កណ្តាលៈ លោក គង់ សោភ័ណ្ឌ អភិបាលខេត្តកណ្តាលបានយល់ព្រមទៅតាមសំណើរបស់លោក ម៉ឹង យូឡេង ប្រធានមន្ទីរសាធារណការ និងដឹកជញ្ជូនខេត្តកណ្តាល ដែលស្នើសុំផ្លាស់ប្ដូរមន្ត្រីរដ្ឋបាលស្ថានីយជញ្ជីងថ្លឹងរថយន្តចំនួន ៥ កន្លែង បន្ទាប់ពីមានការបែកធ្លាយជុំវិញអំពើពុករលួយពាក់ព័ន្ធនឹងវិធានការបង្ក្រាបរថយន្តដឹកលើសទម្ងន់កំណត់តាមស្ថានីយទាំងនោះ។
លិខិតដែលចុះហត្ថលេខាដោយលោក ម៉ឹង យូឡេង ដាក់ជូនអភិបាលខេត្តកណ្ដាល កាលពីថ្ងៃទី ២៣ កុម្ភៈ បានលើកឡើងថា ការស្នើសុំផ្លាស់ប្តូរមន្ត្រីរដ្ឋបាលទាំង ៥ នាក់ គឺដើម្បីធានាដល់ការអនុវត្តការងារដឹកជញ្ជូនលើសទម្ងន់កម្រិតកំណត់ឱ្យមានប្រសិទ្ធភាព និងទប់ស្កាត់ភាពអសកម្មរបស់មន្ត្រីអនុវត្តការងារ ១កន្លែងច្រើនឆ្នាំ នៅតាមស្ថានីយថ្លឹងរថយន្តអចល័ត។
លិខិតដដែលបានបញ្ជាក់ថា៖ «អង្គសន្និបាតបានសម្រេចត្រូវធ្វើការផ្លាស់ប្តូរ សមាសភាពមន្ត្រីថ្មី ឬទីកន្លែងប្រចាំការ នៅតាមស្ថានីយជញ្ជីងអចល័តទាំងអស់។ ហេតុដូចនេះ មន្ទីរសូមស្នើសុំសមាសភាពមន្ត្រីរដ្ឋបាលខេត្តចំនួន ៥ រូប (ប្រសិនបើសមាសភាពចាស់ត្រូវប្តូរស្ថានីយ ប្រចាំការ) សម្រាប់ប្រចាំការនៅស្ថានីយជញ្ជីងអចល័តចំនួន ៥»។
បើតាមលិខិតដដែលបានឱ្យដឹងថា មន្ត្រីរដ្ឋបាលនៅតាមជញ្ជីងដែលត្រូវផ្លាស់ប្ដូរមានចំនួន ៥ កន្លែងនោះគឺមានស្ថានីយ ថ្លឹងរថយន្តកំពង់ភ្នំ ផ្លូវជាតិលេខ ១, ស្ថានីយក្រសាំងផ្លូវជាតិលេខ ២, ស្ថានីយកំពង់ទួលផ្លូវជាតិលេខ ៣, ស្ថានីយអង្គស្នួល ផ្លូវជាតិលេខ ៤ និងស្ថានីយព្រែកស្ដី ផ្លូវជាតិលេខ ២។ ប៉ុន្តែលិខិតស្នើសុំនោះមិនបានបញ្ជាក់ឈ្មោះមន្ត្រីទាំងនោះទេ។
លោក ម៉ឹង យូឡេង មិនអាចទាក់ទងសុំការអត្ថាធិប្បាយជុំវិញករណីនេះបានទេ ដោយទូរស័ព្ទរបស់លោកត្រូវបានចុចផ្តាច់នៅពេលដែលតេចូល។
យ៉ាងណាក្តី កាលពីថ្ងៃទី ១៨ កុម្ភៈ មានការចុះផ្សាយតាមសារព័ត៌មានក្នុងស្រុកមួយចំនួនដោយបានធ្វើការចោទប្រកាន់ថា លោក ស៊ូ ទីរ៉ូ និងលោក សុគន្ធ ដារ៉ារិទ្ធ ប្រធាន-អនុប្រធាន ស្ថានីយថ្លឹងរថយន្តស្រុកអង្គស្នួល ផ្លូវជាតិលេខ ៤ បានប្រើល្បិចលេបលុយអ្នកដឹកជញ្ជូន ប្រព្រឹត្តដោយពហុជំនាញ។ សារព័ត៌មានទាំងនោះក៏បានផ្សាយផងដែរថា មានអំពីអំពើពុករលួយជុំវិញការឃាត់ឡានដឹកលើសទម្ងន់ ៦០ គ្រឿង យកលុយពីម្ចាស់ឡានហើយ ប្រើល្បិចកេងប្រវ័ញ្ចយកលុយពីក្រសួងទៀត។ ប៉ុន្តែ ការចោទប្រកាន់នេះត្រូវបានច្រានចោល និងបដិសេធ។
មន្ទីរសាធារណការ និងដឹកជញ្ជូនខេត្តកណ្តាលបានចេញលិខិតបំភ្លឺ និងឆ្លើយតបកាលពីថ្ងៃទី ២៣កុម្ភៈថា មន្ត្រីស្ថានីយទាំងអស់មិនបានប្រព្រឹត្តដូចការចោទប្រកាន់នៅក្នុងខ្លឹមសារអត្ថបទចុះផ្សាយថ្ងៃទី ១៨ ខែកុម្ភៈ ឆ្នាំ ២០២២ របស់សារព័ត៌មាននគរវត្តដែលមានចំណងជើងថា «លោក ស៊ូ ទីរ៉ូ និងលោក សុគន្ធ ដារ៉ារិទ្ធ ប្រធាន-អនុប្រធានស្ថានីយថ្លឹងរថយន្តស្រុកអង្គស្នួល ផ្លូវជាតិលេខ ៤ ប្រើល្បិច លេបលុយអ្នកដឹកជញ្ជូន ប្រព្រឹត្តដោយពហុជំនាញ» នោះទេ។
លិខិតរបស់មន្ទីរសាធារណការបញ្ជាក់ទៀតថា រថយន្តដឹកទំនិញទាំងអស់ ដែលឆ្លងកាត់ស្ថានីយជញ្ជីងត្រូវចូលថ្លឹងទម្ងន់ គឺជាច្បាប់កំណត់ គ្មានការបង្ខិតបង្ខំ បំភ័យបន្លាច បំផ្លើសអ្វីឡើយ ខណៈជញ្ជីងថ្លឹងរថយន្តអចល័ត ធ្វើការដោយស្វ័យប្រវត្តិ មានបំពាក់ Camera បន្តផ្ទាល់ ដើម្បីធ្វើការត្រួតពិនិត្យផ្ទៀងផ្ទាត់។
លោក គង់ សោភ័ណ្ឌ អភិបាលខេត្តកណ្តាល បានប្រាប់ភ្នំពេញ-ប៉ុស្តិ៍ នៅថ្ងៃទី ២៨ កុម្ភៈថា រដ្ឋបាលខេត្តនឹងសម្រេចទៅតាមការស្នើសុំនេះ ប៉ុន្តែចំពោះការដោះដូរមន្ត្រីថ្មីយ៉ាងណានោះ គឺលោកផ្តល់សិទ្ធិអាទិភាពទៅកាន់មន្ទីរតាមរយៈការសម្រេចរបស់ក្រសួងសាធារណការ និងដឹកជញ្ជូន។
លោកបញ្ជាក់ថា៖ «សំណើនេះបើមិនមានបញ្ហាអ្វីទេ ឱ្យគេធ្វើតទៅទៀត ខ្ញុំមិនបានពិនិត្យមើលលើករណីនេះផង ព្រោះរដ្ឋបាលខេត្តមិនមែនប្រធានក្នុងការសម្រេចលើស្ថាប័នថ្លឹងរថយន្តនេះទេ។ មន្ទីរសាធារណការ និងក្រសួងជាប្រធាន ចំណែកយើងគ្រាន់ជាមន្ត្រីធម្មតាហ្នឹង ហើយការងារនេះ គឺមន្ត្រីយើងនឹងធ្វើការបន្តជាមួយពួកគាត់»។
ចំពោះព័ត៌មានជុំវិញការប្រព្រឹត្តអំពើពុករលួយនៅតាមស្ថានីយថ្លឹងរថយន្តទាំង ៥ នេះ លោក គង់ សោភ័ណ្ឌ សុំមិនធ្វើការអត្ថាធិប្បាយអ្វីនោះទេដោយរក្សាសិទ្ធិឱ្យមន្ទីរ និងក្រសួងសាធារណការ និងដឹកជញ្ជូនជាអ្នកសម្រេចដោះស្រាយក្នុងនាមជាមន្ទីរ និងក្រសួងសាមី៕