.jpg)
លោក នុត សុខុម អនុប្រធាន គ.ជ.ប។ រូបថត គជប
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) បើកទទួលពាក្យស្នើសុំ ចុះបញ្ជីបេក្ខជនឈរឈ្មោះបោះឆ្នោតរបស់គណបក្សនយោបាយ ចាប់ពីថ្ងៃទី ៤ ដល់ថ្ងៃទី ៦ ខែមីនា ឆ្នាំ ២០២២ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៥ ដែលនឹងត្រូវធ្វើឡើងនៅថ្ងៃទី ៥ ខែមិថុនា ឆ្នាំ ២០២២។
លោក នុត សុខុម អនុប្រធាន គ.ជ.ប ថ្លែងនៅក្នុងកិច្ចប្រជុំជាមួយភាគីពាក់ព័ន្ធនៅថ្ងៃទី ៣ ខែមីនាថា គណបក្សនយោបាយដែលបានចុះបញ្ជីត្រឹមត្រូវនៅក្រសួងមហាផ្ទៃ អាចដាក់ពាក្យស្នើសុំចុះបញ្ជីបេក្ខជនតាមការកំណត់របស់ គ.ជ.ប ទៅគណៈកម្មការឃុំ-សង្កាត់ រៀបចំការបោះឆ្នោត (គឃ.សប) ចាប់ពីថ្ងៃទី ៤ ដល់ថ្ងៃទី ៦ ខែមីនា ឆ្នាំ ២០២២។ គណបក្សនយោបាយត្រូវបំពេញពាក្យសុំចុះបញ្ជីបេក្ខជនឈរឈ្មោះបោះឆ្នោត និងសេចក្តីសម្រេចរបស់ គឃ.សប (ទ.១០០៨) ចំនួន ២ ច្បាប់។ ពាក្យសុំចុះបញ្ជីបេក្ខជននេះ ត្រូវបានផ្តល់ជូនដោយឥតគិតថ្លៃ។
លោកថ្លែងថា៖ «ពាក្យសុំត្រូវចុះហត្ថលេខា ដោយប្រធានគណបក្ស ឬតំណាងដែលបានទទួលការផ្ទេរសិទ្ធិជាលាយលក្ខណ៍អក្សរពីប្រធានគណបក្សនោះ។ ការផ្ទេរសិទ្ធិនេះ មិនអនុញ្ញាតឱ្យផ្ទេរសិទ្ធិបន្តឡើយ លើកលែងតែក្នុងលិខិតផ្ទេរសិទ្ធិនោះ មានខ្លឹមសារអនុញ្ញាតឱ្យផ្ទេរសិទ្ធិបន្ត»។
លោក នុត សុខុម បញ្ជាក់ទៀតថា បន្ទាប់ពីថ្ងៃបញ្ចប់ការទទួលពាក្យសុំចុះបញ្ជីបេក្ខជន គឃ.សប ត្រូវធ្វើការពិនិត្យលើពាក្យសុំចុះបញ្ជីបេក្ខជនទាំងនោះ ក្នុងរយៈពេល ១ ថ្ងៃ។ បន្ទាប់មក គឃ.សប ត្រូវបិទផ្សាយជាសាធារណៈនូវបញ្ជីបេក្ខជន ដែលបានពិនិត្យរួចហើយនោះ នៅទីស្នាក់ការរបស់ខ្លួនក្នុងរយៈពេលយ៉ាងយូរ ៣ ថ្ងៃ។
លោកថ្លែងថា៖ «ក្នុងរយៈពេល ៧ ថ្ងៃយ៉ាងយូរ បន្ទាប់ពីបានទទួលពាក្យសុំចុះបញ្ជីបេក្ខជននៃគណបក្សនយោបាយ គឃ.សប ត្រូវសម្រេចយល់ព្រម ឬបដិសេធលើពាក្យសុំនោះ»។
លោក សៅ វ៉ាន់ដេត តំណាងគណបក្សប្រជាជនកម្ពុជាថ្លែងថា បទបញ្ជា និងនីតិវិធីនៃការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ ២០២២ នេះ មិនមានអ្វីប្រែប្រួល ខុសពីអាណត្តិមុនៗនោះទេ ហើយគណបក្សប្រជាជនកម្ពុជានឹងចូលរួមអនុវត្តឱ្យបានត្រឹមត្រូវតាមច្បាប់ បទបញ្ជា និងនីតិវិធីនៃការបោះឆ្នោត។
