.jpg)
លោក ឃួង ស្រេង នៅក្នុងកម្មវិធីពីថ្ងៃ ៣ មីនា។ រូបថត ក្រសួងមហាផ្ទៃ
ភ្នំពេញៈ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អំពាវនាវដល់រដ្ឋបាលថ្នាក់ក្រោមជាតិគ្រប់ជាន់ថ្នាក់ឱ្យដោះស្រាយបញ្ហា និងកសាងយុត្ដិធម៌ចំពោះប្រជាពលរដ្ឋនៅមូលដ្ឋានជាកត្ដាចាំបាច់បន្ថែមលើការយកអំណោយទៅចែកជូនពលរដ្ឋ។
លោក ស ខេង ថ្លែងក្នុងពេលអញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ ២០២១ និងលើកទិសដៅការងារឆ្នាំ ២០២២ របស់រដ្ឋបាលរាជធានីភ្នំពេញកាលពីថ្ងៃទី ៣ ខែមីនា ឆ្នាំ ២០២២ ថា ការដោះស្រាយបញ្ហាប្រឈមនៅមូលដ្ឋាន គឺជាបញ្ហាសំខាន់ដែលមានការទាក់ទងដល់អារម្មណ៍របស់ប្រជាពលរដ្ឋផ្ទាល់តែម្ដង។
លោកថ្លែងថា៖ «ខ្ញុំសូមអំពាវនាវដល់រដ្ឋបាលគ្រប់ថ្នាក់នៃរដ្ឋបាលថ្នាក់ក្រោមជាតិរបស់យើង ទាំងរាជធានី ខណ្ឌ ក៏ដូចជាសង្កាត់ ហើយនឹងស្ថាប័ន អង្គភាព ដែលមានការពាក់ព័ន្ធយកចិត្ដទុកដាក់ ដើម្បីដោះស្រាយបញ្ហាប្រឈមសំណើសំណូមពរនៅមូលដ្ឋាននេះឱ្យបានល្អប្រសើរតទៅទៀត ដើម្បីដណ្ដើមនូវជំនឿទុកចិត្ដរបស់ប្រជាពលរដ្ឋ»។
លោកបញ្ជាក់ថា៖ «ការផ្ដល់ជំនួយសង្គ្រោះជាសម្ភារជាថវិកា ការផ្ដល់ជំនួយមនុស្សធម៌ជាសម្ភារជាថវិកាជាដើមគឺជាការចាំបាច់ ប៉ុន្ដែអ្វីដែលជាការចាំបាច់ជាងនេះតាមខ្ញុំយល់គឺការកសាងយុត្ដិធម៌នៅមូលដ្ឋាននេះគឺជាបញ្ហាគន្លឹះ»។
លោក ស ខេង ថ្លែងថា ការដោះស្រាយនៅមូលដ្ឋាន បើគ្មានយុត្ដិធម៌ទេ ទោះបីយកអំណោយទៅជូនប្រជាពលរដ្ឋប៉ុន្មានក៏ពួកគាត់មិនជឿយើងដែរ។ ប៉ុន្ដែផ្ទុយទៅវិញបើដោះស្រាយទំនាស់ ឬបញ្ហានៅមូលដ្ឋានប្រកបដោយយុត្ដិធម៌ លោក ជឿថា ពលរដ្ឋពិតជាសប្បាយរីករាយពិតជាទទួលយកបាន ហើយមិនមែនត្រឹមតែពលរដ្ឋនោះទេ សង្គមទាំងមូលគឺទទួលយកបាន។
លោកបញ្ជាក់ថា៖ «អ៊ីចឹងហើយ ខ្ញុំស្នើដោយទទូចថា យើងនាំគ្នាបន្តបំពេញភារកិច្ចរបស់យើងក្នុងឋានៈជាមន្ដ្រីរាជការបម្រើប្រជាពលរដ្ឋដោយមិនប្រកាន់និន្នាការនយោបាយមិនប្រកាន់ពណ៌សម្បុរ មិនរើសអើងតទៅទៀត ដើម្បីស្វែងរកការគាំទ្រពីប្រជាពលរដ្ឋមកលើការដឹកនាំរបស់រាជរដ្ឋាភិបាល»។
លោក ស ខេង ក៏បានណែនាំរដ្ឋបាលរាជធានីភ្នំពេញខិតខំយកចិត្តអនុវត្តគោលនយោបាយភូមិ ឃុំ សង្កាត់មានសុវត្ថិភាព ដែលជាយន្តការពាក់ព័ន្ធដោយផ្ទាល់ទៅនឹងជីវភាពរស់នៅរបស់ប្រជាពលរដ្ឋតាមមូលដ្ឋាន និងទាមទារការចូលរួមពីគ្រប់តួអង្គពាក់ព័ន្ធនៅក្នុងលក្ខណសម្បត្តិនៃគោលនយោបាយទាំង ៧ ចំណុច។
