ការចាក់វ៉ាក់សាំងដូសជំរុញប្រភេទ Pfizer នៅរាជធានីភ្នំពេញកាលពីថ្ងៃទី២ មីនា ឆ្នាំនេះ ។ ហេង ជីវ័ន
ភ្នំពេញៈ មន្ត្រីជាន់ខ្ពស់ក្រសួងសុខាភិបាលបានលើកឡើងថា វ៉ាក់សាំងកូវីដ ១៩ ប្រភេទ Pfizer នឹងបញ្ជូនទៅតាមមន្ទីរសុខាភិបាលរាជធានីខេត្តក្នុងពេលឆាប់ៗនេះបន្ទាប់ពីទូបង្កកត្រជាក់សម្រាប់រក្សាវ៉ាក់សាំងកូវីដ១៩ដែលអាចរក្សាសីតុណ្ហភាព -៨០ អង្សារត្រូវបានដំឡើងរួចរាល់សម្រាប់រក្សាវ៉ាក់សាំងទាំងនេះ។
លោកស្រី ឱ វណ្ណឌីន រដ្ឋលេខាធិការនៃក្រសួងសុខាភិបាលនិងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ក្នុងក្របខ័ណ្ឌទាំងប្រទេស បានថ្លែងកាលពីថ្ងៃទី២ ខែមីនា ថា អ្វីដែលសំខាន់នោះគឺការដំឡើងទូបង្កកត្រជាក់នេះដែលទាមទារឱ្យមានអ្នកបច្ចេកទេសត្រឹមត្រូវដើម្បីពិនិត្យមើលនូវដំណើរការនូវទូនេះ។
លោកស្រី មានប្រសាសន៍ថា៖ «វាមិនមែនមានន័យថាទូបង្កកទៅដល់ហើយ វ៉ាក់សាំងក៏ត្រូវទៅដល់ដែរទេដោយសារវាក់សាំងនេះទាមទារនូវសីតុណ្ហភាពសម្រាប់រក្សាទុកខុសពីវ៉ាក់សាំងផ្សេងៗ ហើយកន្លែងរក្សាទូបង្កកនេះក៏ត្រូវមានបរិស្ថាន បន្ទប់ ទីតាំងសមស្របទៅតាមលក្ខណៈបច្ចេកទេស។ បើមិនដូច្នេះទេ ទូត្រជាក់នេះក៏អត់ដំណើរការបានតាមលក្ខណៈបច្ចេកទេសដែរ»។
លោកស្រីបានឱ្យដឹងថា ខាងជំនាញកំពុងតែធ្វើការជាមួយនឹងមន្ទីរសុខាភិបាលរាជធានីខេត្តទាំង២៥ដើម្បីដំឡើងទូត្រជាក់ទាំងនោះទៅតាមទីតាំងដែលបានកំណត់ដោយរាជធានីខេត្តនិងស្រុកប្រតិបត្តិហើយបន្ទាប់មក
ក្រុមការងារនិងធ្វើការតេស្តមើលថាតើទូនេះវាដំណើរការសមស្របហើយឬនៅ។
លោកស្រី ឱ វណ្ណឌីន បញ្ជាក់ថា៖ «ខ្ញុំគិតថាមិនយូរទេ វ៉ាក់សាំងនេះនឹងបញ្ជូនទៅតាមបណ្តាខេត្តក្នុងពេលឆាប់ៗនេះដើម្បីឱ្យបងប្អូនមានលទ្ធភាពនៅក្នុងការប្រើប្រាស់ដើម្បីចាក់ជូនក្រុមអាទិភាពនៅតាមបណ្តារាជធានីខេត្តរបស់យើង»។
គួរបញ្ជាក់ថា កាលពីថ្ងៃទី២៨ ខែកុម្ភៈកន្លងទៅនេះ រាជរដ្ឋាភិបាលកម្ពុជា បានទទួលជំនួយជាទូបង្កកត្រជាក់ខ្លាំងសម្រាប់រក្សាវ៉ាក់សាំងកូវីដ១៩ ចំនួន៣៣គ្រឿង ទូទឹកកករក្សាវ៉ាក់សាំងចំនួន១០០គ្រឿង និងបរិក្ខារប្រព័ន្ធត្រជាក់ដទៃមួយចំនួនទៀតពីរដ្ឋាភិបាលប្រទេសអូស្ត្រាលីក្នុងការធ្វើឲ្យកម្ពុជាបន្តឈានមុខក្នុងកិច្ចខិតខំប្រឹងផ្ដល់វ៉ាក់សាំងបង្ការជំងឺកូវីដ១៩ទៅដល់ប្រជាពលរដ្ឋ។
