The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​ជាតិ​អប្សរា​បណ្តុះបណ្តាល​សមត្ថភាព​មន្ត្រី​បន្ថែម ដើម្បី​លើកកម្ពស់​ការគ្រប់គ្រង​សំណង់​ក្នុង​តំបន់​អង្គរ

អាជ្ញាធរ​ជាតិ​អប្សរា​បណ្តុះបណ្តាល​សមត្ថភាព​មន្ត្រី​បន្ថែម ដើម្បី​លើកកម្ពស់​ការគ្រប់គ្រង​សំណង់​ក្នុង​តំបន់​អង្គរ

Content image - Phnom Penh Post
មន្ត្រី​ចូលរួម​នៅក្នុង​វគ្គ​បណ្ដុះបណ្ដាល​បន្ថែម​។ រូបថត អាជ្ញាធរ​ជាតិ​អប្សរា

អាជ្ញាធរ​ជាតិ​អប្សរា​បណ្តុះបណ្តាល​សមត្ថភាព​មន្ត្រី​បន្ថែម ដើម្បី​លើកកម្ពស់​ការគ្រប់គ្រង​សំណង់​ក្នុង​តំបន់​អង្គរ

សៀមរាបៈ អាជ្ញាធរ​ជាតិ​អប្សរា​បាន​បើក​វគ្គ​បណ្តុះបណ្តាល​បន្ថែម​ទៀត ដើម្បី​ពង្រឹងសមត្ថភាព​មន្ត្រី​ក្នុង​ការលើកកម្ពស់​ការងារ​ពិនិត្យ​វាយតម្លៃ​អំពី​សំណង់ និង​ការស្វែងយល់​ស៊ីជម្រៅ​ពី​បទដ្ឋាន​ច្បាប់​នៃ​ការគ្រប់គ្រង​សំណង់​ក្នុង​តំបន់​រមណីយដ្ឋាន​អង្គរ ព្រមទាំង​និតិ​វិធី​ក្នុង​ការចុះ​សម្របសម្រួល​ការងារ​ប្រកប​ដោយ​ប្រសិទ្ធភាព និង​លើកតម្លៃ​តំបន់​អង្គរ តាមរយៈ​ការថែរក្សា​ទម្រង់​ស្ថាបត្យកម្ម​ផ្ទះ​ខ្មែរ​។

នៅ​សាលសន្និសីទ​អង្គរ​នៃ​អាជ្ញាធរ​ជាតិ​អប្សរា​នៅ​ថ្ងៃទី​ ២ ខែមីនា ឆ្នាំ​ ២០២២ អាជ្ញាធរ​ជាតិ​អប្សរា​បាន​បើក​វគ្គ​បណ្តុះបណ្តាល​ជំនាញ​ស្តីពី «​បទដ្ឋាន​ក្នុង​ការរៀបចំ​ដីធ្លី និង​ការគ្រប់គ្រង​សំណង់​ក្នុង​រមណីយដ្ឋាន​អង្គរ​» ជូន​ដល់​មន្ត្រី​បុគ្គលិក មកពី​នាយកដ្ឋាន​សណ្តាប់ធ្នាប់ និង​សហប្រតិបត្តិការ នាយកដ្ឋាន​រៀបចំ​ដែនដី និង​គ្រប់គ្រង​លំនៅឋាន​ក្នុង​ឧទ្យាន​អង្គរ រួមទាំង​និស្សិត​មហាវិទ្យាល័យ​ស្ថាបត្យកម្ម​នៃ​សាកលវិទ្យាល័យ​ភូមិន្ទ និង​វិចិត្រ​សិល្បៈ​សរុប​ចំនួន​ ១០០​ នាក់​។ នេះ​បើតាម​ហ្វេសប៊ុក​អាជ្ញាធរ​ជាតិ​អប្សរា​។

លោក ឡុង កុសល អ្នកនាំពាក្យ​អាជ្ញាធរ​ជាតិ​អប្សរា​ថ្លែង​នៅ​ថ្ងៃទី​ ២ ខែមីនា​ថា វគ្គ​បណ្តុះបណ្តាល​នេះ​មាន​គោលបំណង ពង្រឹង​សមត្ថភាព និង​ផ្តល់​ចំណេះដឹង​បន្ថែម​ដល់​មន្ត្រី បុគ្គលិក​នៃ​អាជ្ញាធរ​ជាតិ​អប្សរា ព្រោះ​ពួកគាត់​ជា​អ្នកធ្វើការ​ទំនាក់ទំនង​ដោយផ្ទាល់​ជាមួយ​ប្រជាពលរដ្ឋ​ដែល​រស់នៅ​តំបន់​រមណីយដ្ឋាន​អង្គរ​។ ពួកគាត់​ក៏​ជា​អ្នកត្រួតពិនិត្យ​មើល​ការសាងសង់​លើ​សំណង់​ទាំងឡាយ ក៏ដូចជា​ធ្វើការ​ទប់ស្កាត់​នូវ​សំណង់​ខុសច្បាប់​ផ្សេងៗ ផងដែរ​។

