.jpg)
ស្ត្រីម្នាក់កំពុងបើកមើលគេហទំព័រថ្មីរបស់ក្រសួងអប់រំ យុវជន និងកីឡា។ ហ៊ាន រង្សី
ភ្នំពេញៈ ក្រសួងអប់រំ យុវជន និងកីឡាប្រកាសដាក់ឱ្យប្រើប្រាស់គេហទំព័រធនធានអប់រំកម្ពុជាចាប់ពីថ្ងៃទី ១ ខែមីនា តទៅ សម្រាប់បម្រើដល់ការបង្រៀន និងរៀនតាមរយៈការអប់រំតាមបែបគន្លងថ្មី ក្នុងការចាប់យក និងពង្រឹងការប្រើប្រាស់បច្ចេកវិទ្យាឱ្យកាន់តែទូលំទូលាយ ជាពិសេសការលើកកម្ពស់គុណវុឌ្ឍគ្រូបង្រៀន។
យោងតាមលិខិតប្រកាសព័ត៌មានរបស់ក្រសួងអប់រំដែលភ្នំពេញប៉ុស្តិ៍ទទួលបាននៅថ្ងៃទី ២ ខែមីនា បានឱ្យដឹងថា គេហទំព័រធនធានអប់រំកម្ពុជា OER_Cambodia មានតំណ oer.moeys.gov.kh ដាក់ឱ្យដំណើរការជាផ្លូវការចាប់ពីថ្ងៃផ្សាយដំណឹងតទៅ សម្រាប់គាំទ្រដល់ការបង្រៀន និងរៀនស្របទៅតាមបរិបទនៃការអប់រំតាមបែបឌីជីថល និងបដិវត្តន៍ឧស្សាហកម្ម ៤.០ ប្រកបដោយគុណភាព ប្រសិទ្ធភាព និងស័ក្តិសិទ្ធិភាព។
តាមរយៈលិខិតនោះក្រសួងអប់រំបានឱ្យដឹងថា គេហទំព័រនេះបានអភិវឌ្ឍឡើងដើម្បីលើកកម្ពស់ ជំរុញការចែករំលែក និងប្រើប្រាស់មាតិកាអប់រំឌីជីថលឱ្យកាន់តែសម្បូរបែបសម្រាប់បម្រើដល់ការបង្រៀន និងរៀនតាមរយៈការអប់រំតាមបែបគន្លងថ្មីក្នុងការចាប់យក និងពង្រឹងការប្រើប្រាស់បច្ចេកវិទ្យាឱ្យកាន់តែទូលំទូលាយ ជាពិសេសការលើកកម្ពស់គុណវុឌ្ឍគ្រូបង្រៀនក្នុងការធ្វើបរិវត្តកម្មឌីជីថលក្នុងប្រព័ន្ធអប់រំ ស្របពេលដែលស្ថានភាពនៃការរីករាលដាលនៃជំងឺកូវីដ ១៩ នៅតែបន្ត។
លិខិតដដែលបន្តថា គេហទំព័រនេះ ផ្តល់ភាពងាយស្រួលដល់លោកគ្រូ អ្នកគ្រូ សិស្ស និស្សិត អ្នកស្រាវជ្រាវក៏ដូចជាសាធារណជនទូទៅក្នុងការស្វែងរកឯកសារឌីជីថលតាមកម្រិតថ្នាក់ចាប់ពីមត្តេយ្យសិក្សារហូតដល់កម្រិតឧត្តមសិក្សាតាមប្រភេទក្រុមមុខវិជ្ជា។
ក្រសួងអប់រំបញ្ជាក់ថា «អាចស្វែងរកតាមប្រភេទនៃឯកសារដូចជា ពហុមេឌៀអន្តរកម្ម បទបង្ហាញ វីដេអូ នឹងសំឡេង ឯកសារបង្រៀន និងសៀវភៅណែនាំកិច្ចតែង ការបង្រៀន រូបភាពផ្ទាំងធំ និងរូបភាពគំនូរជីវចលអប់រំល្បែងសិក្សា និងឯកសារស្រាវជ្រាវនានា»។
ជាមួយគ្នានោះ ក្រសួងអប់រំ យុវជន និងកីឡាលើកទឹកចិត្តដល់បុគ្គលិកអប់រំ និងអ្នកសិក្សាស្រាវជ្រាវ ដែលមានបំណងចែករំលែក ស្នាដៃស្រាវជ្រាវរបស់ខ្លួន ឯកសារបង្រៀន កិច្ចតែងការ ព្រមទាំងឯកសារអប់រំផ្សេងៗទៀត តាមរយៈការដាក់ស្នើឯកសារទាំងអស់សម្រាប់ផ្តល់ជាប្រយោជន៍ដល់អ្នកប្រើប្រាស់។
