The Phnom Penh Post Search

Search form




Logo of Phnom Penh Post newspaper Phnom Penh Post - គណៈកម្មាធិការ​ជាតិ​ប្រយុទ្ធប្រឆាំង​អំពើ​ជួញដូរ​មនុស្ស​ និង​អង្គការ​​វីនរ៉ក់​អន្តរជាតិ​ចុះ​ MoU លើកកម្ពស់​សហប្រតិបត្តិ​ការប្រឆាំង​ការជួញដូរ

គណៈកម្មាធិការ​ជាតិ​ប្រយុទ្ធប្រឆាំង​អំពើ​ជួញដូរ​មនុស្ស​ និង​អង្គការ​​វីនរ៉ក់​អន្តរជាតិ​ចុះ​ MoU លើកកម្ពស់​សហប្រតិបត្តិ​ការប្រឆាំង​ការជួញដូរ

Content image - Phnom Penh Post
ពិធី​ចុះ​ MoU លើកកម្ពស់​ការប្រឆាំង​ការជួញដូរ​មនុស្ស​។ រូបថត NCCT

គណៈកម្មាធិការ​ជាតិ​ប្រយុទ្ធប្រឆាំង​អំពើ​ជួញដូរ​មនុស្ស​ និង​អង្គការ​​វីនរ៉ក់​អន្តរជាតិ​ចុះ​ MoU លើកកម្ពស់​សហប្រតិបត្តិ​ការប្រឆាំង​ការជួញដូរ

ភ្នំពេញៈ គណៈកម្មាធិការ​ជាតិ​ប្រយុទ្ធប្រឆាំង​អំពើ​ជួញដូរ​មនុស្ស និង​អង្គការ​វីនរ៉ក់​អន្តរជាតិ ចុះ​អនុស្សរណៈ​នៃ​ការយោគយល់ បង្កើន​កិច្ចសហប្រតិបត្តិការ លើកកម្ពស់​ការប្រយុទ្ធប្រឆាំង​ និង​វិធានការ​ប្រឆាំង​អំពើ​ជួញដូរ​មនុស្ស​នៅក្នុង​ប្រទេស​កម្ពុជា​។

អនុស្សរណៈ​នៃ​ការ​យោគយល់​នេះ​ត្រូវបាន​ចុះ​ហត្ថលេខា​ដោយ​លោកស្រី ជូ ប៊ុនអេង រដ្ឋលេខាធិការ​ក្រសួងមហាផ្ទៃ និង​ជា​អនុប្រធាន​អចិន្រៃ្តយ៍ គណៈកម្មាធិការ​ជាតិ​ប្រយុទ្ធប្រឆាំង​អំពើ​ជួញដូរ​មនុស្ស (​គ. ជ. ប. ជ​) និង លោក Mark Taylor ប្រធាន​គម្រោង CTIP និង​ជា តំណាង​អង្គការ​វីនរ៉ក់​កាលពី​ថ្ងៃទី ​២៨ ខែកុម្ភៈ ឆ្នាំ​ ២០២២ ។

តាមរយៈ​ខ្លឹមសារ​នៃ​អនុស្សរណៈ​នៃ​ការយោគយល់​នេះ​សរសេរថា នឹង​ពង្រឹង​កិច្ចសហការ​ដើម្បី​ឆ្លើយតប​ចំពោះ​អនុសាសន៍​សម្រាប់​កម្ពុជា ដែលមាន​ចែង​នៅក្នុង​របាយការណ៍​ស្តីពី​អំពើ​ជួញដូរ​មនុស្ស​របស់​ក្រសួងការបរទេស​សហរដ្ឋ​អាមេរិក និង​សំដៅ​លើកកម្ពស់​ប្រសិទ្ធភាព​វិធានការ​ប្រយុទ្ធប្រឆាំង​អំពើ​ជួញដូរ​មនុស្ស​។

