.jpg)
សមត្ថកិច្ចដាក់បង្ហាញភ្លុកដំរីដែលរឹបអូសពីឈ្មួញនាពេលកន្លងមក។ រូបថត AFP
ភ្នំពេញៈ សាលាឧទ្ធរណ៍ភ្នំពេញនៅថ្ងៃទី ២៨ កុម្ភៈបានប្រកាសសាលដីកាសម្រេចឱ្យជនជាប់ចោទម្នាក់ជាប់ពន្ធនាគារ ១ ឆ្នាំដដែល បន្ទាប់ពីជំនុំជម្រះកាលពីថ្ងៃទី ៨ កុម្ភៈ ក្នុងសំណុំរឿងជំនួញភ្លុកដំរីជាង ៣ តោនពីប្រទេសអាហ្វ្រិកខាងត្បូង ហើយត្រូវបានគយកម្ពុជាឆែកឃើញនៅក្នុងទូកុងតឺន័រកាលពីថ្ងៃទី ៩ ឧសភា ឆ្នាំ ២០១៤ នៅកំពង់ផែស្វយ័ត ក្រុង-ខេត្ត ព្រះសីហនុ។
លោកចៅក្រម សួស សំអាត បានអានសាលដីកាកំបាំងមុខជនជាប់ចោទក្នុងបន្ទប់សវនាការនៅថ្ងៃទី ២៨ កុម្ភៈថា សំណុំរឿងនេះមានជនជាប់ចោទឈ្មោះ ខាន់ ស៊ីនិត ភេទប្រុស អាយុ ៤១ ឆ្នាំ ជាប្រធានក្រុមហ៊ុន រេហូ ខេមបូឌា (Reho BothCambodia Co,Ltd)។ ជនជាប់ចោទត្រូវបានជំនុំជម្រះកាលពីថ្ងៃទី ៨ កុម្ភៈ ឆ្នាំ ២០២២ នៅចំពោះមុខជនជាប់ចោទ។
លោកថ្លែងថា៖ «ក្រោយពីបានស្តាប់ការឆ្លើយបំភ្លឺរបស់ជនជាប់ចោទកាលពីបើកសវនាការ និងក្រោយពីស្តាប់ការសន្និដ្ឋានរបស់តំណាងមហាអយ្យការមក ក្រុមប្រឹក្សាជំនុំជម្រះសម្រេចតម្កល់ទោស ១ ឆ្នាំដល់ជនជាប់ចោទដដែល»។
ពាក់ព័ន្ធការប្រកាសតម្កល់សាលក្រមរបស់សាលាដំបូងខេត្តព្រះសីហនុពីសំណាក់សាលាឧទ្ធរណ៍ភ្នំពេញនេះត្រូវបាន លោក ខាន់ ស៊ីនិត ជាជនជាប់ចោទ និងជាប្រធានក្រុមហ៊ុនឈ្មោះ Reho Both Cambodia ដែលជាក្រុមហ៊ុនបម្រើសេវាទទួលរត់ការបញ្ញើទំនិញបាននិយាយប្រាប់តាមទូរស័ព្ទនៅថ្ងៃទី ២៨ កុម្ភៈថា សាលាឧទ្ធរណ៍ភ្នំពេញបានតម្កល់សាលក្រមរបស់សាលាដំបូងខេត្តព្រះសីហនុដោយផ្តន្ទាទោសដល់លោក ១ ឆ្នាំដដែល។
លោកប្រាប់ថា៖ «ប៉ុន្តែខ្ញុំនឹងប្តឹងសារទុក្ខទៅតុលាការកំពូលបន្តទៀតព្រោះថា ការសម្រេចសេចក្តីរបស់សាលាឧទ្ធរណ៍ភ្នំពេញមានភាពអយុត្តិធម៌សម្រាប់ខ្ញុំ។ ព្រោះខ្ញុំមិនបានដឹងរឿងនោះទេដោយសារគេយកឈ្មោះក្រុមហ៊ុនខ្ញុំទៅនាំចូលរបស់ខុសច្បាប់»។
លោក ស៊ីនិត ថា គាត់បានទំនាក់ទំនងជាមួយក្រុមហ៊ុនក្នុងស្រុកមួយដែលជាក្រុមហ៊ុននាំទំនិញទូរស័ព្ទមកប្រទេសកម្ពុជា។ ដោយសារតែលោកមានទំនាក់ទំនងរកស៊ីជាមួយគ្នាហើយម្យ៉ាងលោកមានអាជ្ញាប័ណ្ណពាក់ព័ន្ធការទទួលរត់ការទំនិញផង។
តាមរយៈការងារនេះ ក្រុមហ៊ុនមួយនោះបានពឹងលោកឱ្យចុះហត្ថលេខាលើលិខិតសម្រាប់រត់ការទំនិញ (លិខិតរត់ការគយ) ហើយពេលខ្លះលោកបានចុះហត្ថលេខា និងបោះត្រាទុកចោលសម្រាប់ឱ្យក្រុមហ៊ុននោះប្រើប្រាស់ផង។ ការធ្វើបែបនេះក៏ដោយមានការជឿទុកចិត្តគ្នាក្នុងនាមជាអ្នករកស៊ីជាមួយគ្នា។ ប៉ុន្តែបែរជាក្រុមហ៊ុននោះយកឈ្មោះក្រុមហ៊ុនរបស់លោកទៅរត់ការទំនិញភ្លុកដំរីនោះទៅវិញ។
សំណុំរឿងនេះត្រូវបានសាលាដំបូងខេត្តព្រះសីហនុ បើកសវនាការ និងប្រកាសសាលក្រមកាលពីថ្ងៃទី ១៣ ខែធ្នូ ឆ្នាំ ២០១៦ ដោយសម្រេចផ្តន្ទាទោសដាក់ពន្ធនាគារ ៣ ឆ្នាំ ប៉ុន្តែតុលាការបង្គាប់ឱ្យអនុវត្តទោសក្នុងពន្ធនាគារ ១ ឆ្នាំ រីឯទោស ២ ឆ្នាំទៀតត្រូវព្យួរ និងពិន័យប្រាក់ចំនួន ៥០ លានរៀលចូលក្នុងថវិការដ្ឋ។ ប៉ុន្តែមិនសុខចិត្តក៏បានប្តឹងសាលាឧទ្ធរណ៍ភ្នំពេញ៕
វីដេអូ៖
