​ភ្នំពេញៈ គណបក្ស​ភ្លើងទៀន​អំពាវនាវ ដល់​រាជរដ្ឋាភិបាល​ស្រាវជ្រាវ​រក​ជនខិលខូច​ដែល​បាន​បំផ្លិចបំផ្លាញ​ស្លាក​គណបក្ស និង​គំរាមកំហែង​សកម្មជន យកមក​ផ្តន្ទាទោស​តាមច្បាប់ និង ចាត់វិធានការ​យ៉ាង​ម៉ឺង​មាត់ និង​មាន​ប្រសិទ្ធភាព​បំផុត ដើម្បី​ធានា​ដល់​ដំណើរ​ការបោះ ឆ្នោត​ឃុំ សង្កាត់ នៅ​ថ្ងៃទី ៥ ខែមិថុនា ឱ្យ​ប្រព្រឹត្ត​ទៅដោយ​មិនមាន​អំពើហិង្សា មិន​មានការ​គំរាម កំហែង ការបំភិតបំភ័យ និង​មិន​មានការ​ទិញដូរ​។​

យោងតាម​សេចក្តីថ្លែងការណ៍​របស់​គណបក្ស​ភ្លើងទៀន​ចេញផ្សាយ​កាលពី​ថ្ងៃទី​២ ខែមីនា បានឱ្យដឹងថា ថ្មីៗ​នេះ ទោះបី​ជាមាន​បទបញ្ជា​ដោយផ្ទាល់​មាត់​របស់​ប្រមុខ​រាជរដ្ឋាភិបាល​កម្ពុជា និង​សេចក្ដី​ណែ នាំ​ជា​លាយលក្ខណ៍អក្សរ​រប​ស់​ក្រសួងមហាផ្ទៃ ក្នុងការ​បង្កើត​ឲ្យ​មាន​បរិយាកាស​នយោបាយ​ល្អប្រសើរ​មុន ការបោះឆ្នោត​ឃុំ​-​សង្កាត់​ខាងមុខនេះ​ក្តី ក៏ប៉ុន្តែ​មាន​អាជ្ញាធរ​មួយចំនួន​នៅតាម​បណ្តា​ខេត្ត​ខ្លះ នៅតែ​បន្ត​ប្រើប្រាស់​តួនាទី​របស់ខ្លួន​ក្នុងការ​សម្លុត​គំរាមកំហែង បំភិតបំភ័យ និង​អូសទាញ សកម្មជន គណបក្ស​ភ្លើងទៀន ឲ្យ​ចុះចូល​ជាមួយនឹង គណបក្ស​ប្រជាជន​កម្ពុជា ឬ​មិន​ឲ្យ​ធ្វើ​សកម្មភាព ដោយបាន​ប្រើប្រាស់​រូបភាព​ផ្សេងៗ​។​

សេចក្តីថ្លែងការណ៍​នេះ​សរសេរ​បន្តថា​៖ « ជាមួយគ្នានេះ មានការ​រារាំង​មិន​ឲ្យ​លើក​ស្លាក និង​ការ​លួច​កាប់បំផ្លាញ​ស្លាក​គណបក្ស​ភ្លើងទៀន និង​ប្រើ​អំពើហិង្សា​លើ​សកម្មជន​របស់​គណ​បក្ស ដោយ​ជន​មិន​ស្គាល់មុខ​នៅតែ​បន្ត​កើតមាន​»​។

លោក ថាច់ សេដ្ឋា អ្នកនាំពាក្យ​គណបក្ស​ភ្លើងទៀន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី ៣ ខែកុម្ភៈ​នេះ​ថា ករណី​កាប់​ស្លាក​គណបក្ស​ភ្លើង​ទៀ​នេះ មាននៅ​ក្នុង​ខេត្តសៀមរាប ខេត្ត​ណ្តា​ល និង​ខេត្តកំពង់ចាម ។ ដោយឡែក​ចំពោះ​ករណី​រារាំង​មិនឱ្យ​លើក​ស្លាក​គណបក្ស បាន​កើតឡើង​នៅក្នុង​ខេត្ត​ត្បូងឃ្មុំ កំពង់ចាម កណ្តាល និង​ប៉ៃលិន ។ ករណី​រារាំង​មិនឱ្យ​លើក​ស្លាក​នេះ សមាជិក​គណបក្ស​ភ្លើងទៀន​បាន​ខិតខំ​តតាំង​ជាមួយ​អាជ្ញាធរ​យ៉ាងខ្លាំង​ក្លា​ផងដែរ​គឺ​នៅ​ខេត្តបន្ទាយមានជ័យ កំពត ពោធិ៍សាត់ កណ្តាល និង​កំពង់ស្ពឺ​។

