បន្ទាយមានជ័យៈ លោក ស ខេង រដ្ឋមន្ត្រីក្រសួងមហាផ្ទៃនៅថ្ងៃទី ១ ខែមីនា បានសម្ពោធ ជាផ្លូវការអគារថ្មីមួយកន្លែងនៅច្រកព្រំដែនអន្តរជាតិប៉ោយប៉ែត កម្ពុជា- ថៃ ក្នុងខេត្តបន្ទាយមានជ័យ ដើម្បីត្រួតពិនិត្យ និងបម្រើសេវាបំពេញបែបបទចេញ-ចូលប្រទេសដល់អ្នកដំណើរជាតិ និងអន្តរជាតិ។
លោក ស ខេង បានថ្លែងថា ច្រកទ្វារអន្តរជាតិនេះប្រៀបបាននឹងកន្លែងផ្ដល់សេវាសាធារណៈមួយជូនពលរដ្ឋខ្មែរ និងជនបរទេសដែលត្រូវធ្វើដំណើរ កទំនិញ ចេញចូល តាមគ្រប់មធ្យោបាយ និងចម្រុះជាតិសាសន៍ ដូច្នេះមន្ត្រីពាក់ព័ន្ធមានតួនាទីបង្កលក្ខណៈងាយស្រួលគ្រប់បែបយ៉ាង រួមទាំងការត្រួតពិនិត្យដើម្បីរកឱ្យឃើញបទល្មើសនៃការចេញចូលនោះដែរ។
លោករដ្ឋមន្ត្រី ថ្លែងបន្តថា ច្រកទ្វារអន្តរជាតិប៉ោយប៉ែតនេះ ជាច្រកទ្វារឆ្លងកាត់ព្រំដែនមានអាយុកាលចំណាស់មួយនៅកម្ពុជា ហើយក៏ជាច្រកទ្វារសំខាន់នៃការធ្វើដំណើររបស់ភ្ញៀវទេសចរឆ្ពោះទៅរាជធានី-ភ្នំពេញតាមផ្លូវជាតិលេខ ៥ និងខេត្តសៀមរាបតាមផ្លូវជាតិលេខ ៦ ផងដែរ។
បន្ថែមពីនេះលោក រដ្ឋមន្ត្រី ក៏បានថ្លែងអំណរគុណរាជរដ្ឋាភិបាលថៃ ពិសេសរដ្ឋបាលខេត្តស្រះកែវ ដែលជានិច្ចកាលបានផ្ដល់កិច្ចសហការយ៉ាងល្អជាមួយកម្ពុជា រួមចំណែកអភិវឌ្ឍតំបន់ប៉ោយប៉ែត និយាយដោយឡែក និងនិយាយជារួមជាមួយកម្ពុជា។
លោករដ្ឋមន្ត្រីថ្លែងបន្តថា៖ «ខ្ញុំកោតសរសើរចំពោះកិច្ចខិតខំប្រឹងប្រែងទាំងអស់របស់ថ្នាក់ដឹកនាំពាក់ព័ន្ធដែលបានយកចិត្តទុកដាក់យ៉ាងសកម្មជាមួយក្រសួងមហាផ្ទៃ ថ្នាក់ដឹកនាំខេត្ត និងអង្គភាពពាក់ព័ន្ធផ្សេងទៀត ព្រមទាំងក្រុមវិស្វករជំនាញ សម្រាប់កិច្ចខិតខំប្រឹងប្រែងរួមគ្នាជម្នះការលំបាកផ្សេងៗរហូតធ្វើឱ្យសម្រេចបានសមិទ្ធផលដែលបានប្រារព្ធពិធីសម្ពោធនាថ្ងៃនេះ»។
រដ្ឋមន្ត្រីក្រសួងទេសចរណ៍លោក ថោង ខុន ដែលបានចូលរួមកម្មវិធីនោះបានថ្លែងថា អគារច្រកទ្វារព្រំដែនអន្តរជាតិប៉ោយប៉ែតថ្មីជាសមិទ្ធផលថ្មីសន្លាងមួយទៀតរបស់រាជរដ្ឋាភិបាល សម័យតេជោ ដែលបានបង្ហាញ និងបញ្ជាក់ច្បាស់ពីមុខមាត់ និងមោទនភាពជាតិកម្ពុជា។