លោកស្រី ជូ ប៊ុនអេង រដ្ឋលេខាធិការ​ក្រសួងមហាផ្ទៃ និង​ជា​អនុប្រធាន​អចិន្រៃ្តយ៍​នៃ​គណៈកម្មាធិការ​ជាតិ​ប្រយុទ្ធប្រឆាំង​អំពើ​ជួញដូរ​មនុស្ស​ថ្លែងថា គ.ជ.ប.ជ រីករាយ​ក្នុងការ​សហការ​យ៉ាង​ជិតស្និទ្ធ​ជាមួយ គម្រោង​ប្រយុទ្ធប្រឆាំង​អំពើ​ជួញដូរ​មនុស្ស​នៅ​កម្ពុជា ដែល​អនុវត្ត​ដោយ​វីនរ៉ក់​អន្តរជាតិ​ក្នុង​កិច្ចការ​ប្រយុទ្ធប្រឆាំង​អំពើ​ជួញដូរ​មនុស្ស​។ មាន​កិច្ចការ​ជាច្រើន​ដែល​អាចធ្វើ​រួមគ្នា​បន្ថែម​ពីលើ​អ្វីដែល​កំពុង​ធ្វើ​កន្លងមក ដើម្បី​ប្រយុទ្ធប្រឆាំង​អំពើ​ជួញដូរ​មនុស្ស​ឱ្យ​កាន់តែ​មាន​ប្រសិទ្ធភាព​។

លោកស្រី​ថ្លែងថា​៖ «​យើង​នឹង​ពិនិត្យមើល​ផែនការ​យុទ្ធសាស្ត្រ​ជាតិ​សម្រាប់​ការប្រយុទ្ធប្រឆាំង​អំពើ​ជួញដូរ​មនុស្ស និង​ពិភាក្សា​អំពី​របៀប​ដែល​គម្រោង​នេះ​អាចជួយ​សម្រេចបាន​នូវ​លទ្ធផល​ដែល​បានគ្រោង​ទុក ស្របតាម​គោលបំណង និង​ទិសដៅ​ដែល​បានកំណត់​ចែង​នៅក្នុង​ផែនការ​យុទ្ធសាស្ត្រ​ជាតិ​»​។

ដោយ​ទទួលបាន​ការគាំទ្រ​ផ្នែក​ថវិកា​ដោយ​ទីភ្នាក់ងារ​ជំនួយ​អាមេរិក​ប្រចាំ​នៅ​កម្ពុជា​ដែល​ហៅ​កាត់​ថា​ USAID គម្រោង CTIP ​នឹង​គាំទ្រ​ដល់​ពលករ​ចំណាកស្រុក​ និង​អ្នក​ដែលមាន​ហានិភ័យ​តាមរយៈ​ការលើកស្ទួយ​ជីវភាព​ក្នុង​ការចិញ្ចឹមជីវិត​ប្រកបដោយ​ភាពច្នៃប្រឌិត និង​ផ្តល់ឱកាស​កសាង​ជំនាញ ដោយ​កាត់បន្ថយ​ការលើកទឹកចិត្ត​ក្នុងការ​ស្វែងរក​ឱកាស​ចិញ្ចឹមជីវិត​ដែលមាន​ហានិភ័យ​ឆ្ងាយ​ពី​ផ្ទះ​។

លោក Mark Taylor ប្រធាន​គម្រោង CTIP និង​ជា តំណាង​អង្គការ​វីនរ៉ក់ ថ្លែងថា គម្រោង CTIP កម្ពុជា មាន​សេចក្តី​សោមនស្ស​រីករាយ​ជាខ្លាំង​ក្នុងការ​បញ្ជាក់​ឡើងវិញ​នូវ​ការ​គាំទ្រ​របស់ខ្លួន​ចំពោះ​គណៈកម្មាធិការ​ជាតិ​ប្រយុទ្ធប្រឆាំង​អំពើ​ជួញដូរ​មនុស្ស​នៅថ្ងៃនេះ តាមរយៈ​ការចុះហត្ថលេខា​លើ​អនុស្សរណៈ​យោគយល់​គ្នា​ជាមួយ​លោកស្រី ជូ ប៊ុនអេង អនុប្រធាន​អចិន្រៃ្តយ៍​នៃ គ.ជ.ប.ជ​។