លោក​ថ្លែងថា​៖ «​ពួកគេ (​អាជ្ញាធរ​មូលដ្ឋាន​) បាន​រារាំង មិនឱ្យ​លើក​ស្លាក​ហ្នឹង គេ​ថា ឱ្យ​លើក​ចម្ងាយ​ប៉ុណ្ណេះ ពី​ផ្លូវ និង​ថា​ចេះ ថា អី​ចោះ​ក្នុងន័យ​មិន​ចង់ឱ្យ​លើក ប៉ុន្តែ ករណី​រារាំង​មិនឱ្យ​លើក​ស្លាក​នេះ​ធ្ងន់ធ្ងរ​ជាងគេ គឺ​នៅ​ខាង​ខេត្ត​ប៉ៃលិន ។ យ៉ាងណា ឥឡូវ​ហាក់​មាន​ភាពស្ងប់ស្ងាត់​ក្រោយពី​មាន​សេចក្តីណែនាំ​ពី​ក្រសួងមហាផ្ទៃ និង បទបញ្ជា​ពី​នាយករដ្ឋមន្ត្រី​»​។​

បើតាម លោក ថាច់ សេដ្ឋា ករណី​ដែល​ធ្ងន់ធ្ងរ​នោះ គឺ​អាជ្ញាធរ​សម្លុត មិនឱ្យ​គណបក្ស​រៀបចំ​រចនាសម្ព័ន្ធ​បេក្ខជន​ឈរឈ្មោះ​បោះឆ្នោត​បានទេ ព្រោះ​អាជ្ញាធរ​ខ្លះ បានស្នើ​សុំ​បញ្ជី​បេក្ខជន ដែល​គណបក្ស​បានរៀបចំ បានធ្វើឱ្យ​បេក្ខជន​ឈរ​ប្រកួតប្រជែង​មានការ​ភ័យខ្លាច​។

ពាក់ព័ន្ធ​នឹង​បញ្ហា​ខាងលើនេះ ភ្នំពេញ​ប៉ុស្តិ៍​មិនអាច​ទាក់ទង លោក ខៀង សុភ័គ អ្នកនាំពាក្យ​ក្រសួងមហាផ្ទៃ​សុំ​ធ្វើ​អត្ថាធិប្បាយ​បានទេ នៅ​ថ្ងៃទី ៣ ខែមីនា ឆ្នាំ ២០២២ នេះ​។​

​លោក សុខ ឥសាន អ្នកនាំពាក្យ​គណបក្ស​ប្រជាជន​កម្ពុជា ប្រាប់​ភ្នំពេញ​ប៉ុស្តិ៍​នៅ​ថ្ងៃទី ៣ កុម្ភៈ​នេះ​ថា រាជរដ្ឋាភិបាល​បាន​បើក​សិទ្ធិ​ឱ្យ​គ្រប់​គណបក្សនយោបាយ​ដាក់ពាក្យ​ប្តឹង បើ​ក្នុងការ​ណី​មានការ​បំផ្លិចបំផ្លាញ​ស្លាក​គណបក្ស និង​គំរាមកំហែង​សកម្មជន​ណាមួយ ប៉ុន្តែ​បើសិនជា​មន្ត្រី​គណបក្ស​នោះ ចេះតែ​ស្រែក និង​មិនមាន​ភស្តុតាង អាជ្ញាធរ​ទៅធ្វើ​យ៉ាងម៉េច​នឹង​កើត​ទៅ​។​

លោក​ថ្លែងថា ៖ «​អា​មាន​ក៏​ស្រែក អា​អត់​មាន​ក៏​នៅតែ​ស្រែក អីចឹង យកជាការ​មិនបាន​ទេ។ ឧទាហរណ៍ គាត់​ចេះតែ​ស្រែកថា មន្ត្រី​យក​ម៉ោង​រដ្ឋ យក​សម្ភារៈ​រដ្ឋ ចុះបើ​ចាប់​ឱ្យបាន និង​មាន​ភស្តុតាង​មក គេ​មាន​វិធានការ​ហើយ ចុះបើ​ចេះ​ស្រែក​អីចឹង វា​បានការ​អី​។ ប៉ុន្តែ បើ​មាន​ករណី​ដក​ស្លាក ឬ​បំផ្លាញ​ស្លាក​គណបក្ស ប្តឹង​មនុស្ស​នោះ និង​រក​សាក្សីមក គេ​ឱ្យធ្វើ​តើ មាន​ទូរស័ព្ទ​ក្នុង​ដៃ​តើ ថត​យកមក​»​។​

