ភ្នំពេញៈ រដ្ឋាករទឹកស្វយ័តក្រុងភ្នំពេញ (រ.ទ.ស.ភ) អំពាវនាវដល់ពលរដ្ឋដែលរស់នៅរាជធានីភ្នំពេញឱ្យប្រើប្រាស់ទឹកដោយសន្សំសំចៃនៅរដូវប្រាំងនេះ ដើម្បីចូលរួមកាត់បន្ថយការខ្វះខាតទឹកនៅជាយក្រុង ប៉ុន្តែបានអះអាងថា នៅចុងឆ្នាំ ២០២៣ ឬដើមឆ្នាំ ២០២៤ រាជធានីភ្នំពេញនឹងលែងខ្វះខាតទឹកស្អាតប្រើប្រាស់ទៀតហើយ។ នេះបើតាមលោក ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ។
ថ្លែងនៅក្នុងសន្និសីទសារព័ត៌មានស្ដីពី «វឌ្ឍនភាពមូលដ្ឋានសង្កាត់ និងទិសដៅការងារបន្តរបស់រដ្ឋបាលរាជធានីភ្នំពេញ» នៅថ្ងៃទី ១ ខែមីនា លោក ឡុង ណារ៉ូ លើកឡើងថា នារដូវប្រាំងគិតចាប់ពីខែមករារហូតដល់ខែឧសភា នីវ៉ូទឹកមានការស្រកចុះបណ្ដាលឱ្យការផ្គត់ផ្គង់ទឹកមានការយឺតយ៉ាវ និងខ្វះខាតនៅតំបន់មួយចំនួននៅភាគខាងលិចរាជធានី-ភ្នំពេញ ដូចជាតំបន់កំបូលជាដើម។
លោកបានឱ្យដឹងថា រដ្ឋាករទឹកស្វយ័តរាជធានីភ្នំពេញបានទទួលជំនួយឧបត្ថម្ភពីរាជរដ្ឋាភិបាលជប៉ុនលើការសិក្សាគម្រោងមេចំនួន ៣ លើការផ្គត់ផ្គង់ទឹកស្អាតក្នុងរាជធានីភ្នំពេញក្នុងនោះគម្រោងទី ១ បានចាប់ផ្ដើមពីឆ្នាំ ១៩៩១ មកទល់ឆ្នាំ ២០០០ គម្រោងទី ២ ចាប់ពីឆ្នាំ ២០០០ ដល់ឆ្នាំ ២០១០ និងគម្រោងទី ៣ បច្ចុប្បន្នចាប់ផ្ដើមពីឆ្នាំ ២០២០ ដល់ឆ្នាំ ២០៣០។ គម្រោងទី ៣ គឺភាគីជប៉ុនទើបសិក្សាបញ្ចប់នៅដើមខែកុម្ភៈ ឆ្នាំ ២០២២។
លោកថ្លែងថា ការផ្គត់ផ្គង់ទឹកនៅរាជធានីភ្នំពេញបានគ្រប់គ្រាន់ ១០០ ភាគរយទៅហើយ ប៉ុន្ដែដោយសាររាជរដ្ឋាភិបាលបានកាត់ឃុំបន្ថែមចំនួន ២០ ឃុំ ចូលមករាជធានីភ្នំពេញទៀត ធ្វើឱ្យអត្រានៃការផ្គត់ផ្គង់ទឹកស្អាតធ្លាក់ចុះមកដល់ ៨៥ ភាគរយវិញ។
ប៉ុន្ដែបច្ចុប្បន្នរដ្ឋាករទឹកពង្រីកការផ្គត់ផ្គង់បន្ថែមបានរហូតដល់ប្រមាណ ៩២ ភាគរយនៅលើផ្ទៃសេវាប្រមាណ ៦៧០ គីឡូម៉ែត្រការ៉េ។
ដោយនិយាយយោងដល់ការទើបត្រឡប់ពីការចូលរួមក្នុងសិក្ខាសាលាស្ដីពីបញ្ហាទឹកស្អាតទូទាំងពិភពលោកនៅប្រទេសអង់គ្លេសកាលពីសប្ដាហ៍មុន លោក ណារ៉ូ ថ្លែងថា តាមរយៈសិក្ខាសាលានោះបានសង្កេតឃើញថា បញ្ហាអាកាសធាតុក្នុងពិភពលោកបច្ចុប្បន្នបានធ្វើឱ្យមានការបារម្ភពីប្រភពទឹក ដោយសារគ្រោះរាំងស្ងួតកាន់តែមានច្រើនក្នុងនោះនៅរាជធានីភ្នំពេញក៏ជួបញ្ហានេះដែរ។
