ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានណែនាំ និងជំរុញឱ្យមន្ត្រីក្រោមឱវាទ ពង្រឹងការត្រួតពិនិត្យការនាំចូលនូវសារធាតុគីមីសំយោគក្នុងវិស័យកសិកម្ម ដើម្បីចូលរួមទប់ស្កាត់ និងប្រយុទ្ធប្រឆាំងការផលិត ចរាចរ ជួញដូរ និងប្រើប្រាស់គ្រឿងញៀននៅកម្ពុជា។
ការជំរុញនេះបានធ្វើឡើងក្នុងកិច្ចប្រជុំស្តីពី «ការចូលរួមយុទ្ធនាការប្រយុទ្ធប្រឆាំងគ្រឿងញៀនក្នុងដែនសមត្ថកិច្ចរបស់ក្រសួងកសិកម្ម» ដែលបានប្រារព្ធឡើងនាថ្ងៃទី ២៨ ខែកុម្ភៈ ឆ្នាំ ២០២២។ ក្នុងកិច្ចប្រជុំនោះ លោក វេង សាខុន បានណែនាំដល់គ្រប់អង្គភាពក្រោមឱវាទក្រសួងបង្កើនការយកចិត្តទុកដាក់ខ្ពស់ដោយត្រូវធ្វើការផ្សព្វផ្សាយឱ្យបានទូលំទូលាយ តាមគ្រប់រូបភាពអំពីហានីភ័យនៃការផលិតការចរាចរ ការជួញដូរ និងការប្រើប្រាស់គ្រឿងញៀន ដល់មន្ត្រីសហគមន៍កសិកម្មសហគមន៍ព្រៃឈើ សហគមន៍វារីវប្បកម្ម និស្សិត ក្រុមហ៊ុនដែលបាននិងកំពុងធ្វើអាជីវកម្មទាក់ទងនឹងវិស័យកសិកម្ម ជាពិសេសវត្ថុធាតុដើមផ្សំ ផលិតជី និងថ្នាំកសិកម្ម វត្ថុធាតុដើមផ្សំ និងផលិតបសុឱសថថ្នាំការពារជំងឺសត្វ និងសារធាតុផ្សំ ឬបន្ថែមក្នុងចំណីសត្វ។
លោកជំរុញយ៉ាងដូច្នេះថា៖ «អគ្គលេខាធិការក្រសួងច្រកចេញចូលតែមួយ លេខាធិការដ្ឋាន សម្បទានដីសេដ្ឋកិច្ច រដ្ឋបាលព្រៃឈើរដ្ឋបាលជលផល អគ្គនាយកដ្ឋានកសិកម្មអគ្គនាយកដ្ឋាន កៅស៊ូ និងនាយកដ្ឋានកសិឧស្សាហកម្មត្រូវពិនិត្យតាមដានឱ្យបានជាប់ជាប្រចាំនូវរាល់សកម្មភាពនាំចេញនាំចូលនូវរាល់សារធាតុគីមី ថ្នាំកសិកម្ម និងសារធាតុផ្សំមកប្រើក្នុងក្រុមហ៊ុន»។
លោកថា៖ «ត្រូវចាត់វិធានការផ្លូវច្បាប់ឱ្យបានម៉ឺងម៉ាត់ខ្ជាប់ខ្ជួន និងត្រូវបង្កើនការយកចិត្តទុកដាក់ប្រុងប្រយ័ត្នខ្ពស់»។
ក្នុងរយៈពេល ៥ ខែដំបូងនៃឆ្នាំ ២០២១ កម្ពុជាបាននាំចូលថ្នាំ និងជីកសិកម្ម សរុបជាង ៩០ ម៉ឺនតោន ក្នុងនោះបាននាំចូលថ្នាំកសិកម្មចំនួន ៤៧ ៤០៩ តោន និងជីកសិកម្ម ៨៥៨ ៦៣២ តោន។ នេះបើយោងសេចក្ដីប្រកាសព័ត៌មានរបស់ក្រសួងកសិកម្ម ចុះថ្ងៃទី ៩ ខែសីហា ឆ្នាំ ២០២១។