លោក សុខ ឥសាន បញ្ជាក់ទៀតថា ក្នុងករណី មន្ត្រី​គណបក្សនយោបាយ​ចុះទៅ​រៀបចំ​រចនាសម្ព័ន្ធ​គណបក្ស​នៅ​ថ្នាក់ឃុំ​សង្កាត់ ត្រូវតែមាន​កិច្ចសហការ​ជាមួយនឹង​អាជ្ញាធរ​នៅ​ថ្នាក់ក្រោម​នោះ បើទោះបី​ណ​បក្សនយោបាយ​នោះបាន​ចុះបញ្ជី​ត្រឹមត្រូវ​នៅ​ក្រសួងមហាផ្ទៃ​រួចហើយ​ក៏ដោយ ។ គណបក្សនយោបាយ​នីមួយៗ ត្រូវ​ចាត់ទុក​អាជ្ញាធរ ជា​ម្ចាស់ផ្ទះ និង​មាន​កិច្ច​ការល្អ ប៉ុន្តែ​បើ​ចុះទៅ​មិនមាន​ការជូនដំណឹង​ទេ នឹង​នាំឱ្យមាន​ភាពច្របូកច្របល់​នៅក្នុង​មូលដ្ឋាន។

លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួងមហាផ្ទៃ កាលពី​ថ្ងៃទី ៧ ខែកុម្ភៈ ឆ្នាំ ២០២២ បាន​សេរ​សេរ​លិខិត បាន​ស្នើឱ្យ​អភិបាល នៃ​គណៈ​អភិបាល​រាជធានី ខេត្ត​នៅ​ទូទាំងប្រទេស បង្កលក្ខណៈ​ងាយស្រួល​ដល់​គ្រប់​គណបក្សនយោបាយ ដែល​បាន​ចុះឈ្មោះ​ក្នុង​បញ្ជី​នៅ ក្រសួងមហាផ្ទៃ ធ្វើ​សកម្មភាព ដើម្បី​ធ្វើយ៉ាងណា​ឱ្យមាន​លក្ខណៈ សេរី ត្រឹមត្រូវ និង​យុត្តិធម៌ ស្របតាម​គោលការណ៍​លទ្ធិប្រជាធិបតេយ្យ សេរី​ពហុបក្ស សម្រាប់ ការបោះឆ្នោត​ជ្រើសរើស​ក្រុមប្រឹក្សាឃុំ សង្កាត់ អាណត្តិ​ទី​៥ ឆ្នាំ​២០២២ និង​ការបោះឆ្នោត​ជ្រើសតាំង​តំណាងរាស្ត្រ អាណត្តិ​ទី​៧ ឆ្នាំ​២០២៣​។

លោកនាយក​រដ្ឋមន្ត្រី ហ៊ុន សែន កាលពី ថ្ងៃទី​១៦ ខែកុម្ភៈ ក៏បាន​អំពាវនាវ​ដល់​គ្រប់​អាជ្ញាធរ​នៅ​មូលដ្ឋាន​ទាំងអស់​នៃ​រាជធានី ខេត្ត​ត្រូវ​ធានា​សេរីភាព​នៃ​ការជួបជុំ​សម្រាប់​គណបក្សនយោបាយ​នានា ដែល​ចុះបញ្ជី​ដោយ​ស្របច្បាប់​ទទួលស្គាល់​ដោយ​ក្រសួងមហាផ្ទៃ​មានឱកាស​ដើម្បី​ធ្វើ​សកម្មភាព ទោះបី​យុទ្ធនា​ការបោះឆ្នោត​មិនទាន់​មកដល់ ក៏ប៉ុន្តែ​គណបក្សនយោបាយ​នានា ត្រូវការ​ឱកាស​ជួបជុំ​សមាជិក​របស់​ពួកគេ និង​មានលទ្ធភាព​ដើម្បី​សុំ​ការអនុញ្ញាត​ដើម្បី​លើក​ស្លាក​គណបក្ស​។​

លោកនាយក​រដ្ឋមន្ត្រី​បន្តថា ចំណែក​គណបក្ស​នានា​ក៏ត្រូវ​តែ​គោរព​នូវ​បែបបទ​ដែលមាន​ចែង​នៅក្នុង​ច្បាប់​ជា​ធរមាន និង​បទបញ្ជា​របស់​គណៈកម្មាធិកា​រ​ជាតិ​រៀបចំ​ការបោះឆ្នោត (​គ​.​ជ​.​ប​)​។ ការធ្វើ​បែបនេះ​គឺ​វា​អាច​ដំណើរ​ទៅមុខ​នៅក្នុង​ការបើក​លំហរ​ប្រជាធិបតេយ្យ​នៅក្នុង​ប្រទេស​កម្ពុជា​ព្រោះ​គណបក្ស​ថ្មីៗ​ជាច្រើន​ត្រូវបង្កើត ហើយ​គណបក្ស​ខ្លះ​ក៏​កំពុង​ត្រៀម​រៀបចំ​ដើម្បី​បង្កើត​សម្ព័ន្ធភាព​បក្ស​៕