លោកថ្លែងថា៖ «យើងបានសម្គាល់ឃើញទាំងអស់គ្នាថា នៅរដូវវស្សាមិនមានអតិថិជនស្រែកលើបញ្ហាខ្វះខាតទឹកទេ ប៉ុន្ដែបើរដូវប្រាំងគិតចាប់ពីខែមករាដើមឆ្នាំ គឺចាប់ផ្ដើមរហូតទៅទល់នឹងខែឧសភា ទើបស្ថានភាពទឹកទន្លេខ្ពស់ឡើងវិញ ទើបធ្វើឱ្យការបូមទឹករបស់យើងមានសមត្ថភាពគ្រប់គ្រាន់»។
បើតាមលោក ណារ៉ូ សមត្ថភាពរបស់រដ្ឋាករស្វយ័តអាចផ្គត់ផ្គង់បានតែ ៥៩២ ពាន់ម៉ែត្រគុប ប៉ុណ្ណោះក្នុង ១ ថ្ងៃ ប៉ុន្ដែតម្រូវការទឹកបច្ចុប្បន្ន តាមការសិក្សារបស់គម្រោងអង្គការ JICA ឃើញថា តម្រូវការទឹកពីឆ្នាំ ២០២០ ដល់ ២០២២ នេះ គឺមានប្រមាណ ៨ សែនម៉ែត្រគុបក្នុង ១ ថ្ងៃ។
លោកបានឱ្យដឹងថា ថ្វីបើរដ្ឋាករទឹកមានសមត្ថភាពផ្គត់ផ្គង់ទឹកបានតែ ៥៩២ ពាន់ម៉ែត្រគុបក្នុង ១ ថ្ងៃ ប៉ុន្ដែមន្ដ្រីជំនាញខំច្នៃប្រឌិតបង្កើនសមត្ថភាពផ្គត់ផ្គង់ទឹកបានរហូតដល់ ៦៣៥ ពាន់ម៉ែត្រគុបក្នុង ១ ថ្ងៃ មានន័យថាកើនប្រមាណ ៤ ម៉ឺនម៉ែត្រគុបបន្ថែមទៀត ប៉ុន្ដែនៅមានការខ្វះខាតប្រមាណ ២ សែនម៉ែត្រគុបទៀតក្នុង ១ ថ្ងៃ។
បើតាមការសិក្សារបស់រដ្ឋាករទឹកស្វយ័តក្រុងភ្នំពេញ ការប្រើប្រាស់ទឹកនៅកម្ពុជារបស់អតិថិជន ១ នាក់ ក្នុង ១ ថ្ងៃ មានកម្រិតខ្ពស់ពី ២០០ ទៅ ២៨០ លីត្រ ខណៈកម្រិតប្រើជាទូទៅត្រឹមតែ ១៥០ លីត្រ ១ នាក់សម្រាប់ ១ ថ្ងៃ។
លោក ណារ៉ូ ថ្លែងថា៖ «ក្នុងរដូវប្រាំងនេះរដ្ឋាករទឹក សូមធ្វើការសំណូមពរ។ ខ្ញុំក៏បានចេញនូវសេចក្ដីជូនដំណឹងហើយ សំណូមពរ យើងនាំគ្នាសន្សំសំចៃទឹកក្នុងរដូវប្រាំងនេះ»។
ការខ្វះខាតនេះក៏មកពីកត្ដាប្រជាជនចូលទីក្រុងច្រើន និងបញ្ហាទឹកទន្លេស្រកចុះផងដែរ។ ដូច្នេះក្នុងនាមរដ្ឋាករទឹកស្វយ័តក្រុងភ្នំពេញបានធ្វើសេចក្ដីជូនដំណឹងដល់អតិថិជន ដែលនៅក្នុងក្រុងឱ្យជួយសន្សំសំចៃទឹកដើម្បីជួយដល់តំបន់ជាយក្រុងឱ្យមានទឹកប្រើប្រាស់គ្រប់គ្រាន់។
លោកថ្លែងថា៖ «នៅដើមខែកុម្ភៈ ឆ្នាំ ២០២២ នេះ យើងមានការលំបាកនៅតំបន់ក្រុងតាខ្មៅ នៅក្នុងតំបន់ចុងខាងលិចរាជធានីភ្នំពេញ។ ប៉ុន្ដែក្រោយពីយើងឱ្យដំណើរការរោងចក្រផ្គត់ផ្គង់ទឹកលើពីសមត្ថភាពផលិត ប៉ុន្ដែនៅតែមានការលំបាកបន្តិចនៅតំបន់ខណ្ឌកំបូល។កាលពីខែមករាឆ្នាំនេះ មានការលំបាករហូតដល់មានការស្រែក»។
លោកបន្តថា បញ្ហាដែលនៅសល់គឺនៅតំបន់កំបូលមួយគត់ដែលបំពង់មេនាំទឹកចេញពីទីតាំងផ្លូវជាតិលេខ ៤ តំបន់ទំនប់កប់ស្រូវរហូតដល់តំបន់កំបូលមានទំហំតូច។ ក៏ប៉ុន្តែឥឡូវនេះរដ្ឋាករទឹកកំពុងខិតខំធ្វើយ៉ាងណាដើម្បីអាចធានាថា នៅពេលចូលឆ្នាំថ្មីខាងមុខនេះ តំបន់កំបូលមានទឹកប្រើប្រាស់គ្រប់គ្រាន់។
