ភ្នំពេញៈ អាជ្ញាធរខណ្ឌពោធិ៍សែនជ័យ បានចុះរុះរើ និងកាត់ចោលផ្លាកផ្សព្វផ្សាយពាណិជ្ជកម្មជាច្រើនកន្លែងដែលគ្មានច្បាប់អនុញ្ញាតនៅតាមបណ្ដោយផ្លូវចោមចៅ បន្ទាប់ពីអាជ្ញាធរ បានជូនដំណឹងឲ្យធ្វើការរុះរើខ្លួនឯង ប៉ុន្តែមិនចូលរួមសហការ។
ការចុះរុះរើង និងកាត់ចោលផ្លាកផ្សព្វផ្សាយពាណិជ្ជកម្មជាច្រើនកន្លែងដែលគ្មានច្បាប់អនុញ្ញាតនេះ ត្រូវបានធ្វើឡើងចាប់តាំងពីថ្ងៃទី ២ រហូតដល់ថ្ងៃទី ៣ មីនានេះ តាមការបញ្ជារដោយផ្ទាល់ពីលោកហែម ដារិទ្ធិ អភិបាលខណ្ឌពោធិ៍សែនជ័យ។
លោក ប៉ាង លីដា អភិបាលរងខណ្ឌពោធិ៍សែនជ័យ ដែលបានដឹកនាំកម្លាំងសន្តិសុខ ចុះរៀបចំសណ្តាប់ធ្នាបរបៀបរៀបរយសាធារណៈនេះ បានឲ្យដឹងថា ការរុះរើ និងកាត់ស្លាកផ្សព្វផ្សាយពាណិជ្ជកម្មដែលគ្មានច្បាប់អនុញ្ញាតនេះ គឺធ្វើឡើងនៅតាមបណ្ដោយផ្លូវចោមចៅ(ផ្លូវវេងស្រេង) ចាប់ពីស្ដុបអង្គតាម៉ិញ រហូតដល់ស្ពានអាកាសចោមចៅស្ថិតនៅក្នុងសង្កាចោមចៅទី២។
លោក បានអះអាងថា ការចុះអនុវត្តការងារនេះ ក្រោយពីអាជ្ញាធរខណ្ឌ បានជូនដំណឹងទៅកាន់ប្រជាពលរដ្ឋនៅតាមបណ្តាយផ្លូវនេះ ឲ្យធ្វើការរុះរើចេញដោយខ្លួនឯង ប៉ុន្តែពួកគេ មិនស្តាប់តាមការណែនាំរបស់អាជ្ញាធរ។
លោក បានបញ្ជាក់ថា៖ «មហិច្ឆតាយើងខ្ញុំ ចង់បានសណ្ដាប់ធ្នាប់ល្អអនាម័យស្អាត និងសន្ដិសុខល្អ នៅក្នុងមូលដ្ឋាន។នៅព្រឹកថ្ងៃទី០៣ ខែ០៣នេះ ក្រុមការងាររដ្ឋបាលខណ្ឌPSC បានបន្តចុះរៀបចំសណ្ដាប់ធ្នាប់ និងកាត់ស្លាកផ្សព្វផ្សាយពាណិជ្ជកម្មដែលគ្មានច្បាប់អនុញ្ញាតតាមផ្លូវចោមចៅ ពីស្ដុបអង្គតាម៉ិញ រហូតដល់ស្ពានអាកាសចោមចៅ(នៅជោតស្ពានអាកាសចោមចៅ)»។
ជាមួយនឹងវិធានការនេះ លោក ប៉ាង លីដាក៏បានដាក់ផែនការឲ្យអាជ្ញាធរសង្កាត់រួមសហការជាមួយកម្លាំងសណ្ដាប់ធ្នាប់ខណ្ឌ និងមន្ត្រីសាលាខណ្ឌ ត្រូវអនុវត្តជាប្រចាំទៅលើការងារសន្តិសុខ សណ្តាប់ធ្នាប់ សាធារណៈ និងបរិស្ថានអនាម័យ អោយដូចភ្លៀងរលឹម ខណៈលោកចាត់ទុកថា ទីក្រុងស្អាតសណ្តាប់ធ្នាប់ល្អ បរិស្ថានអនាម័យល្អ គឺផ្តើមចេញពីយើងទាំងអស់គ្នា។
លោកបានបញ្ជាក់ថា៖«ឱលោកម្ចាស់ផ្ទះអើយ គិតតែពីប្រយោជន៍ផ្ទាល់ខ្លួនផ្លាកសញ្ញាចរាចរណ៍ និងចិញ្ចើមផ្លូវ ក៏មិនជួយថែរក្សាដែរ។ សូមអរគុណដល់ក្រុមការងារ និងប្រជាពលរដ្ឋទាំងអស់ដែលបានចូលរួមសហការជាមួយអាជ្ញាធរមូលដ្ឋាន និងបានចូលរួមរៀបចំសណ្ដាប់ធ្នាប់ អនាម័យ ជាមួយអាជ្ញាធរបានល្អប្រសើរ»។
កាលពីថ្មីៗនេះ អាជ្ញាធរខណ្ឌពោធិ៍សែនជ័យ បានប្រកាសផ្សព្វផ្សាយសេចក្តីជូនដំណឹងដល់បងប្អូនដែលប្រកបអាជីវកម្មផ្សេងៗតាមគោលដៅខាងលើត្រូវលក់មានរបៀបរាបរយតាមដែលរដ្ឋបាលខណ្ឌបានកំណត់ជូនដោយទុកចិញ្ចើមផ្លូវ សំរាប់ថ្មើរជើង និងរក្សារអនាម័យបរិស្ថានឲ្យបានស្អាត។
លោក មុត ទៀទិសេង ជាពលរដ្ឋម្នាក់ រស់នៅតាមបណ្តាយផ្លូវវេងស្រេង ក្នុងសង្កាត់ចមចៅ បានសាទរចំពោះចំណាត់ការរបស់អាជ្ញាធរខណ្ឌ ដោយបានលើកឡើងថា វិធានការរបស់អាជ្ញាធរ នឹងជួយដោះស្រាយបញ្ហាកកស្ទះ និងការរំលោភបំពានរបស់ពលរដ្ឋ លើផ្លូវសាធារណៈ។
ជាមួយគ្នានេះ លោក ក៏ជំរុញឲ្យអាជ្ញាធរចុះអនុវត្តឲ្យបានម៉ឺងមាត់ និងជាប្រចាំចំពោះការលើកផ្លាកផ្សព្វផ្សាយពាណិជ្ជកម្មដែលគ្មានច្បាប់អនុញ្ញាត និងរំលោភលើផ្លូវសាធារណៈនេះ ឲ្យបានទៀតទាត់ផងដែរ ខណៈលោក បារម្ភថា បញ្ហានេះ នឹងមិនត្រូវបានដោះស្រាយបានទេ បើមិនមានវិធានការម៉ឺនមាត់។
លោកបានរៀបរាប់ថា៖ «ការចុះរៀបចំនេះ គឺល្អសម្រាប់អ្នកធ្វើដំណើរ ព្រោះផ្លូវមានភាពធំទូលាយ ហើយបើបានពួកគាត់ ចុះអនុវត្តជាប្រចាំ នឹងធ្វើឲ្យការកក់ស្ទះ ឬការរំលោភបំពាននានានឹងមានភាពល្អប្រសើរជាងមុន។ បើមិនចឹងទេ បញ្ហានេះ គឺនៅតែបន្ត ហើយកើតមានឡើងវិញ នៅពេលអាជ្ញាធរមិនបានចុះអនុវត្ត»៕