ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» ណែនាំឱ្យក្រុមហ៊ុន DKSH ធ្វើលិខិតប្រកាសព័ត៌មានស្ដីពីការប្រមូលមកវិញពីអ្នកប្រើប្រាស់នូវផលិតផលម្សៅទឹកដោះគោសម្រាប់ទារកម៉ាក់ Similac បន្ទាប់ពីរកឃើញវត្តមានមេរោគក្នុងផលិតផលនេះ ខណៈក្រសួងសុខាភិបាលក៏បានប្រកាសពីការប្រមូលត្រឡប់ពីទីផ្សារមកវិញនូវផលិតផលទឹកដោះគោមួយចំនួន។
ការប្រកាសបែបនេះបានធ្វើឡើងពីទី ២ ខែមីនា ក្នុងជំនួបពិភាក្សាអំពីយន្តការនៃការប្រមូលផលិតផលមកវិញដោយស្ម័គ្រចិត្តពាក់ព័ន្ធនឹងការរកឃើញវត្តមានមេរោគ CRONOBACTER SAKAZAKI ក្នុងម្សៅទឹកដោះគោសម្រាប់ទារក Similac ដែលផលិតនៅអាមេរិករវាងអគ្គនាយកដ្ឋាន ក.ប.ប. ជាមួយតំណាងក្រុមហ៊ុន DKSH។
ទំព័រហ្វេសប៊ុករបស់អគ្គនាយកដ្ឋាន ក.ប.ប. បានឱ្យដឹងថា៖ «ផលិតផលដែលប៉ះពាល់នេះមានលេខកូដ ២ ខ្ទង់ ដំបូង ២២ ដល់ ៣៧ ត្រូវបានកំណត់ដោយរដ្ឋបាលចំណីអាហារ និងឱសថនៃសហរដ្ឋអាមេរិក។ តាមព័ត៌មានពីប្រភពផលិតបានឱ្យដឹងថា ផលិតផលនេះត្រូវបាននាំចូលមកប្រទេសមួយចំនួនក្នុងតំបន់អាស៊ី ប៉ុន្តែមិនបាននាំចូលមកក្នុងប្រទេសកម្ពុជាឡើយ»។
ជាមួយនឹងការប្រកាសនេះអគ្គនាយកដ្ឋាន ក.ប.ប. បានណែនាំឱ្យក្រុមហ៊ុន DKSH រៀបចំធ្វើលិខិតប្រកាសព័ត៌មានស្ដីពីការប្រមូលមកវិញពីអ្នកប្រើប្រាស់ក្នុងករណីដែលមានបញ្ជាទិញពីប្រភពផ្សេងៗទៀត។
លោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. បានប្រាប់ភ្នំពេញ-ប៉ុស្តិ៍បន្ថែមថា ក.ប.ប. បានទុកពេលឱ្យក្រុមហ៊ុននេះធ្វើសេចក្តីប្រកាសជាផ្លូវការ ដើម្បីឆ្លើយតបទៅកាន់សាធារណជន និងប្រមូលត្រឡប់ផលិតផលទាំងនេះពីអតិថិជនមកវិញ។
លោកបានបញ្ជាក់ថា៖ «នៅពេលនេះក្រុមហ៊ុនកំពុងធ្វើនីតិវិធីធ្វើសេចក្តីជូនដំណឹងទៅសាធារណជនហើយថ្ងៃចន្ទខាងមុខគេនឹងធ្វើការផ្សព្វផ្សាយជាសាធារណៈ។ ដូច្នេះខ្ញុំនឹងជូនដំណឹងជាថ្មីទៀតគ្រាន់តែថាយើងផ្តល់ភាពអនុគ្រោះដល់ក្រុមហ៊ុនគេសិន»។
ពាក់ព័ន្ធនឹងផលិតផលដែលរកឃើញមានមេរោគនេះ អ្នកស្រី ម៉ង ល័ក្ខស្មី ជាអាណាព្យាបាលម្នាក់រស់នៅខេត្តបន្ទាយមានជ័យបានលើកឡើងថា កូនអ្នកស្រីវ័យជាង ៣ ខែ ហើយ អ្នកស្រីបានឱ្យកូនបៅទឹកដោះគោប្រភេទនេះបានជាង ២ ខែ ក៏ធ្លាក់ខ្លួនឈឺ។
អ្នកស្រីថា៖ «ដំបូងឡើយខ្ញុំមិនជឿថា ទឹកដោះគោនេះមានមេរោគទេ ដល់ពេលគេប្រកាសបានខ្ញុំពិនិត្យលើដបកំប៉ុងថាលេខកំប៉ុងដែលកូនខ្ញុំកំពុងប្រើគឺជាលេខដែលគេប្រកាស ប្រមូលត្រឡប់ទៅវិញ»។
យ៉ាងណាក្ដី អ្នកស្រី ល័ក្ខស្មី បានសរសើរក្រុមហ៊ុនអាមេរិកមួយនេះ ដែលបានប្រកាសភ្លាមៗពីបញ្ហាដែលកើតមានលើផលិតផលរបស់ខ្លួនហើយបានប្រកាសប្រមូលត្រឡប់មកវិញ។ ប៉ុន្តែអ្នកស្រីអន់ចិត្តចំពោះកន្លែងលក់រាយមួយចំនួនដែលអ្នកស្រីបានទិញម្សៅទឹកដោះគោនេះ ដោយសារពួកគេមិនទទួលផលិតផលនេះពីអ្នកស្រីវិញ។
