.jpg)
វត្ថុបុរាណ ដែលត្រូវបានចុះបញ្ជីជាសម្បត្តិជាតិ។ រូបថត មន្ទីរវប្បធម៌ខេត្ត
ឧត្តរមានជ័យៈ វត្ថុបុរាណដែលមានអាយុកាលជាច្រើនពាន់ឆ្នាំចំនួន ៦៨ ផ្ទាំង នៅក្នុងវត្តជ័យឧត្តមចុងកាល់ ត្រូវបានមន្ត្រីជំនាញការិយាល័យបេតិកភណ្ឌ និងការិយាល័យសារមន្ទីរនៃមន្ទីរវប្បធម៌ និងវិចិត្រសិល្បៈ ខេត្តឧត្តរមានជ័យ សហការជាមួយកម្លាំងនគរបាលការពារបេតិកភណ្ឌចុះពិនិត្យ និងបង់លេខសម្គាល់ចូលទៅក្នុងបញ្ជីវត្ថុបុរាណ ដើម្បីរក្សាទុកជាសម្បត្តិជាតិ។ នេះបើតាមការប្រាប់ឱ្យដឹងពីមន្ត្រីជំនាញដែលចូលរួមនៅកិច្ចការនេះ។
លោក យាន យ៉ា មន្ត្រីជំនាញការិយាល័យបេតិកភណ្ឌនៃមន្ទីរវប្បធម៌ និងវិចិត្រសិល្បៈ ខេត្តឧត្តរមានជ័យ បានប្រាប់ភ្នំពេញប៉ុស្តិ៍ថា វត្ថុបុរាណទាំងនោះភាគច្រើនជាកុលាលភាជន៍ ដែលធ្វើពីដីដុត មានទម្រង់ជាក្អម ខួច ថូ ផ្តិលទឹក និងជាទម្រង់ ក្រឡសម្រាប់អុជធូប។ ក្រៅពីកុលាលភាជន៍ គឺជាបំណែកនៃរូបចម្លាក់ប្រាសាទបុរាណ ដូចជាក្បាលនាគ ផ្ដែរ និង ហោងជាង ដែលធ្វើពីថ្មភក់។
លោកថា៖ «ផ្អែកតាមទិន្នន័យនៃការពិនិត្យតាមឧបករណ៍ DNA បង្ហាញថា កុលាលភាជន៍ទាំងនោះ ភាគច្រើនត្រូវបានគេបង្កើតឡើងតាំងពីសម័យបុរេប្រវត្តិសាស្ត្រមកម្ល៉េះបំណែករូបចម្លាក់នៃប្រាសាទបុរាណវិញភាគច្រើនស្ថិតក្នុងសម័យអង្គរ»។ «បច្ចុប្បន្ន កូលាលភាជន៍ និង បំណែករូបចម្លាក់នៃប្រាសាទបុរាណត្រូវបានក្រុមការងារយើងបង់លេខសម្គាល់ចូលទៅក្នុងបញ្ជីវត្ថុបុរាណ ដើម្បីរក្សាទុកជាសម្បត្តិបេតិកភណ្ឌវប្បធម៌ជាតិរួចរាល់ហើយ។ ប៉ុន្តែវត្ថុបុរាណទាំងនោះ ត្រូវបានរក្សាតម្កល់ទុកនៅក្នុងវត្តជ័យឧត្តមចុងកាល់ដដែលទេ»។
វត្តជ័យឧត្តមចុងកាល់ មានទីតាំងស្ថិតនៅភូមិគោកវត្ត ឃុំ-ស្រុកចុងកាល់ ខេត្តឧត្តរមានជ័យ។ ព្រះចៅអធិការវត្តជ័យឧត្តមចុងកាល់ព្រះនាម លុច ប៊ុនលាំង មានសង្ឃដីកាប្រាប់ភ្នំពេញប៉ុស្តិ៍ថា កុលាលភាជន៍ និងបំណែករូបចម្លាក់នៃប្រាសាទបុរាណទាំងនោះមានមួយផ្នែកបានមកពីពុទ្ធបរិស័ទ ជិតឆ្ងាយប្រគល់ជូនមកគណៈកម្មការវត្ត និងមួយផ្នែកទៀតជារបស់គរុវត្ត ដែលបន្សល់ទុកមក។
ព្រះអង្គមានសង្ឃដីកាថា៖ «អាត្មាក៏ដូចជាអាជ្ញាធរមូលដ្ឋាន និង ប្រជាពុទ្ធបរិស័ទ ទូទាំងស្រុកចុងកាល់ មុនដំបូងមិនគិតថា កុលាលភាជន៍ និងបំណែកនៃរូបចម្លាក់ទាំងនោះ ជាវត្ថុបុរាណដែលមានអាយុកាលរាប់ពាន់ឆ្នាំបែបនេះទេ ប៉ុន្តែក្រោយមន្ត្រីជំនាញចុះមកពិនិត្យ និងប្រាប់ថាជាវត្ថុបុរាណក្នុងសម័យបុរេប្រវត្តិ និង ក្នុងសម័យអង្គរ ពួកយើងមានក្ដីរីករាយខ្លាំងណាស់ ដោយគិតថា ពួកយើងបានរួមចំណែកនៅក្នុងការការពារ សម្បត្តិវប្បធម៌ជាតិ»។
បើតាមព្រះចៅអធិការ នៅពេលនេះ កូលាលភាជន៍ និងបំណែករូបចម្លាក់ប្រាសាទបុរាណទាំងនោះត្រូវបានក្រុមគណៈកម្មការវត្តរៀបចំទុកដាក់នៅក្នុងទូកញ្ចក់មួយចំនួន ដើម្បីតាំងបង្ហាញឱ្យពុទ្ធបរិស័ទជិតឆ្ងាយបានទស្សនា និងសិក្សាស្វែងយល់បន្ថែមពីទម្រង់នៃសិល្បៈស្មូនកុលាលភាជន៍ និងក្បាច់ចម្លាក់លើថ្មភក់ដ៏ល្អប្រណីតរបស់បុព្វបុរសខ្មែរសម័យបុរាណ៕
