ភ្នំពេញៈ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ហៅកាត់ថា សាលាក្តីខ្មែរក្រហមបានដាក់ឱ្យដំណើរការសេវាកម្មថ្មីចំនួន ២ ក្នុងការស្វែងរកឯកសារប្រវត្តិសាស្ត្រ ដើម្បីបង្កលក្ខណៈងាយស្រួលដល់អ្នកសិក្សាស្រាវជ្រាវ។
សេចក្តីប្រកាសព័ត៌មានរបស់ (អ.វ.ត.ក) ចុះថ្ងៃទី ១ ខែមីនា បានសម្រេចដាក់ឱ្យដំណើរការសេវាកម្មចូលពិនិត្យមើលឯកសារ និងដាក់ឱ្យដំណើរការសាកល្បងការចូលពិនិត្យមើលមូលដា្ឋនទិន្នន័យតុលាការ ដើម្បីបង្កើនការចូលពិនិត្យមើលកំណត់ហេតុសំណុំរឿងសាធារណៈ។
អ.វ.ត.ក បន្តថា «សាធារណជនដែលស្វែងរកឯកសារជាក់លាក់ពាក់ព័ន្ធនឹងដំណើរការតុលាការនៅចំពោះមុខ អ.វ.ត.ក នៅពេលនេះអាចដាក់ពាក្យស្នើសុំពិនិត្យឯកសារ បានដោយផ្ទាល់ពីគេហទំព័រ»។
សេចក្តីប្រកាសបន្តថា អ.វ.ត.ក នឹងជួយក្នុងការស្វែងរកព័ត៌មានដែលបានស្នើសុំ ហើយប្រសិនបើចាត់ប្រភេទជាឯកសារសាធារណៈ ឯកសារពាក់ព័ន្ធទាំងនេះនឹងត្រូវកំណត់អត្តសញ្ញាណ និងបង្ហោះទៅក្នុងគេហទំព័រ អ.វ.ត.ក ប្រសិនបើមិនទាន់មាន។
អ.វ.ត.ក បន្តទៀតថា អ្នកសិក្សាស្រាវជ្រាវ អ្នកស្រាវជ្រាវ និងអ្នកប្រកបវិជ្ជាជីវៈនានា ដែលត្រូវការចូលពិនិត្យមើលកំណត់ត្រាសំណុំរឿងសាធារណៈនៅក្នុងបណ្ណសារឌីជីថលរបស់ អ.វ.ត.ក អាចដាក់ពាក្យស្នើសុំចូលពិនិត្យមើលមូលដ្ឋានទិន្នន័យ។
អ.វ.ត.ក បានបញ្ជាក់ថា បន្ទាប់ពីដំណាក់កាលសាកល្បងដំបូង ការចូលពិនិត្យមើលមូលដ្ឋានទិន្នន័យបែបនេះនឹងដាក់បញ្ចូលជាបណ្តើរៗផងដែរនូវដៃគូពាក់ព័ន្ធផ្សេងទៀតហើយដោយមានការបង្កើតគេហទំព័រថ្មីមួយនៅក្នុងឆ្នាំ ២០២៣ ហើយបុគ្គលគ្រប់រូប នឹងអាចចូលពិនិត្យមើលបាន។
អ.វ.ត.ក បានឱ្យដឹងថា ទិដ្ឋភាពទាំង ២ នេះ ត្រូវបានអនុវត្តដោយស្របទៅតាមកិច្ចព្រមព្រៀងបន្ថែមទៅនឹងកិច្ចព្រមព្រៀងរវាងអង្គការសហប្រជាជាតិ និងរាជរដ្ឋាភិបាលកម្ពុជាដែលតម្រូវឱ្យ អ.វ.ត.ក រក្សា និងគ្រប់គ្រងបណ្ណសាររបស់ខ្លួន ដើម្បីឆ្លើយតបទៅនឹងសំណើសុំចូលពិនិត្យមើលឯកសារ និងផ្សព្វផ្សាយព័ត៌មានទៅដល់សាធារណជន។
ប្រធានផ្នែកកិច្ចការសាធារណៈ និងជាអ្នកនាំពាក្យ អ.វ.ត.ក លោក នេត្រ ភក្ត្រា បានប្រាប់ភ្នំពេញប៉ុស្តិ៍ថា ការដាក់ឱ្យដំណើរការនេះត្រូវអនុវត្តចាប់ពីថ្ងៃជូនដំណឹង និងពុំមានគិតថ្លៃនោះទេ។ លោកថា៖ «ចូលមើលឯកសារដោយឥតគិតថ្លៃ ហើយសារៈប្រយោជន៍គឺដើម្បីឱ្យអ្នកដែលសិក្សាស្រាវជ្រាវ អ្នកចង់ដឹងសិក្សាពីប្រវត្តិសាស្ត្រគាត់អាចស្វែងរកបាននៅទីនេះ»។
កាលពីពេលថ្មីៗនេះ សាលាក្តីខ្មែរក្រហមបានបើកវគ្គបណ្តុះបណ្តាលលើកទី ១ ស្តីពីការគ្រប់គ្រងបណ្ណសារជាមួយសា្ថប័នដៃគូ រយៈពេល ៦ ថ្ងៃចាប់ពីថ្ងៃទី ១៥ ដល់ថ្ងៃទី ២២ ខែកុម្ភៈ ឆ្នាំ ២០២២ ដើម្បីពង្រឹងសមត្ថភាពក្នុងការគ្រប់គ្រងបណ្ណសារនៅកម្ពុជា។ វគ្គបណ្តុះបណ្តាលនេះតាក់តែងដោយក្រុមប្រឹក្សាបណ្ណសារអន្តរជាតិដែលរៀបចំឡើងសំដៅដោះស្រាយបញ្ហានៃការគ្រប់គ្រងបណ្ណសារដែលប៉ះពាល់ដល់ស្ថាប័ននានារបស់កម្ពុជា។
អ.វ.ត.ក គូសបញ្ជាក់ថា នេះគឺជាការបណ្តុះបណ្តាលលើកទី ១ នៅកម្ពុជាដែលមានការសម្របសម្រួលដោយប្រធានអង្គភាពបណ្ណសារគឺលោកស្រី JIMENEZ SANCHEZ ហើយអ្នកចូលរួមទទួលបានផលប្រយោជន៍ពីវគ្គបណ្តុះបណ្តាលលើអភិបាលកិច្ចល្អ និងវិធីសាស្ត្រដែលទទួលស្គាល់ជាអន្តរជាតិក្នុងការគាំទ្រ ការរៀបចំ និងការអនុវត្ដដំណើរការរក្សាបណ្ណសារ៕