លោកបន្តថា ចំពោះកម្មវិធីរបស់ គ.ជ.ប សម្រាប់រៀបចំបញ្ជីបេក្ខជនឃើញថាល្អ ព្រោះបានរៀបចំសេចក្ដីណែនាំនៃការប្រើប្រាស់ និងធ្វើវីដេអូបង្ហាញពីការអនុវត្តផ្ទាល់ ធ្វើឱ្យគណបក្សយកទៅបណ្ដុះបណ្ដាល ឬផ្សព្វផ្សាយបន្តមានភាពងាយស្រួល។ ប៉ុន្តែ គ.ជ.ប ប្រកាសដាក់ឱ្យប្រើប្រាស់ កៀកពេលពេក ទម្រាំគណបក្សយកទៅបណ្ដុះបណ្ដាល និងផ្សព្វផ្សាយបន្តដល់មូលដ្ឋានទទួលធ្វើការងារនេះ មានរយៈពេលខ្លីក្នុងការរៀបចំបញ្ជីបេក្ខជនតាមប្រព័ន្ធ និង គ.ជ.ប បិទប្រព័ន្ធ ៣ ថ្ងៃមុនថ្ងៃចាប់ផ្ដើមទទួលពាក្យសុំចុះបញ្ជីបេក្ខជនធ្វើឱ្យគណបក្សមានការលំបាកនៅពេលមានការផ្លាស់ប្ដូរបេក្ខជនដែលត្រូវឱ្យគណបក្សត្រូវរៀបចំដោយដៃវិញ។
លោកថា៖ «សំណូមពរ ប្រសិនជាអាច ស្នើសុំ គ.ជ.ប រៀបចំកម្មវិធីដែលអាចឱ្យគណបក្សបំពេញឯកសារពាក់ព័ន្ធក្នុងទម្រង់ ១០០៨ ទាំងអស់ក្នុងប្រព័ន្ធ តែម្ដងពេលបំពេញរួចព្រីនចេញតែម្ដងជាការស្រេច»។
ពាក់ព័ន្ធនឹងបញ្ហានេះ លោក ទេព នីថា អគ្គលេខាធិការ គ.ជ.ប បានថ្លែងទទួលស្គាល់ថា ការរៀបចំចុះបញ្ជីតាមប្រព័ន្ធបច្ចេកវិទ្យានេះជាការរៀបចំលើកដំបូងរបស់ គ.ជ.ប។ លោកថ្លែងថា៖ «ខ្ញុំសូមអធ្យាស្រ័យដែរក្នុងការរៀបចំប្រព័ន្ធសម្រាប់ចុះឈ្មោះបេក្ខជននេះ វាពិតជាមានរយៈពេលខ្លីមែន ក៏ប៉ុន្តែ ដោយសារការផ្សព្វផ្សាយរបស់យើងមានការយឺតយ៉ាវដែរ។ អ៊ីចឹងទេបើយើងបើកមុន គណបក្សនយោបាយខ្លះ ក៏ពិបាកយល់ដែរ ហើយក៏នឹងពិបាកនឹងចូលរួមដាក់បេក្ខជននេះដែរ។ ដូច្នេះ បានជា គ.ជ.ប សម្រេចបន្ទាប់ពីបណ្តុះបណ្តាល គណបក្សយល់ ហើយគណបក្សអាចទៅចុះបញ្ជីអនុវត្តកម្មវិធីនេះ រៀបចំដាក់បេក្ខជន»។
លោក អ៊ិត សារម្យ ប្រធានគណបក្សបំណងពលរដ្ឋ ប្រាប់ភ្នំពេញប៉ុស្តិ៍នៅថ្ងៃទី ៣ ខែមីនាថា សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់នេះ គឺគណបក្សនឹងមិនដាក់បេក្ខភាពឈរឈ្មោះប្រកួតប្រជែងទេ ប៉ុន្តែគណបក្សរបស់លោកចូលរួមជំរុញឱ្យការបោះឆ្នោតនេះ មានការប្រកួតប្រជែងដោយសេរី ត្រឹមត្រូវ និងយុត្តិធម៌ ដើម្បីធ្វើយ៉ាងណាឱ្យមានការបើកចំហបរិយាកាសនយោបាយ។ «ការបើកចំហបរិយាកាសនយោបាយ មិនមែននៅពេលមុនការបោះឆ្នោត ឬសម្រាប់គណបក្សនយោបាយ ដែលចូលរួមការបោះឆ្នោតទេ គឺមានន័យថា ការផ្តល់សេរីភាព ឱ្យបានទូលំទូលាយដល់ប្រជាពលរដ្ឋជាម្ចាស់ប្រទេស ស្របតាមស្មារតីនៃរដ្ឋធម្មនុញ្ញ និងមានសិទ្ធិបញ្ចេញមតិ និងទទួលខុសត្រូវលើជោគវាសនារបស់ពួកគាត់»៕
