.jpg)
ជនសង្ស័យក្នុងពេលសមត្ថកិច្ចឃាត់ខ្លួនកាលពីថ្ងៃទី២ មីនា ។ រូបថត ប៉ូលិស
ព្រៃវែងៈ អយ្យការអមសាលាដំបូងខេត្តព្រៃវែង កំពុងសាកសួរបុរសម្នាក់នៅថ្ងៃទី៣មីនា បន្ទាប់ពីសមត្ថកិច្ចចាប់ខ្លួនបាន ១ ថ្ងៃ ករណីប៉ងរំលោភសេពសន្ថវៈហើយចាក់ស្ត្រីម្នាក់បណ្តាលឱ្យរបួសធ្ងន់កាលពីថ្ងៃទី ១ មីនា ឆ្នាំ ២០២២ នៅឃុំ ឫស្សីស្រុក ស្រុកពាមជរ ខេត្តព្រៃវែង។
លោក ចាន់ វណ្ណៈ អ្នកនាំពាក្យនៃអយ្យការអមសាលាដំបូងខេត្តព្រៃវែងប្រាប់ ភ្នំពេញ ប៉ុស្តិ៍ នៅថ្ងៃទី ៣ មីនាថា ករណីជនសង្ស័យឈ្មោះ បាន សារឿន ហៅ ង៉ូយ អាយុ៤២ឆ្នាំ កំពុងត្រូវបានតំណាងអយ្យការអមសាលាដំបូងខេត្តព្រៃវែងសាកសួរនៅឡើយទេ នៅរសៀលថ្ងៃទី៣មីនា ពាក់ព័ន្ធរឿងប៉ុនប៉ងរំលោភសេពសន្ថវៈហើយចាក់ស្ត្រីរងគ្រោះម្នាក់។
លោកថ្លែងថា៖«រឿងនេះខាងនគរបាលទើបបញ្ជូនជនសង្ស័យមកដល់តុលាការនៅម៉ោងជាង៣រសៀលថ្ងៃនេះទេ(ថ្ងៃទី៣មីនា)។ អីច៊ឹងពេលនេះខ្ញុំកំពុងចាប់ផ្តើមសួរគាត់មិនទាន់ចោទប្រកាន់ឬយ៉ាងណាទេ»។
លោក អ៊ុក ផាត នាយការិយាល័យព្រហ្មទណ្ឌនៃស្នងការដ្ឋាននគរបាលខេត្តព្រៃវែងឱ្យដឹងនៅថ្ងៃទី៣ មីនា ថា នារីរងគ្រោះឈ្មោះ វ. ស. ត អាយុ៣០ឆ្នាំ ត្រូវបានជនសង្ស័យចាប់រំលោភតែត្រូវស្ត្រីរងគ្រោះស្រែកទើបបណ្តាលឱ្យជនសង្ស័យចាក់នឹងកូនកាំបិតចុងស្រួចចាក់ចំនួន៤កាំបិត ដោយត្រូវពោះ១កាំបិត ក្លៀកខាងឆ្វេង១កាំបិត និងកំភួនដៃ១កាំបិទ។
លោកបន្តថា៖«ករណីនេះសមត្ថកិច្ចរបស់យើងបានចាត់ការតាមនីតិវិធីច្បាប់ហើយ។យើងកសាងសំណុំរៀងបញ្ជូនជនសង្ស័យទៅតុលាការដើម្បីចាត់ការហើយ»។
បើតាមកំណត់ហេតុរបស់នគរបាលជំនាញព្រហ្មទណ្ឌខេត្តព្រៃវែងបង្ហាញថាហេតុការណ៍នេះបានកើតឡើងនៅវេលាប្រមាណជាម៉ោង៩យប់ថ្ងៃទី១ ខែមីនា ឆ្នាំ២០២២ នៅលើផ្ទះរបស់នារីរងគ្រោះស្ថិតក្នុងឃុំឫស្សីស្រុក ស្រុកពាមជរ ខេត្តព្រៃវែង។ នារីរងគ្រោះមានប្តីទៅធ្វើការនៅប្រទេសកូរ៉េ និងកូនស្រីម្នាក់អាយុ៥ឆ្នាំ រីឯស្ត្រីរងគ្រោះរស់នៅជាមួយកូនស្រីដែលមានម្តាយអាយុជាង៨០ឆ្នាំ។
កំណត់ហេតុបង្ហាញបន្តថា នៅយប់ថ្ងៃកើតហេតុនោះ ម្តាយស្ត្រីរងគ្រោះបានទៅដេកនៅផ្ទះបងប្អូនក្នុងភូមិកើតហេតុនោះ។ហេតុដូច្នេះហើយជនសង្ស័យដែលរស់នៅក្បែរខាងផ្ទះស្ត្រីរងគ្រោះដឹងថាគ្មានមនុស្សនៅច្រើនទើបឡើងទៅធ្វើសកម្មភាពចាប់រំលោភស្ត្រីរងគ្រោះ តែត្រូវបានជនរងគ្រោះស្រែកធ្វើឱ្យជនល្មើសខ្លាចបែកការក៏ចាក់ជនរងគ្រោះតែម្តងទៅ។
កំណត់ហេតុបង្ហាញទៀតថា តាមរយៈការសួរចម្លើយគឺជនសង្ស័យបានសារភាពប្រាប់សមត្ថកិច្ចថា គាត់ពិតជាមានបំណងរំលោភស្ត្រីរងគ្រោះមែន តែចៃដន្យជនរងគ្រោះស្រែក ទើបជនល្មើសដែលមានកាំបិតដាក់តាមខ្លួនស្រាប់ចាក់បំណងសម្លាប់ ហើយស្មានតែជនរងគ្រោះស្លាប់គាត់ក៏រត់គេចខ្លួន តែក៏ត្រូវសមត្ថកិច្ចស្រាវជ្រាវចាប់បាននៅថ្ងៃទី២មីនា នៅក្នុងភូមិនៃឃុំ ឫស្សីស្រុក ក្នុងស្រុកពាមជរ៕