លោកស្រី​ថ្លែងថា​៖ «​គ.ជ.ប.ជ បាន​វិ​វត្ត​ទៅជា​ស្ថាប័ន​សម្របសម្រួល​ប្រកបដោយ​ប្រសិទ្ធភាព​ខ្ពស់​លើ​កិច្ចខិតខំ​ប្រឹងប្រែង​ប្រឆាំង​អំពើ​ជួញដូរ​មនុស្ស​របស់​រាជរដ្ឋាភិបាល​កម្ពុជា ហើយ​ស្ថាប័ន​នេះ​បម្រើ​ជា​គំរូ​សម្រាប់​ស្ថាប័ន​ដទៃទៀត​នៅក្នុង​តំបន់ និង​លើ​ពិភពលោក​។ គម្រោង CTIP ប្រាកដថា​នឹង​អាច​សម្រេច​ជោគជ័យ​រួមគ្នា​ជាមួយ គ.ជ.ប.ជ និង​សមាជិក​របស់​ស្ថាប័ន​នេះ​ក្នុង​កិច្ចការ​ប្រយុទ្ធប្រឆាំង​អំពើ​​ជួញដូរ​មនុស្ស​ក្នុង​រយៈពេល ៥ ឆ្នាំ​បន្តទៀត​»​។

តាម​សេចក្តី​ប្រកាស​ព័ត៌មាន​របស់​អង្គការ​វីនរ៉ក់ នៅ​ថ្ងៃទី ​១ ខែមីនា បានឱ្យដឹងថា នៅ​ឆ្នាំ ២០២១ កូវីដ​ ១៩ បានធ្វើឱ្យ​ស្ថានការណ៍​ទាំងមូល​នៅក្នុង​ព្រះរាជាណាចក្រ​កម្ពុជា​កាន់តែ​មាន​សភាព​ធ្ងន់ធ្ងរ ដោយមាន​លំហូរ​នៃ​ពលករ​ចំណាកស្រុក​ត្រឡប់​មកពី​ប្រទេស​ជិតខាង និង​ការកើនឡើង​នៃ​ភាព​អត់​ការងារ​ធ្វើ​នៃ​ប្រជាជន​ក្នុងស្រុក​ដោយសារតែ​ការបិទ​រោងចក្រ និង​គ្រឹះស្ថាន​អាជីវកម្ម​មួយចំនួន ដើម្បី​ទប់ស្កាត់​ការរីក​រាលដាល​នៃ​វីរុស​កូវីដ​។

សេចក្តីប្រកាស​ព័ត៌មាន​នេះ​បន្តថា​ក្នុងអំឡុង​ភាគច្រើន​នៃ​ឆ្នាំ​ ២០២១ ​សកម្មភាព​សង្គម​ត្រូវបាន​កម្រិត​ ខណៈ​មានការ​កើនឡើង​ខ្លាំង​នៃ​សកម្មភាព​តាម​អ៊ីនធឺណិត​ដែល​បាន​បង្កើត​ឱកាស​កាន់តែច្រើន​ដល់​ជនល្មើស​ក្នុងការ​ប្រព្រឹត្ត​បទល្មើស​កេងប្រវ័ញ្ច​លើ​ប្រព័ន្ធ​អ៊ីនធឺណិត​តាម​រូបភាព​ផ្សេងៗ​ជាច្រើន​ប្រភេទ​។

