ស្ទឹងត្រែងៈ នគរបាលប្រឆាំងបទល្មើសសេដ្ឋកិច្ចខេត្តស្ទឹងត្រែងនៅព្រឹកថ្ងៃទី ២ ខែមីនាបានឃាត់រថយន្តដឹកដំឡូងមីលួចបង្កប់ឈើប្រណីតខុសច្បាប់ ១ គ្រឿងនៅភូមិអូរច្រឡង់ ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង។ នេះបើតាមមន្ត្រីនគរបាលមូលដ្ឋាន។
លោក ស៊ុត បូណា នាយនគរបាលប៉ុស្តិ៍អូរឫស្សី កណ្តាលបានប្រាប់ភ្នំពេញ ប៉ុស្តិ៍ ថា រថយន្តដឹកដំឡូងមីបង្កប់ឈើក្ដារបន្ទះជាច្រើនម៉ែត្រគុបនោះ ជាប្រភេទរថយន្ត V1 ឬយីឌុប ពាក់ស្លាកលេខព្រៃវែង 4A-0033 ។ រថយន្តនេះត្រូវបានកម្លាំងនគរបាលគោលដៅចរាចរណ៍អូរច្រឡង់ សហការជាមួយនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តស្ទឹងត្រែងបង្ក្រាប និងនាំយកទៅកាន់ការិយាល័យនគរបាលប្រឆាំងបទល្មើសសេដ្ឋកិច្ចភ្លាមៗ ដើម្បីចាត់វិធានការតាមនីតិវិធី។
លោកបានបញ្ជាក់ថា៖ «ខ្ញុំមិនដឹងថា ឈើទាំងនោះមានប៉ុន្មានម៉ែត្រគុបនោះទេ ហើយក៏មិនដឹងថា មានច្បាប់ ឬអត់ច្បាប់នោះដែរ ព្រោះគ្រាន់តែឆែកឃើញមានបង្កប់ឈើក្ដារបន្ទះភ្លាម អ្នកបើកបរ និងវត្ថុតាងរថយន្តដឹកដំឡូងមីបង្កប់ឈើនោះត្រូវបានកម្លាំងសមត្ថកិច្ចនគរបាលជំនាញបញ្ជូនទៅកាន់ការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តស្ទឹងត្រែងភ្លាមតែម្ដង»។
ជុំវិញករណីនេះ លោក សាន និមល ស្នងការរងខេត្តស្ទឹងត្រែងទទួលបន្ទុកប្រឆាំងបទល្មើសសេដ្ឋកិច្ច បានប្រាប់ភ្នំពេញប៉ុស្តិ៍ថា ពេលនេះមន្ត្រីនគរបាលជំនាញកំពុងអនុវត្តនីតិវិធីសួរនាំអ្នកបើកបរ ដើម្បីឱ្យម្ចាស់ឈើពិតប្រាកដ ចូលមកដោះស្រាយទៅតាមផ្លូវច្បាប់។
លោកថា៖ «ក្រុមការងារយើងឃាត់ខ្លួនអ្នកបើកបរ និងវត្ថុតាងរថយន្តដឹកដំឡូងមីបង្កប់ឈើក្ដារបន្ទះពីក្រោមនេះ ដោយសារតែអ្នកបើកបរមិនបានបង្ហាញឯកសារផ្លូវច្បាប់ណាមួយដែលអនុញ្ញាតឱ្យដឹកជញ្ជូនឈើពីមន្ត្រីជំនាញនោះទេ»។
បើតាមលោក និមល មកទល់ពេលនេះក្រុមការងាររបស់លោកនៅមិនទាន់វាស់វែងពីចំនួនឈើទាំងនោះនៅឡើយទេ ប៉ុន្តែឈើវត្ថុតាងទាំងនោះត្រូវបាននាំយកមករក្សាទុកជាបណ្ដោះអាសន្ននៅការិយាល័យបង្ក្រាបបទល្មើសសេដ្ឋកិច្ចខេត្តស្ទឹងត្រែងហើយ ដើម្បីចាត់វិធានការបន្តតាមនីតិវិធី។
យោងតាមមាត្រា ៧៨ នៃច្បាប់ស្ដីពីព្រៃឈើ រាល់ការបង្ក្រាបបទល្មើសដែលពាក់ព័ន្ធនឹងការដឹកជញ្ជូនផល និងអនុផលព្រៃឈើខុសច្បាប់ សមត្ថកិច្ចដែលចូលរួមការបង្ក្រាបនោះត្រូវប្រគល់ជនសង្ស័យ និងវត្ថុតាងទៅឱ្យសមត្ថកិច្ចរដ្ឋបាលព្រៃឈើជាអ្នកចាត់ការតាមនីតិវិធីក្នុងការកសាងសំណុំរឿងបញ្ជូនទៅតុលាការ។ នេះបើតាមសម្ដីលោក សុខ ស៊ីដា មន្ត្រីជំនាញខណ្ឌរដ្ឋបាលព្រៃឈើខេត្តស្ទឹងត្រែង។
លោកថា៖ «ករណីបង្ក្រាបរថយន្តយីឌុបដឹកដំឡូងមីមានបង្កប់ឈើពីក្រោមនេះយើងខ្ញុំនៅ មិនទាន់ទទួលបានរបាយការណ៍ពីកម្លាំងនគបាលប្រឆាំងបទល្មើសសេដ្ឋកិច្ចនៅឡើយទេ។
ជាទូទៅករណីបទល្មើសដឹកជញ្ជូនផល និងអនុផលព្រៃឈើបែបនេះសមត្ថកិច្ចត្រូវបញ្ជូនជនសង្ស័យ និងវត្ថុតាងមកឱ្យមន្ត្រីជំនាញរដ្ឋបាលព្រៃឈើ»៕