.jpg)
ថ្នាំព្យាបាលជំងឺកូវីដ ១៩ ម៉ូលនូពីរ៉ាវា។ រូបថត ហ្វេសប៊ុក
ភ្នំពេញៈ ក្រសួងសុខាភិបាល បានបញ្ជាក់ថា ការប្រើប្រាស់ថ្នាំព្យាបាលជំងឺកូវីដ ១៩ ប្រភេទម៉ូលណាទ្រីស ឬម៉ូលនូពីរ៉ាវា កាប់ស៊ុល ២០០ មិល្លីក្រាម មិនមែនសម្រាប់លេបបង្ការការឆ្លងជំងឺកូវីដ ១៩ នោះឡើយ ប៉ុន្តែវាជាឱសថសម្រាប់លេប ដើម្បីព្យាបាលជំងឺកូវីដនៅពេលដែលឈឺប៉ុណ្ណោះ។
រដ្ឋលេខាធិការក្រសួងសុខាភិបាល លោកស្រី ឱ វណ្ណឌីន បានថ្លែងថា ក្រសួងសុខាភិបាលបានធ្វើការណែនាំ ក្រើនរំឭកពីនីតិវិធី ស្តង់ដាដែលត្រូវប្រកាន់យក និងអនុវត្តសម្រាប់ការថែទាំ ព្យាបាលអ្នកជំងឺកូវីដ ១៩ នៅតាមផ្ទះ ដោយក្នុងការណែនាំនោះ ក៏មានការលើកឡើងពីការប្រើប្រាស់ឱសថម៉ូលនូពីរ៉ាវា សម្រាប់តែអ្នកដែលរកឃើញមានវិជ្ជមានកូវីដ ១៩ ប៉ុណ្ណោះ។
លោកស្រីមានប្រសាសន៍ថា៖ «ការអនុញ្ញាតឱ្យប្រើប្រាស់ឱសថម៉ូលនូពីរ៉ាវានេះ គឺសម្រាប់តែអ្នកដែលរកឃើញវិជ្ជមានវីរុសកូវីដ ១៩ តែប៉ុណ្ណោះ មិនមែនសម្រាប់ទិញយកទៅលេប ដើម្បីការពារមិនឱ្យឆ្លងកូវីដ ១៩ នោះទេ។ មានបងប្អូនយើងខ្លះអាចច្រឡំពីការប្រើប្រាស់ថ្នាំនេះ»។
ចំនួននៃការឆ្លងវីរុសកូវីដ ១៩ ពិសេសប្រភេទអូមីក្រុងត្រូវបានរកឃើញជារៀងរាល់ថ្ងៃ ដែលធ្វើឱ្យប្រជាពលរដ្ឋមានការភ័យបារម្ភខ្លាំងពីការឆ្លងនេះ។
លោកស្រី ឱ វណ្ណឌីន បានបន្តថា ការភ័យ ការព្រួយបារម្ភរបស់ប្រជាពលរដ្ឋនេះ គឺជាការត្រឹមត្រូវហើយ ប៉ុន្តែពួកគាត់ក៏មិនត្រូវភ័យពេក ហើយក៏មិនត្រូវហ៊ានពេកដែរ។ លោកស្រីបញ្ជាក់ថា៖ «កត្តាសំខាន់គឺការការពារខ្លួនយើងទេ ហើយការដែលយើងនាំគ្នាសម្រុកទៅទិញឱសថម៉ូលនូពីរ៉ាវាមកប្រើប្រាស់ ខណៈដែលយើងមិនទាន់បានឆ្លងវីរុសនេះផងនោះ វាគឺជាការមិនត្រឹមត្រូវនោះទេ។ ខ្ញុំសុំបញ្ជាក់ជាថ្មី ឱសថនេះ មិនមែនយកទៅលេប ដើម្បីការពារនោះទេ ប៉ុន្តែសម្រាប់អ្នកដែលធ្វើតេស្តរហ័សឃើញមាន ២ ឆ្នូត ឬវិជ្ជមានកូវីដ ១៩។ អ្នកជំងឺត្រូវលេបថ្នាំនេះរយៈពេល ៥ ថ្ងៃ»។
ទោះបីជាប្រជាពលរដ្ឋខ្លះ នាំគ្នាទៅទិញឱសថម៉ូលនូពីរ៉ាវាដើម្បីស្តុកទុក តែការអនុវត្តនូវការការពារមានការខ្វះចន្លោះ នោះការឈឺឬការឆ្លងរបស់បុគ្គលនោះ ឬក្រុមគ្រួសារ គឺមានគ្រប់ពេលទាំងអស់។ ដូច្នេះ អ្វីដែលត្រូវធ្វើគឺត្រូវនាំគ្នាទប់ស្កាត់ល្បឿននៃការឆ្លងវីរុសកូវីដ ១៩ ពិសេសអូមីក្រុង កុំឱ្យឆ្លងចូលក្នុងសហគមន៍លឿនពេក។ នេះជាការអំពាវនាវបន្ថែមពីលោកស្រី ឱ វណ្ណឌីន។
ទាក់ទងនឹងការព្យាបាលសម្រាប់អ្នកជំងឺកូវីដ ១៩ កម្រិតស្រាលមានរោគសញ្ញាតិចតួច ឬគ្មានរោគសញ្ញា ក្រសួងសុខាភិបាល ធ្លាប់បានណែនាំឱ្យអ្នកជំងឺអាចធ្វើការថែទាំព្យាបាលជំងឺដោយខ្លួនឯងនៅផ្ទះ ដោយប្រើឱសថព្យាបាលតាមរោគសញ្ញាតាមការចាំបាច់ ឬប្រើឱសថប្រឆាំងវីរុស ដូចជា ម៉ូលនូពីរ៉ាវា កាប់ស៊ុល ២០០ មីល្លីក្រាម ជាដើម។
