បាត់ដំបងៈ លោកទេសរដ្ឋមន្ត្រី លី ធុជ អនុប្រធានទី ១ អាជ្ញាធរមីនកំពុងធ្វើចលនាបន្តកិច្ចសហប្រតិបត្តិការ និងកៀរគរជំនួយពីដៃគូអភិវឌ្ឍន៍អន្តរជាតិ ដើម្បីគាំទ្រដល់ផែនការអាទិភាពរបស់រាជរដ្ឋាភិបាលដែលបានដាក់ចេញគោលដៅ «កម្ពុជា ១ គ្មានមីនឆ្នាំ ២០២៥»។
លោក លី ធុជ បានបញ្ជាក់បែបនេះក្នុងពេលដឹកនាំម្ចាស់ជំនួយចុះពិនិត្យកិច្ចប្រតិបត្តិការបោសសម្អាតមីនរបស់ CMAC ក្រោមការគាំទ្រគម្រោងបោសសម្អាតមីន ដើម្បីលទ្ធផលដំណាក់កាលទី ៤ ស្ថិតក្នុងភូមិកុយវែង ឃុំព្រះផុស ស្រុកគាស់ក្រឡ ក្នុងខេត្តបាត់ដំបង កាលពីថ្ងៃទី ២ ខែមីនា។
ក្នុងដំណើរចុះត្រួតពិនិត្យនេះមានការចូលរួមពីលោកស្រី Allissar Chaker តំណាង UNDP ប្រចាំនៅកម្ពុជា លោក Ryan Tierney លេខាទូតទី ១ នៃស្ថានទូតអូស្ត្រាលីប្រចាំនៅកម្ពុជា និងលោកស្រី Yeakyung Ji នាយិការងប្រចាំប្រទេសនៃភ្នាក់ងារ KOICA ព្រមទាំងមានការទទួលស្វាគមន៍ពីលោក អ៊ុ ភូមិរ៉ូ អគ្គនាយករង CMAC។
លោក លី ធុជ បានថ្លែងថា៖ «អាជ្ញាធរមីនក្នុងនាមជាសេនាធិការឱ្យរាជរដ្ឋាភិបាលបាននិងកំពុងបន្តកិច្ចខិតខំប្រឹងប្រែង និងបំពេញបេសកកម្មរួមគ្នាជាមួយដៃគូអភិវឌ្ឍន៍ ប្រទេសជាមិត្ត ប្រតិបត្តិករបោសសម្អាតមីន និងភាគីពាក់ព័ន្ធ ក្នុងការគាំទ្រដើម្បីឱ្យកម្ពុជារួចផុតពីគ្រាប់មីន។ ខ្ញុំសូមអំពាវនាវដល់ដៃគូអភិវឌ្ឍន៍ និងប្រទេសជាមិត្តដែលបានកំពុងជួយ និងមិនទាន់បានជួយកម្ពុជាបន្តគាំទ្រ និងចូលរួមដើម្បីបញ្ឈប់វត្តមានគ្រាប់មីន និងដើម្បីភាពជោគជ័យរបស់កម្ពុជា»។
លោកថ្លែថា៖ «ដើម្បីគាំទ្រដល់ផែនការអាទិភាពរបស់រាជរដ្ឋាភិបាល និងឈានទៅសម្រេចបាននូវចក្ខុវិស័យ កម្ពុជា ១ គ្មានមីនឆ្នាំ ២០២៥ រាជរដ្ឋាភិបាលកម្ពុជា មិនបានបង្អន់ដៃឡើយការងារបោសសម្អាតមីន ការចលនាកៀរគរធនធាន និងការចូលរួមចំណែកពីគ្រប់ភាគីពាក់ព័ន្ធត្រូវតែដំណើរការដោយរលូន និងដើរទន្ទឹមគ្នា»។
លោកបញ្ជាក់ថា៖ «ការងារបោសសម្អាតមីនរបស់រាជរដ្ឋាភិបាលនៅតែបន្តទៅមុខជានិច្ច ហើយការស្រាវជ្រាវទិន្នន័យចម្ការមីនមិនបច្ចេកទេស និងការពិនិត្យឡើងវិញនូវការប្រើប្រាស់ដី ត្រូវតែដើរទន្ទឹមគ្នាដើម្បីកាត់បន្ថយផ្ទៃដីកាត់បន្ថយពេលវេលា និងកាត់បន្ថយការចំណាយធនធានបោសសម្អាត។ បន្ទាប់ពីស្តាប់បទបង្ហាញសង្ខេបអំពីកិច្ចប្រតិបត្តិការរបស់មជ្ឈមណ្ឌលស៊ីម៉ាក់ ក៏ដូចជាកិច្ចប្រតិបត្តិការផ្ទាល់របស់កងឯកភាពទី ២ លោក លី ធុជ បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងបោសសម្អាតមីនរបស់ស៊ីម៉ាក់រយៈពេល ៣០ ឆ្នាំកន្លងមកនេះ ព្រមទាំងបានថ្លែងអំណរគុណចំពោះទឹកចិត្តប្រកបដោយសប្បុរសធម៌របស់ដៃគូអភិវឌ្ឍន៍ និងប្រទេសជាមិត្ត ដែលបានចូលរួមជាមួយរាជរដ្ឋាភិបាលក្នុងការកសាង និងបង្កើតនូវសមិទ្ធផលសម្រាប់វិស័យមីននាពេលកន្លងមក។
បើតាមរបាយការណ៍របស់ CMAC សំណល់យុទ្ធភណ្ឌសង្គ្រាមស្ថិតនៅរាយប៉ាយរាប់លានគ្រាប់នៅពាសពេញផ្ទៃប្រទេសកម្ពុជា និងជាបន្ទុកយ៉ាងធ្ងន់ធ្ងរសម្រាប់ប្រជាជន និងរាជរដ្ឋាភិបាលត្រូវប្រឈមមុខដោះស្រាយ។ តាមការប៉ាន់ប្រមាណមានគ្រាប់មីនប្រមាណ ៤-៦ លានគ្រាប់ និងមានគ្រាប់បែកចង្កោមប្រមាណ ៣០ លានកូនគ្រាប់បែកចង្កោមត្រូវបានប្រើប្រាស់ និងទម្លាក់នៅកម្ពុជា ជាពិសេសការទម្លាក់គ្រាប់បែកនៅកម្ពុជា ដោយសហរដ្ឋអាមេរិកមានប្រមាណ ២,៧ លានតោន។ សំណល់ យុទ្ធភណ្ឌសង្គ្រាមចែកចេញជា គ្រាប់មីនប្រឆាំងរថក្រោះ គ្រាប់មីនប្រឆាំងមនុស្ស គ្រាប់បែកចង្កោម គ្រាប់យុទ្ធភណ្ឌមិនទាន់ផ្ទុះនានា និងគ្រាប់បែកគីមី ដែលប៉ះពាល់ផ្ទៃដី រាប់ម៉ឺនគីឡូម៉ែត្រក្រឡា។
ទោះបីជាទំហំនៃបញ្ហាគ្រាប់មីន និងយុទ្ធភណ្ឌមិនទាន់ផ្ទុះធំធេងយ៉ាងនេះក៏ដោយ តែដោយសារការខិតខំប្រឹងប្រែងប្រកបដោយឆន្ទៈខ្ពស់របស់រាជរដ្ឋាភិបាល និងដៃគូអភិវឌ្ឍន៍ទាំងអស់ ព្រមទាំងប្រតិបត្តិករបោសសម្អាតមីន ក្រោមការសម្របសម្រួលពីអាជ្ញាធរមីនកម្ពុជាបានធ្វើឱ្យអត្រាគ្រោះថ្នាក់ដោយសារគ្រាប់មីន និងយុទ្ធភណ្ឌមិនទាន់ផ្ទុះមានការធ្លាក់ចុះគួរឱ្យកត់សម្គាល់។
ឆ្នាំ ២០២២ នេះ CMAC មានអាយុកាល ៣០ ឆ្នាំហើយៗបានធ្វើការបោសសម្អាតផ្ទៃដី ចម្ការមីន និងចម្ការគ្រាប់សរុបជាង ១ ៥៦៩ គីឡូម៉ែត្រក្រឡា រុករកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទជិត ៣ លានគ្រាប់ ក្នុងនោះមីនប្រឆាំងមនុស្សចំនួន ៥៥៤ ២៦១ គ្រាប់ គ្រាប់មីន ប្រឆាំងរថក្រោះចំនួន ១១ ២២៣ គ្រាប់ គ្រាប់យុទ្ធភណ្ឌមិនទាន់ផ្ទុះចំនួន ១ ៩០៩ ៧៩៥ គ្រាប់ គ្រាប់បែកទម្លាក់ពីយន្តហោះរួមនឹងគ្រាប់បែកចង្កោមចំនួន ៤២៨ ៦៨០ គ្រាប់ និងរកឃើញទីតាំងគ្រាប់បែកគីមីចំនួន ៨៧ ទីតាំង ព្រមទាំងឆ្លើយតបសំណើសុំអន្តរាគមន៍ បន្ទាន់ៗបានចំនួន ១១៩ ៧២៨ ករណី។ លទ្ធផលនេះបានចូលរួមចំណែកជាមួយរាជរដ្ឋាភិបាលក្នុងការពង្រឹងសុខសុវត្ថិភាពជូនប្រជាពលរដ្ឋ និងស្តារសេដ្ឋកិច្ចសង្គមឱ្យមានការអភិវឌ្ឍជាបន្តបន្ទាប់៕