.jpg)
កិច្ចប្រជុំនៃមន្ត្រីអាវុធហត្ថ។ រូបថត អាវុធហត្ថ
ភ្នំពេញៈ បញ្ជាការដ្ឋានកងរាជអាវុធហត្ថលើផ្ទៃប្រទេស នាព្រឹកថ្ងៃទី ០៣ ខែ មីនា ឆ្នាំ ២០២២ បានបើកកិច្ចប្រជុំផ្សព្វផ្សាយរបាយការណ៍ត្រួតពិនិត្យលទ្ធផលនៃការអនុវត្តតួនាទី ភារកិច្ចរបស់កងរាជអាវុធហត្ថប្រចាំខែកុម្ភៈ និងលើកទិសដៅសម្រាប់អនុវត្តប្រចាំខែមីនា។
លោក ស សំបូរធន នាយសេនាធិការកងរាជអាវុធហត្ថលើផ្ទៃប្រទេស ដែលបានដឹកនាំកិច្ចប្រជុំនេះ បានសម្ដែងការកោតសសើរ ដល់កងកម្លាំងកងរាជអាវុធហត្ថទាំងអស់ ដែលបានខិតខំបំពេញតួនាទី និងភារកិច្ចយ៉ាងសកម្មក្នុងការការពារសន្តិសុខ សណ្ដាប់ធ្នាប់សង្គម។ ជាពិសេស ក្នុងអំឡុងពេលនៃការរីករាលដាលនៃជំងឺកូវីដ១៩ជាសាកលនេះ កម្លាំងកងរាជអាវុធហត្ថ បានចូលរួមធ្វើការផ្សព្វផ្សាយ អប់រំប្រជាពលរដ្ឋនៅតាមមូលដ្ឋានឱ្យគោរពនិងអនុវត្តវិធានការសុខាភិបាល សេចក្តីសម្រេច និងសេចក្តីណែនាំនានារបស់រាជរដ្ឋភិបាល។
លោកថ្លែងថា៖«ក្នុងអំឡុងខែកុម្ភៈកន្លងទៅទៅនេះ កងរាជអាវុធហត្ថយើងបានចូលរួមយ៉ាងសកម្មក្នុងការការពារសន្តិសុខ សណ្តាប់ធ្នាប់ បង្ក្រាបបទល្មើសនានា ពង្រឹងការអនុវត្តច្បាប់ ជួយសង្គ្រោះប្រជាពលរដ្ឋដែលរងគ្រោះដោយហេតុផ្សេងៗ។ ជាពិសេសបានចូលរួមផ្សព្វផ្សាយអប់រំពលរដ្ឋនៅតាមមូលដ្ឋាន អំពីការអនុវត្តវិធានការសុខាភិបាល ក្នុងការប្រយុទ្ធប្រឆាំងការឆ្លងរីករាលដាលនៃជំងឺឆ្លងកូវីដ១៩»។
បើតាមលោក សំបូរធន ក្រៅពីការពង្រឹងការអនុវត្តច្បាប់ ការពារសន្តិសុខ សណ្ដាប់ធ្នាប់សង្គមកងរាជអាវុធហត្ថបានយកចិត្តទុកដាក់បំពេញកិច្ចការងារកំណែទម្រង់រដ្ឋបាលអធិការកិច្ចអប់រំបណ្តុះបណ្តាល ទំនាក់ទំនងកិច្ចការសាធារណៈការកសាងហេដ្ឋារចនាសម្ព័ន្ធ ... ការគ្រប់គ្រងអចលនទ្រព្យ និងការគ្រប់គ្រងពិនិត្យថែទាំសុខភាពកងទ័ព។
នៅក្នុងកិច្ចប្រជុំនោះ លោកសំបូរធន ក៏បានលើកឡើងពីផែនការការពារសន្តិសុខ រក្សាសណ្តាប់ធ្នាប់ សម្រាប់កិច្ចប្រជុំចារកម្មយោធាអាស៊ានលើកទី១៩ កិច្ចប្រជុំអគ្គមេបញ្ជាការកងទ័ពអាស៊ានលើកទី១៩ កិច្ចប្រជុំប្រតិបត្តិការយោធាអាស៊ានលើកទី១២ ដែលនឹងប្រព្រឹត្តទៅក្នុងពេលដ៏ខ្លីខាងមុខនេះផងដែរ។ ជាមួយគ្នានេះ លោកបានជំរុញឲ្យកម្លាំងកងរាជអាវុធហត្ថ ធ្វើការហ្វឹកហ្វឺនបង្កើនសមត្ថភាព លើមុខជំនាញឯកទេស ដើម្បីបំពេញភារកិច្ចរក្សាសន្តិសុខ សុវត្ថិភាពជូនថ្នាក់ដឹកនាំ និង គណៈប្រតិភូការពារជាតិអាស៊ាន ដែលនឹងមកចូលរួមក្នុងព្រឹត្តិការណ៍នៃកិច្ចប្រជុំអគ្គបញ្ជាការកងទ័ពអាស៊ានលើកទី១៩ និងកិច្ចប្រជុំពាក់ព័ន្ធដទៃទៀត ដែលកម្ពុជាធ្វើជាម្ចាស់ផ្ទះនាឆ្នាំ២០២២នេះ។
ពាក់ព័ន្ធកិច្ចការងារនេះ លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានប្រាប់ភ្នំពេញប៉ុស្តិ៍នៅថ្ងៃទី០៣ ខែមីនាថាបញ្ជាការដ្ឋានកងរាជអាវុធហត្ថលើផ្ទៃប្រទេស បានត្រៀមកម្លាំងប្រមាណជាង១០០០នាក់ សម្រាប់ពង្រឹងសន្តិសុខ សណ្ដាប់ធ្នាប់ជូនថ្នាក់ដឹកនាំ និង គណៈប្រតិភូការពារជាតិអាស៊ាន ដែលនឹងមកចូលរួមកិច្ចប្រជុំអគ្គបញ្ជាការកងទ័ពអាស៊ានលើកទី១៩ និងកិច្ចប្រជុំពាក់ព័ន្ធដទៃទៀតនាពេលខាងមុខនេះ។
លោកបានថ្លែងថា៖ «នៅពេលនេះ បញ្ជាការដ្ឋានកងរាជអាវុធហត្ថលើផ្ទៃប្រទេស កំពុងបើកវគ្គបំប៉នផ្នែកបើកបរក្បួនហែរអម និងការពារ សន្តិសុខ សុវត្ថិភាពថ្នាក់ដឹកនាំ និង គណៈប្រតិភូយោធាអាស៊ានដល់កងកម្លាំងពិសេសជាង១០០នាក់។ក្រៅពីកម្លាំងពិសេសជាង១០០នាក់នេះ យើងក៏បានត្រៀមកម្លាំងជាង១០០០នាក់ទៀតសម្រាប់ដាក់ពង្រាយនៅតាមគោលដៅសំខាន់ៗ ក្នុងរាជធានីភ្នំពេញ ដើម្បីការពារសន្តិសុខ សណ្ដាប់ធ្នាប់ជូនដល់ថ្នាក់ដឹកនាំ និង គណៈប្រតិភូការពារជាតិអាស៊ានផងដែរ»៕