ដោយឡែកពាក់ព័ន្ធនឹងសំណើវិសោធនកម្មច្បាប់ស្ដីពីការគ្រប់គ្រងរដ្ឋបាលឃុំ សង្កាត់ ពិសេសពាក់ព័ន្ធនឹងតួនាទីស្មៀន និងក្រុមប្រឹក្សា ឃុំសង្កាត់ ព្រមទាំងសំណើមួយចំនួនទៀតរបស់រដ្ឋបាលរាជធានីនោះ លោក ស ខេង បានទទួលយកមកសិក្សា។
លោកបានផ្ដល់ការណែនាំជាថ្មីឱ្យរដ្ឋបាលគ្រប់ថ្នាក់នៅថ្នាក់ក្រោមជាតិ ពិសេសរាជធានី ខេត្ត ក្រុង ស្រុក ខណ្ឌ ឃុំ សង្កាត់ ត្រូវបំពេញតួនាទីភារកិច្ចប្រកបដោយការទទួលខុសត្រូវ ពិសេសត្រូវពង្រឹងប្រព័ន្ធទំនាក់ទំនងការងាររវាងក្រុមប្រឹក្សា និងគណៈអភិបាលក្នុងការសម្រេចកិច្ចការផ្សេងៗក្នុងដែនដីរដ្ឋបាលរបស់ខ្លួន។
លោក ឃួង ស្រេង អភិបាលរាជធានីភ្នំពេញ ថ្លែងក្នុងពិធីនេះថា ក្នុងចំណោមខេត្ត ទាំង ២៥ រាជធានីភ្នំពេញ និងជាមជ្ឈមណ្ឌលនយោបាយ សេដ្ឋកិច្ច សង្គមកិច្ច ទេសចរណ៍ វប្បធម៌ និងការទូតដែលមានការអភិវឌ្ឍលើគ្រប់វិស័យ។
លោកថា កាលពី ២០២១ ទោះបីជាវិបត្តិកូវីដ ១៩ ប៉ះពាល់ធ្ងន់ធ្ងរក្តី ក៏ការអនុវត្តតួនាទី ភារកិច្ចរបស់រដ្ឋបាលរាជធានីភ្នំពេញ រដ្ឋបាលខណ្ឌ សង្កាត់ និងមន្ទីរវិស័យនានាបានដំណើរការជាប្រក្រតី និងសម្រេចបានសមិទ្ធផលគួរជាទីមោទនៈ ជាពិសេសការបិទបញ្ចប់ព្រឹត្តិការណ៍សហគមន៍ ២០ កុម្ភៈ ឆ្នាំ ២០២១ កាលពីថ្ងៃទី ២០ ខែធ្នូ ឆ្នាំ ២០២១ កន្លងទៅ។
លោកថា៖ «ទន្ទឹមនឹងលទ្ធផលនេះ រដ្ឋបាលរាជធានីភ្នំពេញ ប្ដេជ្ញាបន្តប្រមូលផ្ដុំកម្លាំងសរុប មធ្យោបាយសរុប និងវិធានការសរុប ដើម្បីបន្តគ្រប់គ្រង និងដោះស្រាយឱ្យកាន់តែល្អប្រសើរនូវការងារអាទិភាពសំខាន់ៗមួយចំនួនទៀតរួមមាន ការគ្រប់គ្រងការឆ្លងរាលដាលនៃជំងឺកូវីដ ១៩ ការបង្កើនល្បឿននៃការចាក់វ៉ាក់សាំង ការពង្រឹងរបៀបរបបការងារក្នុងគន្លងប្រក្រតីភាពថ្មី ស្របពេលនៃការបើកដំណើរការសេដ្ឋកិច្ច សង្គមឡើងវិញ»។
លោកបន្តថា រដ្ឋបាលរដ្ឋធានីភ្នំពេញក៏បានត្រៀមខ្លួនសម្រាប់ការរៀបចំកិច្ចប្រជុំកំពូលអាស៊ានឆ្នាំ ២០២២ ដែលកម្ពុជាធ្វើជាម្ចាស់ផ្ទះ និងការគាំទ្រដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ ២០២២ រួមនឹងការពង្រឹងគោលនយោបាយ ភូមិ-ឃុំ មានសុវត្ថិភាព ផ្តល់សេវាសាធារណៈឱ្យកាន់តែល្អប្រសើរផងដែរ៕
