កំពង់ចាមៈ មនុស្សចំនួន ១២ នាក់ ត្រូវបានសមត្ថកិច្ចនគរបាលព្រហ្មទណ្ឌខេត្តកំពង់ចាមឃាត់ខ្លួនក្នុងការបង្ក្រាបទីតាំងល្បែងជល់មាន់ ១ កន្លែង នៅភូមិស្វាយកណ្តាល ឃុំស្វាយសាច់ភ្នំ ស្រុកស្រីសន្ធរ ខេត្តកំពង់ចាម នៅថ្ងៃទី ២ មីនា ឆ្នាំ ២០២២។
លោក ហេង វុទ្ធី ស្នងការរងនគរបាលខេត្តកំពង់ចាមឱ្យដឹងនៅថ្ងៃទី២មីនាថា ដោយអនុវត្តគោលនយោបាយភូមិ-ឃុំមានសុវត្ថិភាពនៅតាមភូមិ-ឃុំ ក្នុងមូលដ្ឋានរបស់ខេត្តកំពង់ចាមនោះ នៅថ្ងៃទី២មីនា លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាមបានបញ្ជាដល់ផែនព្រហ្មទណ្ឌរបស់លោកបង្ក្រាបទីតាំងជល់មាន់ ១ កន្លែង។
លោកបានបន្តថា ការបង្ក្រាបទីតាំងល្បែងជល់មាន់នេះគឺនគរបាលស្រុកស្រីសន្ធរសហការជាមួយកម្លាំងនគរបាលប៉ុស្តិ៍ឃុំស្វាយសាច់ភ្នំបង្ក្រាបនិងឃាត់ខ្លួនបានបុរសចំនួន១២នាក់។ការងារនេះមានការសម្របសម្រួលផ្លូវច្បាប់ពីលោកសុធា ពិសិដ្ឋ ព្រះរាជអាជ្ញារងនៃអយ្យការអមសាលាដំបូងខេត្តកំពង់ចាមផងដែរ។
លោក វុទ្ធី បានបញ្ជាក់ថា៖ «ករណីនេះខ្ញុំមិនទាន់ដឹងថាតើមនុស្សទាំងនោះនឹងត្រូវធ្វើការអប់រំឬអនុវត្តច្បាប់យ៉ាងម៉េចទេហើយក្នុងនាមជាមន្ត្រីនគរបាលយុត្តិធម៌មិនមានសិទ្ធិឯណាមួយត្រូវអប់រំជនដែលឃាត់ខ្លួននោះទេ។ អ៊ីចឹងមានតែសួរទៅខាងតុលាការទៅ»។
ពាក់ព័ន្ធនឹងបញ្ហានេះ លោក សុធា ពិសិដ្ឋ ព្រះរាជអាជ្ញារងនៃអយ្យការអមសាលាដំបូងខេត្តកំពង់ចាមប្រាប់ភ្នំពេញប៉ុស្ដិ៍នៅថ្ងៃទី២ មីនាថា ចំពោះជនសង្ស័យដែលត្រូវបានសមត្ថកិច្ចឃាត់ខ្លួនខាងលើគឺលោកមិនទាន់អាចប្រាប់ថាតើត្រូវអប់រំពួកគេឬយ៉ាងណាទេ។លោកបញ្ជាក់ខ្លីថា៖«ករណីនេះ ចាំមើលការងារជាក់ស្តែងសិន»។
តាមកំណត់ហេតុនគរបាលបានបង្ហាញថា កាលពីវេលាម៉ោងជាង១២ថ្ងៃត្រង់ ថ្ងៃទី ២ ខែ មីនា ឆ្នាំ ២០២២ កម្លាំងជំនាញរបស់ផែនការងារនគរបាលព្រហ្មទណ្ឌខេត្តកំពង់ចាម សហការជាមួយកម្លាំងជំនាញរបស់អធិការដ្ឋាននគរបាលស្រុកស្រីសន្ធរនិងអាជ្ញាធរមូលដ្ឋាន បានចុះបង្ក្រាបទីតាំងលេងល្បែងជល់មាន់នៅក្នុងភូមិសាស្ត្រខាងលើ។ចំពោះលទ្ធផលនៃការបង្ក្រាបនោះសមត្ថកិច្ចដកហូតបានម៉ូតូចំនួន ១៨ គ្រឿង រួមទាំងសម្ភារជល់មាន់មួយចំនួនទៀត និងមនុស្សចំនួន ១២ នាក់ផង៕