ក្រសួងអប់រំបញ្ជាក់ថា «ក្រសួងមានក្រុមការងារត្រួតពិនិត្យខ្លឹមសារមាតិកាទាំងអស់នោះមុននឹងផ្សព្វផ្សាយជាសាធារណៈក្នុងគេហទំព័រ។ រាល់ខ្លឹមសារលើគេហទំព័រនេះស្ថិតក្រោមអាជ្ញាប័ណ្ណ Creative Commons Attribution-NonCommercial-ShareAlike 3.0 License (CC- BY 3.0) ដែលអនុញ្ញាតឱ្យចម្លងនិងចែកចាយបន្ត លើកលែងតែសម្ភារដែលស្ថិតក្រោមបញ្ជី “រក្សាសិទ្ធិ» ។
ក្រសួងអប់រំអំពាវនាវដល់គណៈគ្រប់គ្រងគ្រឹះស្ថានសិក្សាបុគ្គលិកអប់រំសិស្ស-និស្សិត និងសាធារណជនទាំងអស់ចូលរួមប្រើប្រាស់គេហទំព័រធនធានអប់រំកម្ពុជា OER Cambodia ឱ្យបានទូលំទូលាយ និងចែករំលែកព័ត៌មានបន្តតាមការគួរ។
លោក ស៊ុន ឆេកូ នាយកគ្រប់គ្រងសាលាឯកជនមួយនៅរាជធានីភ្នំពេញថ្លែងនៅថ្ងៃទី ២ ខែមីនានេះថា គេហទំព័រនេះល្អសម្រាប់ការប្រើប្រាស់ ប៉ុន្តែមិនទាន់ទូលំទូលាយ ឯកសារមានតិចតួចមិនទាន់គ្រប់គ្រាន់មិនមានទម្រង់ Test,Quiz សម្រាប់សិស្សនៅឡើយ។
លោកបន្តថា គួរបង្កើតពិន្ទុសម្រាប់អ្នកប្រើ បង្កើតជាទម្រង់ទទួលមតិពីអ្នកប្រើប្រាស់ Notification Alert និងបញ្ចូល និងបញ្ជ្រាបឯកសារដែលបានធ្វើបច្ចុប្បន្នភាព។ លោកឆេកូ បន្តទៀតថា គេហទំព័រថ្មីនេះមានការវិវឌ្ឍល្អ ក្នុងបរិបទ 4.0 ដែលត្រូវតែមាន ប៉ុន្តែក៏គួរតែមានជាបណ្ណាល័យធំល្អមួយសម្រាប់អ្នកស្រាវជ្រាវផងដែរ។
លោកថ្លែងថា៖ «ខ្ញុំយល់ថាសម្រាប់អ្នកចេះ និងមានការយល់ដឹងពីបច្ចេកវិទ្យាមិនពិបាកប្រើទេ ហើយជាមួយគ្នានោះ គេហទំព័រនេះ គួរមាន Mobile App និងមានសេចក្តីណែនាំងាយៗបន្ថែមទៀត ដើម្បីសម្រួលដល់អ្នកប្រើប្រាស់»។
លោក សុខ ភាក់ គ្រូបង្រៀនម្នាក់នៅខេត្តត្បូងឃ្មុំថ្លែងនៅថ្ងៃទី ២ ខែមីនាថា នេះជាគេហទំព័រថ្មីដែលល្អសម្រាប់អ្នកសិក្សា លោកគ្រូអ្នកគ្រូ សិស្សានុសិស្ស និស្សិត ព្រោះសម័យនេះជាសម័យឌីជីថល និងផ្តោតសំខាន់លើប្រព័ន្ធអ៊ីនធឺណិត និងប្រព័ន្ធអនឡាញផ្សេងៗច្រើន ហេតុនេះ ស្ទើរគ្រប់គ្នាអាចបើកមើល និងស្រាវជ្រាវបាននៅកន្លែងដែលមានអ៊ីនធឺណិត។
លោក ឡុង ហាន គ្រូបង្រៀននៅសាលាចំណេះទូទៅឯកជនមួយនៅរាជធានីភ្នំពេញថ្លែងនៅថ្ងៃទី ២ ខែមីនាថា គេហទំព័រថ្មីរបស់ក្រសួងអប់រំមានប្រយោជន៍ច្រើនអាចទទួលយកបាន ក្នុងនោះទាំងគ្រូនិងសិស្សក៏ដូចជាសាធារណជននឹងកាន់តែមានភាពងាយស្រួលក្នុងការស្វែងរកឯកសារ ។
លោកថ្លែងថា៖ «បើតាមគំនិតខ្ញុំប្រសិនបើការដាក់ឱ្យប្រើនេះវាទូលំទូលាយ ហើយមានអត្ថប្រយោជន៍ច្រើន ខ្ញុំគិតថា អ្នកសិក្សាទាំងអស់ ឬក៏គ្រូទាំងអស់អាចមានភាពងាយស្រួលច្រើន លើការសិក្សាក៏ដូចជា ការស្វែងរកវិធីសាស្ត្រ បង្រៀន និងរៀនតាមរយៈ អនឡាញ ឬគេហទំព័រនេះបាន៕