បើតាមលោក ណារ៉ូ បញ្ហាដែលសំខាន់ជាងគេ គឺទន្លេមេគង្គនៅរយៈពេល ៥ ឆ្នាំនេះ ទឹកមានការស្រកផុតពីភាពប្រក្រតីប្រមាណ ១ ម៉ែត្រ ខណៈរដ្ឋាករទឹកបានកំណត់ថា រដូវប្រាំងត្រូវមានទឹកកម្ពស់ ៣ ម៉ែត្រ ដើម្បីបូមចូលមកក្នុងប្រព័ន្ធប្រព្រឹត្ដិកម្មសម្រាប់ផ្គត់ផ្គង់ដល់ពលរដ្ឋ ប៉ុន្ដែឥឡូវនេះទឹកនៅសល់តែ ២ ម៉ែត្រប៉ុណ្ណោះ។
យ៉ាងណាក្ដី លោកបានឱ្យដឹងថា នៅថ្ងៃទី ៧ ខែមីនាខាងមុខនេះ រដ្ឋាករទឹកនឹងចុះកិច្ចសន្យាលើការសាងសង់រោងចក្រទឹកស្អាតថ្មីមួយទៀតនៅតាខ្មៅ ក្រោមជំនួយឥតសំណងរបស់ប្រទេសជប៉ុន ដែលអាចផ្គត់ផ្គង់ទឹកបានប្រមាណ ៣ ម៉ឺនម៉ែត្រគុបក្នុង ១ ថ្ងៃ។ ជាមួយគ្នានេះរោងចក្របាក់ខែងដែលទទួលបានការសម្ពោធពីលោកនាយករដ្ឋមន្ដ្រី ហ៊ុន សែន កាលពីខែមករា ឆ្នាំ ២០២០ បានសាងសង់រួចរាល់ប្រមាណ ៦០ ភាគរយហើយ ដែលតាមផែនការនឹងសាងសង់រួចរាល់នៅចុងឆ្នាំ ២០២៣។
លោកបញ្ជាក់ថា៖ «យើងនឹងមានទឹកប្រើប្រាស់គ្រប់គ្រាន់។ នៅដើមឆ្នាំ ២០២៤ គឺធានាថា ទឹកនៅក្នុងរាជធានី-ភ្នំពេញ លែងមានបញ្ហាហើយ គឺគ្រប់គ្រាន់ទាំងអស់»។
លោក ឡេង ខៀវ ប្រធានក្រុមប្រឹក្សាភិបាលសមាគមអ្នកផ្គត់ផ្គង់ទឹកស្អាតកម្ពុជាប្រាប់ភ្នំពេញប៉ុស្ដិ៍នៅថ្ងៃទី ១ មីនានេះថា បច្ចុប្បន្ននៅជាយរាជធានី-ភ្នំពេញពិតជាមានការខ្វះខាតទឹកស្អាតប្រើប្រាស់តាមតំបន់មួយចំនួន ដូចជានៅតំបន់ព្រែកហូរ ក្រុងតាខ្មៅ និងកំបូលជាដើម។
លោកបញ្ជាក់ថា៖ «ទាក់ទងនឹងបញ្ហាខ្វះទឹកនៅភ្នំពេញនេះពួកយើងក៏ធ្លាប់បានទាក់ទងទៅរដ្ឋាករទឹកដើម្បីដោះស្រាយដែរ ប៉ុន្ដែខាងរដ្ឋាករទឹកបានប្រាប់ថា កំពុងដំណើរការដោះស្រាយ។ យើងមិនដឹងថា ដំណើរការនេះទទួលបានលទ្ធផលយ៉ាងណាទេ»។
លោក ខៀវ បានបញ្ជាក់ថា ដើម្បីដោះស្រាយបញ្ហាកង្វះទឹកស្អាតនេះក្នុងនាមសមាគម មានតែស្នើទៅជួបជាមួយអាជីវករផ្គត់ផ្គង់ទឹកនៅតាមតំបន់ធ្វើយ៉ាងណាពង្រីកការផ្គត់ផ្គង់គុណភាពទឹកឱ្យបានគ្រប់គ្រាន់ និងស្អាតដល់ប្រជាពលរដ្ឋ ឬបង្កើនការផលិតទឹកស្អាតនេះថែមទៀតនៅតាមតំបន់ដែលខ្វះខាតនោះ។
តាមរយៈរដ្ឋាករទឹក គិតតាំងពីការផ្គត់ផ្គង់តាំងពីឆ្នាំ ១៩៩៣ មកទល់ឆ្នាំ ២០២០ រដ្ឋាករទឹកបានប្រើប្រាស់ថវិកាអស់ប្រមាណ ៦៩០ លានដុល្លារដែលបានធ្វើឱ្យសមត្ថភាពផ្គត់ផ្គង់ទឹកកើនឡើងពី ៦៣ ០០០ ម៉ែត្រគុប មកដល់ ៥៩២ ពាន់ម៉ែត្រគុបក្នុង ១ ថ្ងៃនាពេលបច្ចុប្បន្ន៕