លោក​បន្តថា វគ្គ​បណ្តុះបណ្តាល​នេះ ក៏​ដើម្បី​លើកកម្ពស់​ការងារ​ពិនិត្យ​វាយតម្លៃ​អំពី​សំណង់ និង​ការស្វែងយល់​ស៊ីជម្រៅ​ពី​បទដ្ឋាន​ច្បាប់​នៃ​ការគ្រប់គ្រង​សំណង់ ក្នុង​តំបន់​រមណីយដ្ឋាន​អង្គរ ព្រមទាំង​និតិ​វិធី​ក្នុង​ការចុះ​សម្របសម្រួល​ការងារ​ប្រកបដោយ​ប្រសិទ្ធភាព ជាពិសេស​ដើម្បី​ធ្វើការ​អប់រំ និង​ផ្សព្វផ្សាយ​ចំណេះដឹង ដល់​និស្សិត​លើ​កិច្ចការ​របស់​អាជ្ញាធរ​ជាតិ​អប្សរា និង​ការគ្រប់គ្រង​រមណីយដ្ឋាន​អង្គរ ដែលជា​សម្បត្តិ​បេតិកភណ្ឌ​ពិភពលោក​។

លោក​ថ្លែងថា​៖ «​គោលបំណង​របស់​យើង​សំខាន់​ទី​ ១ ណែនាំ​មន្ត្រី​ជំនាញ​របស់​យើង​អំពី​កម្រិត​សមត្ថភាព​បន្ថែម ទី​ ២ គឺ​យើង​ចង់​ផ្សព្វផ្សាយ​ទៅដល់​សាធារណជន ជាពិសេស​សិស្ស​និស្សិត ដែល​យើង​ហៅថា ជា​ទំពាំង​ស្នង​ឫស្សី​ហ្នឹង​ឱ្យ​គាត់​កាន់តែ​យល់​ជ្រាប​ឱ្យបាន​ច្បាស់​អំពី​បទដ្ឋាន​ទាំងឡាយ​ពាក់ព័ន្ធ​នឹង​សំណង់​ស្ថាបត្យកម្ម​ខ្មែរ​» ។

លោក​បន្តថា ចំពោះ​ការរៀបចំ​ដែនដី និង​សំណង់​នៅ​តំបន់​អង្គរ អាជ្ញាធរ​ជាតិ​អប្សរា លើកទឹកចិត្ត​ឱ្យ​ពលរដ្ឋ​បន្ត​ថែរក្សា​ឱ្យបាន​នូវ​ទម្រង់​ស្ថាបត្យកម្ម​ខ្មែរ ផ្ទះ​ខ្មែរ​បុរាណ​នៅ​បរិវេណ​តំបន់​អង្គរ​។ ទន្ទឹម​នោះ អាជ្ញាធរ​នឹង​រៀបចំ​គ្រប់គ្រង​ដែនដី​ប្រកបដោយ​បទដ្ឋាន​ក្នុងការ​ប្រើប្រាស់​ចំណីផ្លូវ​ការធ្វើ​ផ្ទះ​លក្ខណៈ​ភូមិ​បែប​ប្រពៃណី ដើម្បីឱ្យ​ផ្តល់​តម្លៃ​ថែមទៀត​ដល់​រមណីយដ្ឋាន​អង្គរ​។

លោក​ថ្លែងថា​៖ «​នៅពេលដែល​យើង​មកដល់​រមណីយដ្ឋាន​អង្គរ យើង​ឃើញ​អំពី​ស្ថានភាព​នៃ​ការរស់នៅ​របស់​បងប្អូន​អ្នកភូមិ​អ្នកស្រុក​របស់​យើង គាត់​មាន​លក្ខណពិសេស​ដាច់ដោយឡែក​របស់គាត់​។ អាហ្នឹង​ហើយ​ជា​ចំណុច​សំខាន់​ដែល​យើង​ត្រូវ​ថែរក្សា​ឱ្យបាន ហើយ​លក្ខណពិសេស​នោះ មិនអាច​មើលឃើញ​នៅក្នុង​ទីក្រុង​ធំៗ​នាពេល​បច្ចុប្បន្ននេះ​ទេ​» ។

បើតាម​អាជ្ញាធរ​ជាតិ​អប្សរា​នៅក្នុង​វគ្គ​បណ្តុះបណ្តាល​នេះ លោក ស៊ឹម ប៊ុនធឿន ជា​វាគ្មិន និង​ជា​អនុប្រធាននាយកដ្ឋាន​រៀបចំ​ដែនដី និង​គ្រប់គ្រង​លំនៅដ្ឋាន​ក្នុង​ឧទ្យាន​អង្គរ​បានធ្វើ​បទបង្ហាញ​ ៤​ ចំណុច​សំខាន់ៗ​ដល់​សិក្ខាកាម រួមមាន ទី​ ១ ច្បាប់​គតិយុត្ត ដែល​អប់រំ​អំពី​ការគ្រប់គ្រង និង​ប្រើប្រាស់​ដី ការបដិសេធ​ច្បាប់​សាងសង់ និង​ការអនុញ្ញាត​ច្បាប់​សាងសង់​។

ទី​ ២ សំណង់​លំនៅឋាន​ខ្មែរ គឺ​បង្ហាញ​អំពី​លក្ខណៈ​ទូទៅ​នៃ​ផ្ទះ​ខ្មែរ ប្រភេទ​សំណង់​នៃ​ផ្ទះ​ខ្មែរ លក្ខណៈ​បច្ចេកទេស​នៃ​ការសាងសង់​ផ្ទះ​ខ្មែរ និង​ការតុបតែង​កែលម្អ​។ ទី​ ៣ ការផ្លាស់ប្ដូរ​សំណង់ផ្ទះ​ខ្មែរ និង​ទី​ ៤ គោលការណ៍​របស់​អាជ្ញាធរ​ជាតិ​អប្សរា​ក្នុងការ​គ្រប់គ្រង​លំនៅឋាន​ប្រពៃណី​ក្នុង​ឧទ្យាន​អង្គរ​៕

អត្ថបទគួរចាប់អារម្មណ៍