បន្ទាយមានជ័យៈ ឪពុកចុងម្នាក់ត្រូវបានតំណាងអយ្យការអមសាលាដំបូងខេត្តបន្ទាយមានជ័យចោទប្រកាន់នៅថ្ងៃទី ១ មីនា ពាក់ព័ន្ធចាប់រំលោភសេពសន្ថវៈកូនស្រីចុងតាំងពីនាងមានអាយុ ៩ ឆ្នាំ ក្នុងឆ្នាំ២០១៩ និងបានចាប់រំលោភសេពសន្ថវៈបានសម្រេចជាបន្តបន្ទាប់ទៀត ក្នុងឆ្នាំ ២០២២ ប្រព្រឹត្តនៅប្រទេសថៃ។
លោក សំរិទ្ធ សុខុន អ្នកនាំពាក្យអយ្យការអមសាលាដំបូងខេត្តបន្ទាយមានជ័យ ប្រាប់នៅថ្ងៃទី ១ មីនា ថា បុរសឈ្មោះ ស៊ុន ពេជ្រ អាយុ ៣៩ ឆ្នាំ ត្រូវបានតំណាងអយ្យការចោទប្រកាន់ពីបទរំលោភសេពសន្ថវៈមានស្ថានទម្ងន់ទោស។ បន្ទាប់ពីត្រូវបានចោទប្រកាន់គឺជនសង្ស័យត្រូវបានតំណាងអយ្យការបញ្ជូនទៅចៅក្រមស៊ើបសួរបន្តទៀត។
លោកថ្លែងថា៖ «បុរសរូបនេះ ត្រូវបានចោទពីបទរំលោភសេពសន្ថវៈមានស្ថានទម្ងន់ទោស ហើយការចោទប្រកាន់នេះតាមមាត្រា ២៤០ នៃក្រមព្រហ្មទណ្ឌ។ ឥឡូវតំណាងអយ្យការបានរុញទៅចៅក្រមស៊ើបសួរ ដើម្បីសម្រេចថា ឃុំខ្លួន ឬមិនឃុំខ្លួន»។
លោក នង សំរ៉ាំង នាយប៉ុស្តិ៍នគរបាលឃុំអូបីជាន់ឱ្យដឹងនៅថ្ងៃទី ១ មីនាតាមសម្តីម្តាយក្មេងស្រីរងគ្រោះថា ស្ត្រីជាម្តាយក្មេងស្រីរងគ្រោះបានលែងលះជាមួយប្តីមុន ហើយគាត់មានកូនស្រី ២ នាក់ជាមួយគ្នា។ ក្រោយមកស្ត្រីម្តាយក្មេងរងគ្រោះបានយកបុរសរូបនេះជាប្តី ហើយបាននាំគ្នាទៅស៊ីឈ្នួលកាប់អំពៅក្នុងខេត្តមួយនៅប្រទេសថៃដែលមានព្រំប្រទល់ជាប់ខេត្តបន្ទាយមានជ័យ។
លោកនិយាយតាមសម្តីម្តាយក្មេងស្រីរងគ្រោះថា ក្នុងការរស់នៅប្រកបរបរស៊ីឈ្នួលគេនោះ បុរសជាឪពុកចុងបានចាប់រំលោភក្មេងស្រីរងគ្រោះបានម្តងក្នុងឆ្នាំ ២០១៩។ បន្ទាប់មកនៅខែកុម្ភៈ ឆ្នាំ ២០២២ នេះជនសង្ស័យបានចាប់ក្មេងរងគ្រោះរំលោភបានសម្រេច ២ ដងទៀត តែខណៈជនសង្ស័យកំពុងធ្វើសកម្មភាពលើកចុងក្រោយ ប្រហែលម៉ោង ១ រំលងអធ្រាត្រឈានចូលថ្ងៃទី ២៦ កុម្ភៈក៏ត្រូវបានម្តាយរបស់ក្មេងរងគ្រោះទាន់ ហើយព្រឹកឡើងក៏ឆ្លងដែនមកប្តឹងនគរបាលប៉ុស្តិ៍ឃុំអូរបីជាន់ ក្នុងស្រុកអូរជ្រៅ ដើម្បីសុំឱ្យសមត្ថកិច្ចជួយអន្តរាគមន៍ចាប់ខ្លួនជនសង្ស័យ។
លោក សំរ៉ាំង បន្ថែមថា ក្រោយពីនគរបាលទទួលបានពាក្យបណ្តឹងពីម្តាយរបស់ក្មេងស្រីរងគ្រោះមកគឺនៅថ្ងៃទី ២៧ កុម្ភៈ លោករួមជាមួយកម្លាំងនគរបាលក្រោមឱវាទបានរកមធ្យោបាយទាក់ទងជនសង្ស័យតាមទូរស័ព្ទដោយបញ្ឆោតឱ្យជនសង្ស័យឆ្លងដែនមកទទួលយកកូន (ក្មេងរងគ្រោះ) ចូលទៅប្រទេសថៃវិញ។ នៅថ្ងៃដដែលនេះស្រាប់តែជនសង្ស័យជិះម៉ូតូ ១ គ្រឿងតែម្នាក់ឯងកាត់ព្រៃឆ្លងដែនមកពីប្រទេសថៃ។ គ្រាន់តែជនសង្ស័យធ្វើដំណើរមកដល់គោលដៅណាត់គ្នាក៏ត្រូវបានសមត្ថកិច្ចចាប់ខ្លួនតែម្តង។
បើតាមលោក សំរ៉ាំង ជនសង្ស័យបានសារភាពថា រូបគេពិតជាបានចាប់កូនចុងរំលោភពិតប្រាកដមែន។ រីឯក្មេងស្រីរងគ្រោះក៏និយាយប្រាប់សមត្ថកិច្ចដែរថា ឪពុកចុងរបស់នាងបានចាប់នាងរំលោភបានម្តងកាលពីនាងមានអាយុ ៩ ឆ្នាំ ហើយក្នុងខែកុម្ភៈឆ្នាំ ២០២២ ឪពុកនាងចាប់រំលោភបាន ២ ដងទៀត។ ដោយយោងចម្លើយរបស់ជនល្មើស និងក្មេងស្រីរងគ្រោះមានលក្ខណៈស៊ីចង្វាក់គ្នា ទើបលោកចាប់ខ្លួនជនល្មើសតែម្តង៕