លោក ថោង ខុន បានថ្លែងថា៖ «អគារថ្មីនេះមិនត្រឹមតែបម្រើផលប្រយោជន៍ដល់សន្តិសុខ សេដ្ឋកិច្ច និងសង្គមប៉ុណ្ណោះទេ ថែមទាំងចូលរួមគាំទ្រដល់ការបំពេញការងាររបស់ក្រុមមន្ត្រីសមត្ថកិច្ចប្រកបដោយវិជ្ជាជីវៈ ជាមួយឥរិយាបថល្អ រួសរាយរាក់ទាក់ ទន់ភ្លន់ និងម៉ឺងម៉ាត់ផ្នែកជំនាញ ដើម្បីប្រែក្លាយអគារនេះជាកន្លែងដើមទីដំបូងគេមួយក្នុងការផ្តល់បដិសណ្ឋារកិច្ច និងផ្តល់ភាពកក់ក្តៅដល់ភ្ញៀវទេសចរ»។
លោករដ្ឋមន្ត្រីបានគូសបញ្ជាក់ថា ច្រកទ្វារព្រំដែនអន្តរជាតិប៉ោយប៉ែត គឺជាច្រកទ្វារព្រំដែនអន្តរជាតិដ៏សំខាន់មួយរបស់ប្រទេសកម្ពុជា សម្រាប់សេដ្ឋកិច្ច និងទេសចរណ៍ និងជាច្រកផ្លូវគោកចម្បងដែលមុនកូវីដ ១៩ គឺបានទទួលស្វាគមន៍ភ្ញៀវទេសចរប្រមាណជា ២៨% នៃភ្ញៀវទេសចរតាមផ្លូវគោកសរុប និងប្រមាណ ៨,៧% នៃទេសចរអន្តរជាតិសរុបមកកម្ពុជា។
យោងតាមរបាយការណ៍របស់អគ្គនាយកនៃអគ្គនាយកដ្ឋានភ័ស្តុភារ និងហិរញ្ញវត្ថុ លោក សេង យូរអ៊ាន់ បានឱ្យដឹងថា អគារទីស្នាក់ការត្រួតពិនិត្យច្រកទ្វារព្រំដែនអន្តរជាតិប៉ោយប៉ែត កម្ពុជា-ថៃ បានប្រារព្ធពិធីបញ្ចុះបឋមសិលាបើកការដ្ឋានសាងសង់កាលពីថ្ងៃទី ៣០ ខែតុលា ឆ្នាំ ២០១៧ និងបានបញ្ចប់ការសាងសង់កាលពីថ្ងៃទី ២ ខែសីហា ឆ្នាំ ២០២១ ដោយចំណាយថវិការបស់រាជរដ្ឋាភិបាលចំនួន ១៧ ប៊ីលាន និង ១៣ លានរៀល។
លោក យូរអ៊ាន់ ថ្លែងបន្តថា ទន្ទឹមគ្នានេះក៏បានរៀបចំហេដ្ឋារចនាសម្ព័ន្ធក្រៅអគារ រួមមានជួសជុលកែលម្អអគារបំពេញបែបបទចាស់សម្រាប់មន្ត្រីស្នាក់នៅ សាងសង់អគារសម្រាប់អ្នកដំណើររង់ចាំចេញ និងមកដល់ចំនួន ២ ខ្នង ស្ថាបនាផ្លូវបេតុងអ៊ុតកៅស៊ូ រៀបចំសួនច្បារ ដំឡើងបង្គោលភ្លើងបំភ្លឺ សាងសង់របងព័ទ្ធជុំវិញ ដំឡើងត្រង់ស្វ័រ និងតបណ្ដាញទឹកចូលបរិវេណអគារ។
លោកគូសបញ្ជាក់ថា សមិទ្ធផលនេះនឹងបង្កលក្ខណៈងាយស្រួលដល់ភ្ញៀវជាតិ អន្តរជាតិ បង្ការ ទប់ស្កាត់បទល្មើសឆ្លងដែន ឆ្លើយតបតាមសំណូមពរ និងស្ថានភាពជាក់ស្ដែងរបស់មន្ត្រីជំនាញ។
អគារទាំងនេះរួមមាន អគារបំពេញបែបបទចេញ-ចូល មានទំហំ ៣៥,៨០ ម៉ែត្រ គុណ ៥៦,៣៩ ម៉ែត្រ កម្ពស់ ៣ ជាន់ បំពាក់ដោយឧបករណ៍ បរិក្ខារអគ្គិសនី ម៉ាស៊ីនត្រជាក់ កង្ហារបឺតខ្យល់ បណ្ដាញការពារអគ្គិភ័យ កាមេរ៉ាសុវត្ថិភាព ប្រព័ន្ធទូរស័ព្ទ ប្រព័ន្ធអ៊ីនធឺណិត ប្រព័ន្ធសំឡេង ប្រព័ន្ធការពាររន្ទះ ជណ្ដើរយន្តចំនួន ៤ និងចែកជា ២ ផ្នែក ផ្នែកខាងស្ដាំប្រើប្រាស់សម្រាប់អ្នកដំណើរចេញ និងផ្នែកខាងឆ្វេងសម្រាប់អ្នកដំណើរមកដល់៕