កម្រិតដូសប្រើប្រាស់ គឺលេបម្ដង ៤ គ្រាប់ (កម្រិត ២០០ មីល្លិក្រាមក្នុង ១ គ្រាប់) លេបរៀងរាល់ ១២ ម៉ោងម្តង សម្រាប់រយៈពេល ៥ ថ្ងៃបន្តបន្ទាប់។ គួរប្រើឱសថនេះ ឱ្យបានឆាប់តាមដែលអាចធ្វើទៅបាន បន្ទាប់ពីការធ្វើតេស្តរហ័សរកអង់ទីហ្ស៊ែនកូវីដ ១៩ ឃើញវិជ្ជមាន។ ឱសថនេះមិនអនុញ្ញាតឱ្យស្ត្រីមានផ្ទៃពោះ មនុស្សអាយុក្រោម ១៨ ឆ្នាំ និងស្ត្រីបំបៅដោះកូនប្រើប្រាស់ឡើយ។
ចំណែក លោក ទៀ សីហា អភិបាលខេត្តសៀមរាបបានធ្វើការណែនាំពីការពង្រឹងការអនុវត្តវិធានការសុខាភិបាល ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ ជាពិសេសមេរោគបំប្លែងខ្លួនថ្មី ប្រភេទអូមីក្រុងនៅក្នុងភូមិសាស្ត្រខេត្តសៀមរាប។
លោកបានស្នើឱ្យស្នងការដ្ឋាននគរបាលខេត្ត រដ្ឋបាលក្រុង-ស្រុក មន្ទីរសុខាភិបាល មន្ទីរទេសចរណ៍ មន្ទីរ-អង្គភាពពាក់ព័ន្ធ និងរដ្ឋបាលឃុំ-សង្កាត់ ត្រូវបន្តជំរុញផ្សព្វផ្សាយគ្រប់រូបភាពឱ្យមានការចូលរួមអនុវត្តនូវវិធានការសុខាភិបាល និងវិធានការផ្សេងៗទៀត ពិសេសវិធានការ ៣ ការពារ និង ៣ កុំ នៅតាមទីតាំងសាធារណៈនានា។
លោក ទៀ សីហា បានលើកឡើងថា៖ «ជំរុញផ្សព្វផ្សាយពីការការពារនេះនៅតាមផ្សារ កន្លែងលក់គ្រឿងឧបភោគបរិភោគ និងទំនិញគ្រប់ប្រភេទ វិហារសាសនា វត្តអារាម រមណីយដ្ឋានទេសចរណ៍ ភោជនីយដ្ឋាន-អាហារដ្ឋាន កន្លែងប្រារព្ធពិធីបុណ្យទាន អាពាហ៍ពិពាហ៍ និងទីតាំងផ្សេងទៀតដែលមានសភាពអ៊ូអរ និងមានមនុស្សជួបជុំគ្នាក្នុងចំនួនច្រើន»។
ភោជនីយដ្ឋាន-អាហារដ្ឋាន តូបអាហារ ហាងកាហ្វេ ហាងភេសជ្ជៈ និងអាជីវកម្មដ្ឋានគ្រប់ប្រភេទត្រូវបង្កើនការយកចិត្តទុកដាក់ក្នុងការអនុវត្តវិធានការសុវត្ថិភាពផ្នែកសុខាភិបាល ពាក់ម៉ាស់ រក្សាគម្លាតសុវត្ថិភាពបុគ្គល និងសង្គម ព្រមទាំងប្រកាន់ខ្ជាប់នូវការធ្វើអនាម័យ ការសម្លាប់មេរោគ ការវាស់កម្ដៅ ការស្គែន QR Code និងត្រូវពិនិត្យបណ្ណចាក់វ៉ាក់សាំងជាដើម។ លោក សីហា ក៏បានលើកទឹកចិត្តដល់ប្រជាពលរដ្ឋទូទៅ និងអ្នករៀបចំកម្មវិធីជួបជុំនានា រួមនឹងសកម្មភាពសង្គមត្រូវកាត់បន្ថយជាអតិបរមានូវការជួបជុំគ្នាច្រើន និងត្រូវកាត់បន្ថយការចូលរួមកម្មវិធីជួបជុំញឹកញាប់។
ទន្ទឹមនឹងនេះដែររដ្ឋបាលខេត្តក៏បានណែនាំឱ្យមានការត្រួតពិនិត្យបណ្ណចាក់វ៉ាក់សាំង បើបុគ្គលណាមួយពុំបានចាក់វ៉ាក់សាំង ឬហួសរយៈពេល ៤ ខែហើយមិនបានទៅចាក់វ៉ាក់សាំង ដូសទី ៣ ដូសទី៤ ឬដូសជំរុញដោយគ្មានមូលហេតុត្រឹមត្រូវ បុគ្គលនោះមិនអនុញ្ញាតឱ្យចូលទីតាំង ឬកន្លែងប្រារព្ធពិធីណាមួយឡើយ៕
វីដេអូ៖
