឧទ្យាននេះអាចជាស្នាដៃរបស់ពលរដ្ឋនៅឃុំសង្កែ ១ ព្រោះកន្លងមក មានអ្នកភូមិមួយចំនួន បាននាំគ្នាកាប់ទន្ទ្រានដីព្រៃក្នុងតំបន់ឧទ្យាន ដើម្បីពង្រីកផ្ទៃដីកសិកម្ម។ «ខ្ញុំសូមឱ្យខាងមន្ត្រីឧទ្យាននុរក្ស និងអាជ្ញាធរ ស្រាវជ្រាវឱ្យបានច្បាស់លាស់ និងមានចំណាត់ការផ្លូវច្បាប់ ចំពោះជនប្រព្រឹត្តបទល្មើសទាំងនោះ»៕
វីដេអូ៖