បើតាមស្ថានទូតអូស្ត្រាលី ទូបង្កករក្សាវ៉ាក់សាំងសរុបចំនួន១៣៣គ្រឿងនេះគឺជាផ្នែកមួយនៃកញ្ចប់គាំទ្រចំនួន ៣៥,៧លានដុល្លារអូស្ត្រាលីពីរាជរដ្ឋាភិបាលអូស្ត្រាលីដែលកំពុងត្រូវបានផ្ដល់ក្នុងភាពជាដៃគូជាមួយយូនីសេហ្វ។ កញ្ចប់គាំទ្រនេះរួមមានវ៉ាក់សាំងប្រភេទ Pfizer ចំនួន២,៣៥លានដូស ដែលត្រូវបានផ្ដល់មកកម្ពុជា កាលពីខែធ្នូកន្លងទៅ។
ទូបង្កកត្រជាក់ខ្លាំងថ្មីៗទាំងនេះ នឹងជួយដល់ការរក្សាទុកវ៉ាក់សាំងប្រភេទ Pfizer-BioNTech បានរយៈពេលវែង នៅតាមគ្រប់រាជធានីខេត្ត រួមទាំងខេត្តនៅឆ្ងាយៗផងដែរ។ ក្រុមការងារយូនីសេហ្វ នឹងជួយដំឡើងបរិក្ខារទាំងនេះ ផ្ដល់ការបណ្ដុះបណ្ដាលអំពីការប្រើប្រាស់ និងពិនិត្យតាមដានផលប្រយោជន៍នៃការប្រើប្រាស់។ បរិក្ខារទាំងនេះនឹងបន្តពង្រឹងប្រព័ន្ធថែទាំសុខាភិបាលជាតិនាពេលអនាគត។
រាជរដ្ឋាភិបាលកម្ពុជា បានបើកយុទ្ធនាការចាក់វ៉ាក់សាំងកូវីដ១៩ដូសទី៤ដោយប្រើវ៉ាក់សាំងប្រភេទPfizer កាលពីដើមខែមករា ដែលជាជំនួយរបស់រដ្ឋាភិបាលអូស្ត្រាលី ទៅដល់ប្រជាពលរដ្ឋទូទាំងប្រទេសដែលដល់វេនត្រូវចាក់ អាចមកទទួលយកវ៉ាក់សាំងនេះបាននៅរាជធានីភ្នំពេញតែមួយគត់។ការផ្តល់តែក្នុងរាជធានីភ្នំពេញ ដោយសារតែវ៉ាក់សាំងនេះត្រូវរក្សាទុកក្នុងទូបង្កកត្រជាក់រហូតដល់-៨០អង្សារ។
លោកស្រី ឱ វណ្ណឌីន បានឱ្យដឹងថា នៅក្នុងបរិបទនៃការឆ្លងរាលដាលវីរុសកូវីដ១៩ ជាពិសេសពពួកអូមីក្រុងដែលតួលេខនៃការឆ្លងនៅមានរាប់រយនៅឡើយ ដែលរកឃើញតាមរយៈការធ្វើតេស្តម៉ាស៊ីនធំឬPCR ហើយនឹងមានជាច្រើនទៀតតាមរយៈការធ្វើតេស្តរហ័សនិងសម្រាកព្យាបាលនៅតាមផ្ទះ។
លោកស្រីថ្លែងថា៖«ជាមួយគ្នានេះ ខ្ញុំសុំអំពាវនាវដល់អាជ្ញាធរមូលដ្ឋាន សុំបន្តការយកចិត្តទុកដាក់កៀងគរប្រជាពលរដ្ឋមកចាក់វ៉ាក់សាំងឱ្យបានគ្រប់ៗគ្នានិងត្រូវធ្វើជំរឿនតាមគ្រួសារនីមួយៗឱ្យបានច្បាស់លាស់ថាតើអ្នកណាបានចាក់ហើយ អ្នកណាមិនទាន់បានចាក់ រួចប្រមូលពួកគាត់ដើម្បីអញ្ជើញគ្រូពេទ្យដើម្បីយកវ៉ាក់សាំងចាក់ជូនពួកគាត់រួមគ្នាតែម្តង»។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី២ ខែមីនា អ្នកដែលទទួលបានការចាក់ដូសទី១ មានចំនួនជាង១៤លាននាក់ ដូសទី២ មានចំនួន ជាង១៣លាននាក់ ដូសទី៣ឬដូសជំរុញបានចំនួនជាង៧លាននាក់ និងអ្នកដែលបានចាក់វ៉ាក់សាំងដូសទី៤ មានចំនួនជិត១០ម៉ឺននាក់ផងដែរ៕
