.jpg)
មន្ត្រី កបប កំពុងត្រួតពិនិត្យទំនិញដែលនាំចូលតាមរថយន្តក្រុងពីប្រទេសវៀតណាម។ រូបថត កបប
ភ្នំពេញៈ មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) កំពុងបន្តនីតិវីធី ត្រួតពិនិត្យនូវមុខទំនិញមួយចំនួនបន្ថែមទៀត ដែលនាំចូលពីប្រទេសវៀតណាម តាមរថយន្តក្រុងចំនួន ៨ គ្រឿង បន្ទាប់ពីរកឃើញមុខទំនិញមួយចំនួន មានភាពមិនប្រក្រតី។ នេះបើតាមមន្ត្រីជាន់ខ្ពស់ ក.ប.ប។
លោក ប៊ុន ចំរើន អគ្គនាយករង នៃអគ្គនាយកដ្ឋាន ក.ប.ប បានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ០៣ ខែមីនាថា មន្ត្រីស៊ើបអង្កេត នៃអគ្គនាយកដ្ឋាន ក.ប.ប កាលពីរសៀលថ្ងៃទី ០១ ខែមីនា ឆ្នាំ ២០២២ បានកំណត់មុខសញ្ញា និងស្ទាក់ឃាត់រថយន្តក្រុងចំនួន៨គ្រឿង ដែលបានដឹកទំនិញចូលពីព្រំដែនប្រទេសវៀតណាម នៅចំណុចផ្លូវជាតិលេខ ១ ស្ថិតក្នុងភូមិសាស្ត្រសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។
កិច្ចការនេះ ត្រូវបានធ្វើឡើង ដោយមានកិច្ចសហការពីកងកម្លាំងនគរបាល នៃស្នងការដ្ឋាននគរបាលរាជធានីភ្នំពេញផងដែរ។
លោកបានបញ្ជាក់ថា៖ «ក្រោយពីឃាត់រថយន្តក្រុងទាំង ៨ គ្រឿងនោះ ក្រុមការងារយើងបានឆែកឆេររកឃើញ នូវបទល្មើសក្លែងបន្លំ មិនមានអនុលោមភាព លើលិខិតបទដ្ឋានគតិយុត្ត រំលោភកម្មសិទ្ធិបញ្ញា និងមិនមានឯកសារពាក់ព័ន្ធនឹងការនាំចូល លើប្រភេទទំនិញមួយចំនួន»។
លោកបានបន្ថែមថា៖ «ទំនិញទាំងនោះភាគច្រើន មិនមានហានិភ័យនោះទេ។ ប៉ុន្តែនៅពេលនេះ ក្រុមការងាររបស់យើងកំពុងបន្តត្រួតពិនិត្យទៅលើមុខទំនិញមួយចំនួនបន្ថែមទៀត ដើម្បីធ្វើការផាកពិន័យ ទៅតាមនីតិវិធីច្បាប់»។
ទោះយ៉ាងណាក៏ដោយ លោក ប៊ុន ចំរើន មិនបានបញ្ជាក់ឱ្យដឹងពីប្រភេទនៃមុខទំនិញ និងសាមីជន ដែលជាម្ចាស់ទំនិញទាំងនោះឡើយ ដោយបញ្ជាក់ថា កំពុងស្ថិតក្នុងនីតិវិធីនៃការត្រួតពិនិត្យនៅឡើយ៕