យោងតាម គ.ជ.ប.ជ ជនសង្ស័យ​ចំនួន ៤០០ នាក់​ត្រូវបាន​ចាប់ខ្លួន​ក្នុង​ឆ្នាំ​ ២០២១ ដែលជា​លទ្ធផល​នៃប្រតិបត្តិការ​បង្ក្រាប​បទល្មើស​ពាក់ព័ន្ធ​នឹង​អំពើ​ជួញដូរ​មនុស្ស​។ ប៉ូលិស​បាន​បង្ក្រាប​បទលើ្ម​​ពាក់ព័ន្ធ​អំពើ​ជួញដូរ​មនុស្ស​បាន​ចំនួន​ ២៣៥​ ករណី​នៅក្នុង​ឆ្នាំ​ ២០២១ ដែលជា​ការ​កើនឡើង​យ៉ាងខ្លាំង​ (​កើនឡើង ១៩១ ករណី​បន្ថែមទៀត​) បើ​ប្រៀបធៀប​នឹង​បទល្មើស​ដែល​ត្រូវបាន​បង្ក្រាប​ក្នុង​ឆ្នាំ​ ២០២០ (៤៤ ករណី​ប៉ុណ្ណោះ​)​។

របាយការណ៍​នេះ​បន្តថា ចាប់តាំងពី​បានប្រកាស​ឱ្យ​ដំណើរការ​កាលពី​ខែសីហា ឆ្នាំ​ ២០២១ គម្រោង CTIP បាន​ចូលរួម​ក្នុងការ​គាំទ្រ​យ៉ាង​ជិតស្និទ្ធ​ដល់ គ.ជ.ប.ជ ដើម្បី​បង្កើន​វិសាលភាព​នៃ​ការបណ្តុះបណ្តាល​អំពី​របៀប​កំណត់​អត្តសញ្ញាណ​ជនរងគ្រោះ​ដោយ​អំពើ​ជួញដូរ​មនុស្ស និង​ផ្តល់​សេវាកម្ម​សមស្រប​ទៅដល់​មន្ត្រី​ជួរមុខ​នៅតាម​ស្រុក​ជាប់​ព្រំដែន​ប្រទេស​ថៃ​ក្នុង​ខេត្ត​បាត់​​ដំបង​។

គម្រោង CTIP ក៏បាន​ចាប់ផ្តើម​កិច្ចខិតខំ​ប្រឹងប្រែង​ផ្នែក​បង្ការ​ទប់ស្កាត់​របស់​ខ្លួន​តាមរយៈ​ការបណ្តុះបណ្តាល​ដល់​ប្រជាជន​ក្នុង​សហគមន៍​ងាយ​រងគ្រោះ​ដោយ​អំពើ​ជួញដូរ​មនុស្ស ស្តីពី​អំពើ​ជួញដូរ​មនុស្ស និង​ការធ្វើ​ចំណាកស្រុក​ប្រកបដោយ​សុវត្ថិភាព​នៅ​ថ្នាក់​ខេត្ត ព្រមទាំង​ចូលរួម​ក្នុង​ថ្នាក់ជាតិ​រួមមាន​ដូចជា កិច្ចការ​វាយតម្លៃ​ពាក់កណ្តាល​អាណត្តិ​នៃ​ផែនការ​យុទ្ធសាស្ត្រ​ជាតិ​ ៥ ​ឆ្នាំ​សម្រាប់​ប្រឆាំង​អំពើ​ជួញដូរ​មនុស្ស​ការពិនិត្យ​ឡើងវិញ​ និង​ធ្វើ​បច្ចុប្បន្នភាព​គោលការណ៍​ណែនាំ​ស្តីពី​ការកំណត់​អត្តសញ្ញាណ​ជនរងគ្រោះ​ដោយ​អំពើ​ជួញដូរ​មនុស្ស​ក្នុងចំណោម​កិច្ចការ​សំខាន់ៗ​មួយចំនួនទៀត​ដែល​គម្រោង​នេះ​កំពុង​សហការ​ធ្វើ​ជាមួយ គ.ជ.ប.ជ​៕

អត្ថបទគួរចាប់អារម្មណ៍