យ៉ាងណាក៏ដោយ ការខ្វះកិច្ចសហការក្នុងការចែករំលែក និងផ្ដល់ព័ត៌មានលម្អិតនៅក្នុងក្របខណ្ឌនៃក្រសួង និងស្ថាប័នពាក់ព័ន្ធរបស់ជាតិបានបង្កើតឱ្យមានហានិភ័យយ៉ាងធ្ងន់ធ្ងរដល់សេដ្ឋកិច្ច និងសង្គមនៅកម្ពុជា តាមរយៈការលួចបន្លំនាំចូលនូវសារធាតុគីមីសំយោគពាក់កណ្ដាលសម្រេច ដែលអាចផ្សំសម្រាប់ការផលិតកែច្នៃគ្រឿងញៀននៅកម្ពុជារបស់ក្រុមហ៊ុនទុច្ចរឹតមួយចំនួន។ នេះបើយោងតាមការប្រកាសរបស់លោកឧបនាយករដ្ឋមន្ត្រី ស ខេង កាលពីថ្ងៃទី ២៥ មករា ឆ្នាំ ២០២២។
លោកបន្តថា៖ «កាលពីពេលថ្មីៗ [ខែមករា] កន្លងទៅនេះ ក្រុមសមត្ថកិច្ចនគរបាលបង្ក្រាបគ្រឿងញៀនបានបង្ក្រាបទីតាំងលួចលាក់ផលិតគ្រឿងញៀនដ៏ធំមួយនៅខេត្តកំពង់ស្ពឺ ហើយបានរកឃើញ និងចាប់រឹបអូសសារធាតុគីមីសំយោគសម្រាប់ផ្សំផលិតគ្រឿងញៀនបានជាង ១០០ តោន ដែលសារធាតុគីមីសំយោគទាំងនោះត្រូវបានគេនាំចូលដោយមានអាជ្ញាប័ណ្ណស្របច្បាប់»។
ក្នុងអំឡុងពេលនោះ លោក ស ខេង បានស្នើឱ្យក្រសួងពាក់ព័ន្ធនានា ដែលមានសិទ្ធិក្នុងការផ្ដល់អាជ្ញាប័ណ្ណនាំចូលនូវមុខទំនិញ ពីក្រៅប្រទេសជាពិសេសសារធាតុគីមីសំយោគត្រូវមានកិច្ចសហការឱ្យបានជិតស្និទ្ធជាមួយអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីការពារទប់ស្កាត់ចលនាប៉ុនប៉ងរបស់ក្រុមឧក្រិដ្ឋជនគ្រឿងញៀនក្នុងការយកកម្ពុជាជាទីតាំងកែច្នៃ និងផលិតគ្រឿងញៀន ។
ជុំវិញករណីនេះដែរ លោក វេង សាខុន បានសម្រេចបង្កើតក្រុមការងារផ្សព្វផ្សាយ អប់រំ បង្ការ ទប់ស្កាត់ការប្រើប្រាស់ និងជួញដូរគ្រឿងញៀនមួយ នៅក្នុងក្របខ័ណ្ឌក្រសួងកសិកម្ម ដើម្បីចូលរួមសហការអនុវត្តវិធានការជាយុទ្ធសាស្ត្ររបស់រាជរដ្ឋាភិបាលនៅក្នុងយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី ៧ សម្រាប់អនុវត្តចាប់ពីថ្ងៃទី ១ ខែមករា ដល់ថ្ងៃទី ៣១ ខែធ្នូឆ្នាំ ២០២២។
ទន្ទឹមនឹងនេះ លោកបានណែនាំ និងជំរុញឱ្យក្រុមការងារថ្មីនេះ ត្រូវបង្កើនកិច្ចសហការឱ្យបានទូលំទូលាយ និងស៊ីជម្រៅជាមួយអាជ្ញាធរគ្រឿងញៀន ដើម្បីឱ្យការអនុវត្តផែនការសកម្មភាពនៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី ៧ នេះ ប្រព្រឹត្តទៅប្រកបដោយប្រសិទ្ធភាព និងសម្រេចបានជោគជ័យ៕