អ្នកស្រីបញ្ជាក់ថា៖ «ដោយសារតែខ្ញុំខ្លាចផលិតផលនេះអស់ស្តុកខ្ញុំក៏បានបញ្ជាទិញយ៉ាងច្រើនពីភ្នំពេញផងពីហាងក្នុងខេត្តផងយកមកស្តុកទុក។
គ្រាន់តែទទួលបានព័ត៌មាននេះហាងនៅភ្នំពេញបានទទួលត្រឡប់ផលិតនេះពីខ្ញុំវិញ។ ប៉ុន្តែខ្ញុំនៅសល់ ៩ កំប៉ុងហាងក្នុងខេត្តគេមិនព្រមយកវិញសរុបជាលុយជាង ៣០០ ដុល្លារ»។
ទាក់ទងនឹងបញ្ហានេះនៅថ្ងៃទី ៣ មីនា ក្រសួងសុខាភិបាលក៏បានប្រកាសពីការប្រមូលត្រឡប់ពីទីផ្សារមកវិញនូវផលិតផលទឹកដោះគោ Alimentum, EleCare និង Human Milk Fortifier ឬ similar នេះផងដែរ។
សេចក្តីជូនព័ត៌មាននេះឱ្យដឹងថា ក្រសួងសុខាភិបាលបានទទួលដំណឹងពីបណ្ដាញអាជ្ញាធរសុវត្ថិភាពចំណីអាហារអន្តរជាតិ (INFOSAN) សេចក្តីប្រកាសរបស់រដ្ឋបាលឱសថ និងចំណីអាហារសហរដ្ឋអាមេរិក សេចក្ដីប្រកាសរបស់រោងចក្រផលិតទឹកដោះគោឈ្មោះអ៊ែបប៊ុត (Abbotl) និងលិខិតចុះថ្ងៃទី ២១ ខែកុម្ភៈឆ្នាំ ២០២២ របស់ក្រុមហ៊ុនឌីខេអេសអេច (ខេមបូឌា) អិលធីឌី បានបញ្ជាក់ពីការប្រមូលត្រឡប់មកវិញដោយស្ម័គ្រចិត្តនូវផលិតផលទឹកដោះគោទាំងនោះដែលផលិតដោយរោងចក្រឈ្មោះ Sturgis) នៅអាមេរិកសង្ស័យថា មានឆ្លងមេរោគឈ្មោះ ក្រូណូបាក់ទែរ សាកាហ្សាគី (Cronohacler Snkazaki និងសាលម៉ូណែលឡា (Salmonella) ក្នុងខ្សែចង្វាក់ផលិតកម្ម។
ក្រសួងបានបន្តថា៖ «មេរោគនេះបង្កឱ្យមានគ្រោះថ្នាក់ដល់សុខភាពអ្នកប្រើប្រាស់ពិសេសចំពោះទារក និងកុមារតូចៗ។
សូមបញ្ជាក់ថា ពពួកមេរោគក្រូណូបាក់ទែរសាកាហ្សាគីស្លាប់បាននៅសីតុណ្ហភាព ៧០ អង្សាសេឡើង។ ដូចនេះចំពោះមាតាបិតាដែលនិយម (ឆុង) ទឹកដោះគោម្សៅជាមួយទឹកត្រជាក់ដែលមានកម្ដៅទាបជាង ៧០ អង្សាសេគឺមានហានិភ័យខ្ពស់ដល់សុខភាពកូន...»។
ក្រសួងសុខាភិបាលអះអាងថាប្រទេសកម្ពុជាពុំមាននាំចូលស្របច្បាប់នូវផលិតផលដែលសង្ស័យនេះទេតែក្រសួងសុខាភិបាលបារម្ភខ្លាចប្រជាជនយើងប្រើប្រាស់ផលិតទាំងនេះដោយប្រការណាមួយ។
ករណីម្សៅទឹកដោះគោមានបញ្ហាបែបនេះ កាលពីឆ្នាំ ២០២០ ក៏ធ្លាប់មានអាណាព្យាបាលក្មេងប្តឹងទៅក្រសួងសុខាភិបាលផងដែរ បន្ទាប់ពីកូនៗពួកគេជួបបញ្ហាកង្វះឈាមក្រហម និងខ្វះជាតិដែក ក្រោយប្រើម្សៅទឹកដោះគោម៉ាក Nutrilatt។
ចាប់ពីឆ្នាំ ២០០០ ដល់ឆ្នាំ ២០១០ អត្រាបំបៅកូនដោយទឹកដោះតែ ១ មុខ នៅកម្ពុជាចាប់ពីកើតដល់ ៦ ខែ (ស្របតាមការណែនាំរបស់អង្គការសុខភាពពិភពលោក) បានកើនខ្លាំងគឺចាប់ពី ១១% ដល់ ៧៤%។ ប៉ុន្តែរបាយការណ៍ឆ្នាំ ២០១៤ បែរជាបង្ហាញថា ធ្លាក់ចុះ ព្រោះតែការផ្សព្វផ្សាយពីផលិតផលទឹកដោះគោគ្មានសីលធម៌ជះឥទ្ធិពលអវិជ្ជមានដល់ការបំបៅដោះកូនដោយទឹកដោះម្តាយ៕
វីដេអូ៖